ຕໍາຫຼວດອີຣັກກ່າວວ່າ ການໂຈມຕີດ້ວຍລະເບີດ 2 ບັ້ນ
ໄດ້ສັ່ນສະເທືອນບໍລິເວນທີ່ຕັ້ງຂອງໂຮງການລັດຖະບານ
ແຫ່ງນຶ່ງ ໃນເມືອງ Ramadi ທາງພາກຕາວັນຕົກຂອງ
ປະເທດ ໃນວັນຈັນມື້ນີ້ ເຮັດໃຫ້ມີຜູ້ເສຍຊີວິດຢ່າງນ້ອຍ
7 ຄົນ ແລະບາດເຈັບອີກຫລາຍສິບຄົນ.
ລາຍລະອຽດຕ່າງໆຂອງເຫດການໂຈມຕີດັ່ງກ່າວ ຍັງບໍ່ທັນ
ເປັນທີ່ແຈ້ງຂາວເທື່ອໃນເວລານີ້ ແຕ່ພວກເຈົ້າໜ້າທີ່ກ່າວ
ວ່າ ຈໍານວນພວກເສຍຊີວິດອາດມີຢ່າງນ້ອຍ 17 ຄົນ.
ເຈົ້າໜ້າທີ່ຕໍາຫຼວດຄົນນຶ່ງທີ່ບ່ອນເກີດເຫດເວົ້າວ່າ ເຫດ
ຮ້າຍຄັ້ງນີ້ແມ່ນເກີດຈາກການວາງລະເບີດ 2 ຄັ້ງຕິດຕໍ່ກັນ.
ລູກທໍາອິດແມ່ນລະເບີດລົດ ແລະຕາມມາຕິດໆດ້ວຍການ
ວາງລະເບີດສະລະຊີບ ທີ່ຄົນຮ້າຍໄດ້ລະເບີດຕົວເອງຕາຍ.
ທາງການກ່າວວ່າ ພວກເຄາະຮ້າຍທັງຫຼາຍ ສ່ວນໃຫ່ຽແມ່ນ ພວກຕໍາຫຼວດ.
ເມື່ອວັນທີ 12 ເດືອນນີ້ ກໍໄດ້ມີການໂຈມຕີດ້ວຍລະເບີດລົດ ທີແນເປົ້າໝາຍໃສ່ພວກເຈົ້າ
ໜ້າທີ່ທາງການແຂວງໃນເມືອງ Ramadi ຫ່າງຈາກນະຄອນຫລວງ Baghdad ໄປທາງ
ຕາເວັນຕົກ ປະມານ 100 ກິໂລເເມັດ ຊຶ່ງໄດ້ພາກຊີວິດຜູ້ຄົນໄປ 13 ລາຍ ແລະເຮັດໃຫ້
ບາດເຈັບອີກ 20 ກ່ວາຄົນ.
