ບັນດາເຈົ້າໜ້າທີ່ອີຣັກກ່າວວ່າ ລະເບີດລົດ 2 ຄັນໄດ້ແຕກຂຶ້ນໃນເມືອງDiwaniyah ສັງຫານປະຊາຊົນຢ່າງໜ້ອຍ 22 ຄົນແລະບາດເຈັບຕື່ມອີກ 30 ຄົນ.
ທາງການອີຣັກກ່າວວ່າ ການໂຈມຕີດັ່ງກ່າວໄດ້ເກີດຂຶ້ນໃນວັນອັງຄານມື້ນີ້ທີ່ດ່ານກວດກາຂອງຕໍາຫລວດແຫ່ງນຶ່ງ ຢູ່ຂ້າງນອກບ້ານພັກຂອງເຈົ້າແຂວງໃນທ້ອງຖິ່ນ ໃນເມືອງ Diwaniyah ຊຶ່ງຕັ້ງຢູ່ຫ່າງຈາກນະຄອນຫລວງກຸງແບກແດ້ດໄປທາງທິດໃຕ້ປະມານ 150 ຫລັກກິໂລແມັດ.
ທ່ານ Salim Hussein Alwan ເຈົ້າແຂວງ ໄດ້ຮັບຄວາມປອດໄພຈາກການໂຈມຕີດັ່ງກ່າວ.
ບັນດາເຈົ້າໜ້າທີ່ກ່າວວ່າ ຢ່າງໜ້ອຍມີຜູ້ວາງລະເບີດສະລະຊີບຄົນນຶ່ງພົວພັນໃນການໂຈມຕີ
ຄັ້ງນີ້ ຊຶ່ງເປັນນຶ່ງໃນການວາງລະເບີດທີ່ເຮັດໃຫ້ຜູ້ຄົນເສຍຊີວິດຫລາຍບັ້ນໃນທົ່ວອີຣັກໃນວັນ
ອັງຄານມື້ນີ້. ໃນແຫ່ງອື່ນໆອີກຮວມທັງໃນນະຄອນຫລວງແບກແດ໊ດ ເຫດລະເບີດໄດ້ສັງ
ຫານປະຊາຊົນໄປຢ່າງໜ້ອຍ 4 ຄົນແລະບາດເຈັບຕື່ມອີກ 16 ຄົນ.
ຄວາມຮຸນແຮງໃນອີຣັກໄດ້ຜ່ອນລົງຢ່າງຫລວງຫລາຍຈາກລະດັບສູງສຸດໃນປີ 2006 ແລະ
2007 ນັ້ນ. ເຖິງຢ່າງໃດກໍດີ ການໂຈມຕີເພີ່ມຂຶ້ນອີກໃໝ່ຮວມທັງການໂຈມຕີຫລາຍບັ້ນຕໍ່
ບັນດາເຈົ້າໜ້າທີ່ລັດຖະບານ ໄດ້ພາໃຫ້ເກີດຄວາມເປັນຫ່ວງຂຶ້ນມາກ່ຽວກັບວ່າຈະມີທາງ
ເປັນໄປໄດ້ທີ່ຄວາມຮຸນແຮງຈະເພີ່ມຂຶ້ນໃນຂະນະທີ່ສະຫະລັດພວມກະກຽມທີ່ຈະຖອນກໍາ
ລັງຂອງຕົນໃຫ້ໝົດພາຍໃນທ້າຍປີນີ້.
