ກຸ່ມອາລເກອີດາໃນປະເທດອິຣັກໄດ້ໃຫ້ການຢືນຢັນວ່າ ຜູ້ນຳຂອງຕົນສອງຄົນໄດ້ຖືກຂ້າຕາຍ ເມື່ອນຶ່ງອາທິດຜ່ານມາ ໃນການປະຕິບັດງານ ຮ່ວມກັນລະຫວ່າງກອງກຳລັງສະຫະລັດແລະອິຣັກ.
ສຳນັກງານຂ່າວກອງຫລືຂ່າວສືບລັບ SITE Intelligence Group ກ່່າວວ່າ ຕົນໄດ້ແປບົດຖະແຫລງບົດນຶ່ງຢູ່ໃນເວັບໄຊທ໌ສົນທະນາກັນທາງອິນເຕີແນັທຂອງພວກນັບຖືສາສະໜາອິສະລາມ ທີ່ຢືນຢັນຂ່າວການຖືກຂ້າຕາຍຂອງບຸກຄົນທັງສອງ ຊຶ່ງການຢືນຢັນນັ້ນແມ່ນອອກມາຈາກລັດຖະມົນຕີຝ່າຍກົດໝາຍ Shariah ຂອງສາສະໜາອິສະລາມ ຂອງກຸ່ມຈັດຕັ້ງຂອງພວກກະບົດ ທີ່ຊື່ວ່າລັດອິສະລາມແຫ່ງອິຣັກ.
ອິງຕາມສຳນັກງານຂ່າວກອງດັ່ງກ່າວ ຜູ້ກ່ຽວຂຽນລົງໃນເວບໄຊ້ທ໌ວ່າ ຕົນໄດ້ຮັບແຈ້ງວ່າ ຜູ້ນຳກຸ່ມອາລເກອີດາໃນອິຣັກ ນາຍ Abu Ayyub al-Masri ກັບນາຍ Abu Omar al-Baghdadi ກຳລັງເຂົ້າຮ່ວມໃນ ກອງປະຊຸມບັ້ນນຶ່ງ ເມື່ອວັນທີ 18 ເມສາ ຜ່ານມານີ້ ເວລາກອງກຳລັງ ຂອງສະຫະລັດກັບອິຣັກ ບຸກເຂົ້າກວດຄົ້ນແລະໄດ້ເກີດການຕໍ່ສູ້ກັນ ຊຶ່ງໃນເວລາຕໍ່ມາ ຝ່າຍກຳລັງສະຫະລັດໄດ້ເອີ້ນເຮືອບິນເຂົ້າໂຈມຕີບ່ອນທີ່ ພວກອາລເກອີດາປະຊຸມກັນຢູ່ນັ້ນ.
ເຈົ້າໜ້າທີ່ສະຫະລັດແລະອິຣັກໄດ້ປະກາດວ່າ ບຸກຄົນທັງສອງຖືກຂ້າ ຕາຍ ໃນການບຸກເຂົ້າກວດຄົ້ນຂອງກຳລັງຂອງພວກຕົນ ຢູ່ໄກ້ໆກັບເມືອງ Tikrit ທາງພາກເໜືອຂອງອິຣັກ.
