ຜູ້ນໍາສູງສຸດຂອງອີຣ່ານ ໄດ້ອະທິບາຍກ່ຽວກັບສິ່ງທີ່ສົງໄສວ່າ ເປັນການວາງຢາພິດ ຢູ່ທີ່ໂຮງຮຽນຂອງເດັກນ້ອຍຍິງ ໃນວັນຈັນວານນີ້ວ່າ ເປັນ “ອາຊະຍາກໍາ ທີ່ບໍ່ສາມາດໃຫ້ອະໄພໄດ້.”
ອາຢາໂຕລລາ ອາລີ ຄາເມນີ ກ່າວວ່າ ຖ້າບັນດາເຈົ້າໜ້າທີ່ຫາກສາມາດພິສູດໄດ້ວ່າ ນັ້ນແມ່ນການວາງຢາພິດໂດຍເຈດຕະນາ, “ຜູ້ໃດກໍຕາມ ທີ່ຢູ່ເບື້ອງຫຼັງຂອງເຫດການທີ່ເກີດຂຶ້ນດັ່ງກ່າວ ຈະຕ້ອງໄດ້ຮັບການລົງໂທດປະຫານຊີວິດ, ແລະຈະບໍ່ມີການນິລະໂທດກໍາໃດໆ ສໍາລັບພວກເຂົາ,” ອີງຕາມລາຍງານຂອງອົງການຂ່າວສາທາລະນະລັດອິສລາມ ຫຼື IRNA.
ນີ້ແມ່ນຄັ້ງທໍາອິດໃນການກ່າວປາໄສຕໍ່ສັງຄົມ ຂອງອາຢາໂຕລາຄາເມນີກ່ຽວກັບ ສິ່ງທີ່ສົງໄສວ່າ ເປັນການວາງຢາພິດ ໃສ່ບັນດາເດັກນ້ອຍຫຼາຍຮ້ອຍຄົນ, ເຊິ່ງໄດ້ກໍ່ໃຫ້ເກີດຄື້ນຄວາມໂມໂຫໄປທົ່ວສັງຄົມຂອງອີຣ່ານ.
ປະທານາທິບໍດີຂອງອີຣ່ານ ທ່ານອິບຣາຮິມ ຣາຍຊີ, ໃນອາທິດທີ່ຜ່ານມາ ໄດ້ອອກຄໍາສັ່ງໃຫ້ມີການສືບສວນ ກ່ຽວກັບການເຈັບປ່ວຍທີ່ເກີດຂຶ້ນ ຢູ່ທ່າມກາງໂຮງຮຽນຂອງພວກເດັກນ້ອຍຍິງ ຫຼາຍກວ່າ 50 ແຫ່ງ ຢ້ອນຄືນຫຼັງໄປເດືອນພະຈິກປີກາຍນີ້.
ການເຈັບປ່ວຍດັ່ງກ່າວ ໄດ້ຂະຫຍາຍໄປທົ່ວບໍລິເວນ ຢ່າງໜ້ອຍ 21 ແຂວງຂອງຈໍານວນທັງໝົດ 30 ແຂວງຂອງອີຣ່ານ.
