ບັນດາທະນາຍຄວາມຂອງ ຄົນເທີກີເຊື້ອສາຍອີຣ່ານ ທີ່ໄດ້ຖືກຈັບກຸມ ເມື່ອເດືອນມີນາ ຜ່ານມາ ໃນຂໍ້ຫາສົມຮູ້ຮ່ວມຄິດ ເພື່ອຫລົບຫລີກ ການລົງໂທດຕໍ່ອີຣ່ານ ໄດ້ຂໍຮ້ອງຕໍ່ສານລັດຖະບານກາງ ສະຫະລັດ ໃຫ້ກຳນົດ ເງິນຄ່າປະກັນໂຕ ໃນຈຳນວນ 50 ລ້ານ ໂດລາ ເພື່ອປ່ອຍຜູ້ກ່ຽວ ຈົນກວ່າຈະຖືກຮ້ອງມາດຳເນີນຄະດີ.
ທ້າວ Reza Zarrab ເປັນໜຶ່ງ ໃນສາມຄົນ ທີ່ຖືກຟ້ອງໃນຂໍ້ຫາ ໃນອັນທີ່ບັນດາ ໄອຍະ ການ ກ່າວຫາວ່າ ແຜນການໄລຍະ 5 ປີ ທີ່ກ່ຽວພັນກັບການເຮັດທຸລະກິດ ໃນນາມຂອງ ລັດຖະບານອີຣ່ານ ມູນຄ່າຫຼາຍລ້ານໂດລາ.
ອີຣ່ານໄດ້ຢູ່ພາຍໃຕ້ການລົງໂທດທາງດ້ານເສດຖະກິດຫຼາຍຢ່າງໂດຍ ສະຫະລັດ ນັບ ຕັ້ງແຕ່ ປີ 1979 ເປັນຕົ້ນມາ ທີ່ຫ້າມການເຮັດທຸລະກິດໃດໆ ທີ່ກ່ຽວພັນກັບ ອົງກອນຕ່າງໆ ຂອງສະຫະລັດ ແລະ ຂອງອີຣ່ານ ພ້ອມດ້ວຍລັດຖະບານ ຂອງອີຣ່ານນຳດ້ວຍ. ການລົງ ໂທດເຫຼົ່ານີ້ ແມ່ນແຕກຕ່າງ ຈາກການລົງໂທດເມື່ອບໍ່ດົນມານີ້ ທີ່ໄດ້ມີຂຶ້ນເພື່ອເປັນການ ຕອບໂຕ້ ຕໍ່ໂຄງການນິວເຄລຍຂອງອີຣ່ານນັ້ນ ຊຶ່ງໄດ້ຖືກຍົກເລີກເມື່ອຕົ້ນປີນີ້.
ສຳນວນຟ້ອງທີ່ໄດ້ມີການເປີດເຜີຍ ໃນເດືອນມີນາຜ່ານມາ ກ່າວວ່າ ທ້າວ Zarrab ແລະ ພວກສົມຮູ້ຮ່ວມຄິດກັບລາວ ໄດ້ໃຊ້ເຄືອຂ່າຍ ບໍລິສັດຕ່າງໆ ຢູ່ໃນອີຣ່ານ ເທີກີ ແລະ ແຫ່ງອື່ນໆ ຢູ່ໃນໂລກ ເພື່ອເຮັດທຸລະກິດ ໃນຂະນະທີ່ ປົກປິດການດຳເນີນທຸລະກິດນັ້ນ ຈາກບັນດາທະນາຄານສະຫະລັດ ຊຶ່ງພວກເຂົາເຈົ້າ ໄດ້ເຮັດໃຫ້ອົງກອນຕ່າງໆ ຂອງ ອີຣ່ານ.
ຢູ່ໃນໜັງສືສະບັບໜຶ່ງ ແລະ ເອກະສານຢັ້ງຢືນຕ່າງໆ ທີ່ໄດ້ຍື່ນຕໍ່ສານໃນວັນພຸດວານນີ້ ທະນາຍຄວາມຂອງທ້າວ Zarrab ໄດ້ຂໍ້ຮ້ອງຜູ້ພິພາກສາ ໃນຄະດີຂອງພວກເຂົາ ໃຫ້ ຜູ້ກ່ຽວ ຖືກກັກບໍລິເວນຢູ່ໃນເຮືອນ ໃນຂະນະຄອຍຖ້າການດຳເນີນຄະດີ ໂດຍມີເງື່ອນໄຂ ຫຼາຍໆຢ່າງນຳດ້ວຍ. ພວກທະນາຍຄວາມໄດ້ກ່າວວ່າ ເງິນຄ່າປະກັນໂຕ 50 ລ້ານໂດລາ ຊຶ່ງຈະປະກອບດ້ວຍ ເງິນສົດ 10 ລ້ານໂດລາ, ຜູ້ກ່ຽວຈະມີຍາມຕິດອາວຸດສອງຄົນຮັກສາຢູ່ທຸກເວລາ ແລະ ຜູ້ກ່ຽວສາມາດພຽງ ແຕ່ອອກຈາກເຮືອນຂອງຕົນ ເພື່ອໄປຮັບ ການຮັກ ສາປິດປົວ, ໄປພົບປະກັບພວກທະນາຍຂອງຕົນ ຫຼື ໄປຮ່ວມພິທີທາງສາສະໜາເທົ່ານັ້ນ.
ເອກະສານກ່າວວ່າ ທ້າວ Zarrab ຄວນຈະຢູ່ໃນສະພາບຖືກ “ຄວບຄຸມຕົວນ້ອຍສຸດ” ໂດຍມີເຫດສົມຜົນ ທີ່ຈະຮັບປະກັນວ່າຜູ້ກ່ຽວຈະໄປ ມີໜ້າຢູ່ສານ ໃນການດຳເນີນຄະດີ ຂອງຜູ້ກ່ຽວ. ທະນາຍຄວາມຂອງທ້າວ Zarrab ໂຕ້ຖຽງວ່າ ຂໍ້ກ່າວຫາກ່ຽວກັບຄວາມຜິດ ຂອງລາວແມ່ນໃນດ້ານການເງິນ ໂດຍບໍ່ມີຂໍ້ຫາພົວພັນດ້ານຄວາມຮຸນແຮງ ດ້ານເພດ ການກໍ່ການຮ້າຍ ຫຼື ດ້ານອາວຸດໃດໆ.
