ເຈົ້າໜ້າທີ່ອິຣັກຖະແຫຼງວ່າ ການໂຈມຕີດ້ວຍລະເບີດ ທີ່ຕິດຕໍ່ກັນຫຼາຍໆບັ້ນຊຶ່ງໄດ້ມີຂຶ້ນ
ໃນນະຄອນຫຼວງແລະຫົວເມືອງອື່ນໆໃນພາກເໜືອຂອງປະເທດ ໄດ້ເຮັດໃຫ້ມີຜູ້ເສຍຊີວິດ
35 ຄົນ ແລະບາດເຈັບອີກຫຼາຍກວ່າ 100 ຄົນ.
ພວກເຈົ້າໜ້າທີ່ກ່າວວ່າ ການໂຈມຕີຫຼາຍໆບັ້ນໃນວັນພະຫັດມື້ນີ້ ແມ່ນມີທັງລະເບີດລົດ
ແລະລະເບີດຂ້າງທາງ ປະສົມກັນ ທີ່ປາກົດວ່າແນເປົ້າໝາຍໃສ່ກອງກໍາລັງຮັກສາຄວາມ
ປອດໄພຂອງອີຣັກ.
ທີ່ນະຄອນຫຼວງແບັກແດັດ ລະເບີດຫຼາຍຄັ້ງໄດ້ສັງຫານຢ່າງນ້ອຍ 15 ຄົນ ຊຶ່ງສ່ວນໃຫຍ່
ຢູ່ໃນເຂດທີ່ຊາວ Shi’ite ອາໄສຢູ່. ລະເບີດລູກນຶ່ງ ໄດ້ແຕກໃສ່ຂະບວນລົດຂອງລັດຖະ
ມົນຕີກະຊວງສາທາລະນະສຸກ ແຕ່ທ່ານບໍ່ໄດ້ຮັບບາດເຈັບ.
ສ່ວນເຫດລະເບີດທີ່ເມືອງ Kirkuk ໄດ້ສັງຫານ 9 ຄົນ ໃນຂະນະທີ່ໄດ້ເກີດເຫດລະເບີດ
ຮ້າຍແຮງອີກຈຳນວນນຶ່ງ ທີ່ເມືອງ Samarra, Taji ແລະ Ramadi.
ຍັງບໍ່ທັນມີກຸ່ມໃດອອກມາອ້າງເອົາຄວາມຮັບຜິດຊອບໃນການໂຈມຕີດ້ວຍລະເບີດ
ເຫຼົ່ານີ້ເທື່ອ ຊຶ່ງໄດ້ທຳລາຍສະພາບການທີ່ຂ້ອນຂ້າງງຽບສະຫງົບຢູ່ໃນອິຣັກ.
ຜ່ານມາ ແມ່ນໄດ້ມີການຖິ້ມໂທດໃສ່ພວກທີ່ນັບຖືສາສະໜາອິສລາມນິກາຍ Sunni
ຫົວຮຸນແຮງ ກ່ຽວກັບການໂຈມຕີສ່ວນໃຫຍ່ ໃສ່ພວກທີ່ຖືນິກາຍ Shi’ite ຊຶ່ງເປັນ
ຊົນກຸ່ມໃຫຍ່ໃນອີຣັກ.
ການໂຈມຕີສະລະຊີບແລະການໂຈມຕີດ້ວຍລະເບີດລົດທີ່ມີຂຶ້ນເກືອບພ້ອມໆກັນ ຢູ່ໃນ
8 ເມືອງໃນເດືອນແລ້ວນີ້ ໄດ້ເຮັດໃຫ້ຢ່າງນ້ອຍ 46 ຄົນເສຍຊີວິດ ແລະ ບາດເຈັບອີກ
ຫຼາຍກວ່າ 200 ຄົນ. ການໂຈມຕີດັ່ງກ່າວນັ້ນໄດ້ເກີດຂຶ້ນບໍ່ເທົ່າໃດ ມື້ ກ່ອນອີຣັກເປັນ
ເຈົ້າພາບຈັດກອງປະຊຸມສຸດຍອດຂອງກຸ່ມສັນນິບາດອາຣັບ.
