ລັດຖະມົນຕີກະຊວງປ້ອງກັນປະເທດສະຫະລັດ ທ່ານ Ash Carter ຊຶ່ງໄດ້ເດີນທາງໄປເຖິງອີຣັກໃນວັນເສົາມື້ນີ້ ຈະພົບປະກັບພວກຜູ້ບັນຊາການຂອງກຳລັງແນວໂຮມເພື່ອທົບທວນແລະໃຫ້ການຊ່ອຍເຫຼືອໃນການປະຕິບັດງານຍຶດເອົາເມືອງ Mosul ຄືນຈາກກຸ່ມລັດອິສລາມ.
ລັດຖະມົນຕີປ້ອງກັນປະເທດ Carter ພວມຢູ່ໃນລະຫວ່າງການຢ້ຽມຢາມອີຣັກເທື່ອທີ 3 ໃນປີນີ້. ທ່ານເປັນຜູ້ກຳກັບນຳການປະຕິບັດງານພາຍໃຕ້ການນຳພາຂອງກຳລັງອີຣັກທີ່ໄດ້ຮັບການໜຸນຫລັງຈາກສະຫະລັດ ໃນການສູ້ລົບເພື່ອຂັບໄລ່ພວກຫົວຮຸນແຮງຈີຮາດີ ອອກໄປຈາກຂົງເຂດດັ່ງກ່າວ.
ການເດີນທາງໄປຢ້ຽມຢາມນະຄອນຫຼວງແບັກແດດ ທີ່ບໍ່ມີການປະກາດໃຫ້ຊາບລ່ວງໜ້າຂອງທ່ານ Carter ມີຂຶ້ນຫລັງຈາກທະຫານອາເມຣິກັນຄົນນຶ່ງໄດ້ເສຍຊີວິດ ຢູ່ໃນຂົງເຂດເມື່ອສອງສາມມື້ຜ່ານມານີ້.
ນອກນັ້ນ ລັດຖະມົນຕີປ້ອງກັນປະເທດສະຫະລັດ ຍັງມີໝາຍກຳນົດທີ່ຈະພົບປະກັບນາ ຍົກລັດຖະມົນຕີອີຣັກທ່ານ Haider al-Abadi ແລະມີທ່າທາງວ່າພວກທ່ານຈະຫາລືກັນກ່ຽວກັບຄວາມລັງໄລໃຈຂອງແບັກແດດທີ່ຈະອະນຸຍາດໃຫ້ກຳລັງເທີກີເຂົ້າຮ່ວມໃນການປະຕິບັດງານເພື່ອຍຶດເອົາເມືອງ Mosul ຄືນ.
ໃນວັນສຸກວານນີ້ ທ່ານ Carter ແລະປະທານາທິບໍດີເທີກີ ທ່ານ Recep Tayyip Erdo- gan ໄດ້ພົບປະກັນທີ່ນະຄອນຫຼວງອັງກາຣາ ເພື່ອຫາລືກ່ຽວກັບຄວາມຈຳເປັນທີ່ຈະຕ້ອງໄດ້ມີການຮ່ວມມືກັນທາງດ້ານທະຫານເພີ້ມຂຶ້ນລະຫວ່າງສະຫະລັດແລະເທີກີໃນການປະ ຕິບັດງານເພື່ອເອົາຊະນະກຸ່ມລັດອິສລາມທັງຢູ່ໃນອີຣັກແລະຊີເຣຍ. ພ້ອມນີ້ທ່ານ Carter ຍັງໄດ້ພົບປະກັບພວກຜູ້ນຳທາງການເມືອງແລະທະຫານຂອງເທີກີນຳດ້ວຍ.
ຖະແຫລງການສະບັບນຶ່ງຂອງກະຊວງປ້ອງກັນປະເທດສະຫະລັດກ່າວວ່າ ຜູ້ນຳທັງສອງ ໄດ້ຕົກລົງກັນທີ່ຈະສືບຕໍ່ຮັກສາການປຶກສາຫາລື ທີ່ມີຂຶ້ນເລື້ອຍໆ ແລະການປະສານງານ ຢ່າງໃກ້ຊິດລະຫວ່າງບັນດາປະເທດໃນກຸ່ມແນວໂຮມທີ່ພວມຕໍ່ສູ້ກັບກຸ່ມລັດອິສລາມເພື່ອຄ້ຳປະກັນກ່ຽວກັບການໄດ້ຮັບໄຊຊະນະຢ່າງເປັນການຖາວອນຕໍ່ກຸ່ມກໍ່ການຮ້າຍດັ່ງກ່າວ.
ເທີກີຕ້ອງການຢາກມີບົດບາດເພີ້ມຂຶ້ນໃນການສູ້ລົບເພື່ອຍຶດເອົາເມືອງ Mosul ຊຶ່ງເປັນຫົວເມືອງໃຫຍ່ອັນດັບສອງຂອງອີຣັກ ທີ່ຢູ່ພາຍໃຕ້ການຄວບຄຸມຂອງກຸ່ມລັດອິສລາມມາໄດ້ສອງປີກວ່າໆແລ້ວນັ້ນແຕ່ລັດຖະບານອີຣັກ ໄດ້ຄັດຄ້ານຕໍ່ການມີສ່ວນພົວພັນຂອງກຳ ລັງເທີກີທີ່ເມືອງ Mosul. ສະຫະລັດຢ້ານວ່າ ຄວາມເຄັ່ງຕຶງ ລະຫວ່າງປະເທດທັງສອງອາດພາໃຫ້ເກີດການແຕກຫັກ ຂອງຂໍ້ຕົກລົງ ທີ່ປ້ອງກັນບໍ່ໃຫ້ ກຳລັງຂອງກຸ່ມສາສະໜາ ແລະພວກຊົນກຸ່ມນ້ອຍຕ່າງໆເຂົ້າໄປໃນເມືອງ Mosul.
ກ່ອນເດີນທາງໄປຮອດເທີກີນັ້ນ ທ່ານ Carter ກ່າວວ່າ ທ່ານຈະເນັ້ນໜັກເຖິງຄວາມຈຳເປັນທີ່ເທີກີຈະຕ້ອງເຄົາລົບອະທິປະໄຕຂອງອີຣັກ.
