ຄົນວາງລະເບີດສະລະຊີບຢ່າງນ້ອຍ 2 ຄົນໄດ້ທໍາການໂຈມຕີສູນເກນທະຫານແຫ່ງນຶ່ງໃນ ນະຄອນຫລວງແບກແດ໊ດ ໃນວັນອາທິດມື້ນີ້ ເຮັດໃຫ້ມີຜູ້ຄົນຢ່າງນ້ອຍ 7 ຄົນເສຍຊີວິດແລະ ຫລາຍກວ່າ 20 ຄົນໄດ້ຮັບບາດເຈັບ.
ບັນດາເຈົ້າໜ້າທີ່ທະຫານອິຣັກກ່າວວ່າ ຜູ້ວາງລະເບີດສະລະຊີບຄົນທໍາອິດໄດ້ຈູດກະນວນວັດຖຸລະເບີດທີ່ບັນຈຸໄວ້ໃນລົດຕູ້ນ້ອຍຄັນນຶ່ງ ທີ່ຈອດຢູ່ໃກ້ໆກັບທາງເຂົ້າໄປຫາສູນກາງເກນທະຫານນັ້ນ.
ບັນດາເຈົ້າໜ້າທີ່ໃນບ່ອນເກີດເຫດກ່າວວ່າ ຫລັງຈາກນັ້ນຜູ້ວາງລະເບີດສະລະຊີບຄົນທີສອງ ຍ່າງເຂົ້າໄປໃນບໍລິເວນສູນເກນທະຫານ ແຕ່ຜູ້ກ່ຽວໄດ້ຖືກຂ້າຕາຍກັບທີ່.
ເມື່ອ 2-3 ສັບປະດາຜ່ານມານີ້ ຄົນວາງລະເບີດສະລະຊີບຄົນນຶ່ງກໍໄດ້ໂຈມຕີບ່ອນດຽວກັນນີ້ ໂດຍໄດ້ເຮັດໃຫ້ ຢ່າງນ້ອຍ 59 ຄົນເສຍຊີວິດແລະບາດເຈັບຕື່ມອີກ 125 ຄົນ.
ສະຫະລັດໄດ້ຢຸດຕິການປະຕິບັດງານສູ້ລົບໃນອິຣັກ ທີ່ໄດ້ດໍາເນີນມາເປັນເວລາ 7 ປີຂອງຕົນລົງຢ່າງເປັນທາງການໃນສັບປະດາແລ້ວນີ້. ແຕ່ສະຫະລັດຍັງມີທະຫານຈໍານວນ 50 ພັນຄົນ ເຫລືອຢູ່ໃນອິຣັກ ເພື່ອໃຫ້ຄໍາແນະນໍາແລະໃຫ້ການຊ່ອຍເຫລືອ ແກ່ກໍາລັງຮັກສາຄວາມປອດໄພຂອງອິຣັກ ໃນຂະນະທີ່ພວກເຂົາເຈົ້າຮັບເອົາຄວາມຮັບຜິດຊອບໂດຍເຕັມ ໃນການປົກປັກຮັກສາປະເທດຂອງເຂົາເຈົ້ານັ້ນ.
