ທາງການອີຣັກ ກ່າວວ່າ ມີຢ່າງນ້ອຍ 115 ຄົນ ເສຍຊີວິດ ໃນວັນຈັນວານນີ້ ຍ້ອນການ
ໂຈມຕີທີ່ຮຸນແຮງ ຕິດຕໍ່ກັນເປັນລໍາດັບ ຢູ່ໃນທົ່ວປະເທດ.
ລະເບີດລົດຄັນນຶ່ງທີ່ລະເບີດຂຶ້ນ ໃນແລງວັນຈັນວານນີ້ ໃກ້ໆກັບຮ້ານກາເຟແຫ່ງນຶ່ງ ໃນ
ຄຸ້ມຢູ່ອາໄສຂອງຊາວ Shi’ite ໃນນະຄອນຫຼວງ Baghdad ໄດ້ສັງຫານຢ່າງນ້ອຍ 5 ຄົນ
ແລະເຮັດໃຫ້ບາດເຈັບອີກ 24 ຄົນ.
ຄື້ນຟອງຂອງການໂຈມຕີແບບປະສານງານກັນ ທີ່ມີທັງລະເບີດແລະຍິງກັນນັ້ນ ໄດ້ເຮັດ
ໃຫ້ມີຜູ້ບາດເຈັບຫຼາຍກວ່າ 200 ຄົນແລ້ວ ໃນ 15 ຫົວເມືອງໃນມື້ທີ່ນອງເລືອດທີ່ສຸດ ໃນ
ອີຣັກ ໃນຮອບ 2 ປີປາຍ. ຄັ້ງຫຼ້າສຸດທີ່ມີຜູ້ຄົນລົ້ມຕາຍແລະບາດເຈັບສູງສຸດນັ້ນ ແມ່ນວັນ
ທີ 20 ເດືອນພຶດສະພາ 2010.
ການໂຈມຕີທີ່ຮ້າຍແຮງສຸດໃນວັນຈັນວານນີ້ ແມ່ນເກີດຂຶ້ນທີ່ເມືອງ Taji 20 ກິໂລແມັດ ຫ່າງ
ຈາກກຸງ Baghdad ໄປທາງທິດເໜືອ ບ່ອນທີ່ມີເກືອບຮອດ 40 ຄົນເສຍຊີວິດ.
ຍັງບໍ່ທັນມີຜູ້ໃດອອກມາອ້າງເອົາຄວາມຮັບຜິດຊອບເທື່ອ.
ສະຫະລັດໄດ້ປະນາມການໂຈມຕີຄັ້ງນີ້ ແຕ່ກໍກ່າວວ່າ ເຖິງແມ່ນມີເລື່ອງຮ້າຍແຮງດັ່ງກ່າວນີ້
ກໍຕາມ ແຕ່ວ່າຄວາມຮຸນແຮງໃນອີຣັກເວລານີ້ ກໍຍັງບໍ່ເທົ່າກັບໃນອະດີດ.
