ໜ່ວຍປະຕິບັດການອີຣ່ານຄົນນຶ່ງ ໄດ້ຖືກຟ້ອງໃນການວາງແຜນລອບສັງຫານ ທ່ານຈອນ ໂບລຕັນ ອະດີດທີ່ປຶກສາດ້ານຄວາມໝັ້ນຄົງແຫ່ງຊາດຂອງສະຫະລັດ ໃນອັນທີ່ເຊື່ອກັນວ່າ ເປັນການຕອບໂຕ້ຕໍ່ການໂຈມຕີທາງອາກາດ ທີ່ໄດ້ສັງຫານນາຍພົນອີຣ່ານທີ່ມີອິດທິພົນຄົນນຶ່ງ ອີງຕາມການເປີດເຜີຍຂອງກະຊວງຍຸຕິທຳສະຫະລັດ ໃນວັນພຸດວານນີ້.
ຜູ້ຕ້ອງສົງໄສ ທ້າວຊາແຣມ ພົວຊາຟີ (Shahram Poursafi) ໄດ້ຖືກລະບຸໂຕໂດຍເຈົ້າໜ້າທີ່ສະຫະລັດວ່າ ເປັນສະມາຊິກຂອງກຳລັງພິທັກປະຕິວັດອິສລາມອີຣ່ານ. ອົງການສັນຕິບານກາງ ຫຼື FBI ຂອງສະຫະລັດ ຕ້ອງການໂຕຜູ້ກ່ຽວໃນຂໍ້ຫາທີ່ພົວພັນກັບແຜນການລອບສັງຫານໂດຍມືປືນຮັບຈ້າງ.
ໄອຍະການກ່າວວ່າ ແຜນການລອບສັງຫານທ່ານໂບລຕັນ ອະດີດທີ່ປຶກສາດ້ານຄວາມໝັ້ນຄົງແຫ່ງຊາດ ເປັນເວລານຶ່ງປີເຄິ່ງ ແຕ່ປີ 2018 ຫາ 2019 ຂອງປະທານາທິບໍດີດໍໂນລ ທຣຳ ແມ່ນມີທ່າທາງວ່າຈະເປັນການຕອບໂຕ້ ຕໍ່ການໂຈມຕີທາງອາກາດເມື່ອເດືອນມັງກອນ ປີ 2020 ຊຶ່ງໄດ້ສັງຫານນາຍພົນກັສແຊັມ ຊູເລມານີ ທີ່ເປັນຜູ້ບັນຊາການ ກຳລັງອາລກຸດສ໌ ຂອງອີຣ່ານ.
ກະຊວງຍຸຕິທຳກ່າວວ່າ ທ້າວພົວຊາຟີ ພວມຫາທາງທີ່ຈະຈ້າງຄົນຢູ່ໃນສະຫະລັດ 300,000 ໂດລາ ໃຫ້ສັງຫານທ່ານໂບລຕັນ ຢູ່ວໍຊິງຕັນຫຼືໃນລັດແມຣີແລນ ທີ່ຕັ້ງຢູ່ໃກ້ຄຽງ. ແຜນການດັ່ງກ່າວໄດ້ຖືກເປີດເຜີຍໃຫ້ຮູ້ ໃນໄລຍະຫຼາຍໆເດືອນຜ່ານມາ ເລີ້ມຂຶ້ນເມື່ອທ້າຍປີກາຍນີ້ ໂດຍທີ່ທ້າວພົວຊາຟີ ໃນຈຸດນຶ່ງໄດ້ບອກກັບຜູ້ຕິດຕໍ່ຢູ່ໃນສະຫະລັດວ່າ “ລາວກຳລັງໄດ້ຮັບຄວາມກົດດັນຈາກ ‘ຄົນຂອງລາວ’ ໃຫ້ການສັງຫານທີ່ວ່ານັ້ນມີຂຶ້ນໂດຍໄວ.”
ທ້າວພົວຊາຟີ ຍັງບໍ່ທັນຖືກຈັບເທື່ອຢູ່ຕ່າງປະເທດ. ຖ້າໃນທີ່ສຸດຫາກຖືກຈັບໄດ້ແລະດຳເນີນຄະດີ ຜູ້ກ່ຽວຈະປະເຊີນກັບໂທດ ຈຳຄຸກ 10 ປີ ແລະປັບໃໝ 250,000 ໂດລາ ທີ່ໄດ້ນຳໃຊ້ສະຖານທີ່ລະຫວ່າງລັດໃນການຈ້າງມືປືນລອບສັງຫານ ແລະໂທດຈຳຄຸກເຖິງ 15 ປີ ແລະປັບໃໝອີກ 250,000 ໂດລາໃນຖານສະໜອງ ແລະພະຍາຍາມສະໜອງອຸບປະກອນສະໜັບສະໜຸນຕໍ່ການລອບວາງແຜນສັງຫານຂ້າມປະເທດ.
ໃນຖະແຫຼງການມື້ວານນີ້ ອີຣ່ານເອີ້ນຂໍ້ກາວຫາດັ່ງກ່າວນັ້ນວ່າ ມີຈຸດປະສົງທາງດ້ານການເມືອງ.
ໂຄສົກກະຊວງການຕ່າງປະເທດອີຣ່ານ ທ່ານນາສເຊີ ການາອານີ ກ່າວວ່າ “ອີຣ່ານຂໍເຕືອນຢ່າງແຮງ ໃນການເອົາມາດຕະການໃດໆຕໍ່ປະຊາຊົນອີຣ່ານ ພາຍໃຕ້ຂໍ້ອ້າງໃນການກ່າວຫາທີ່ເປັນຕາຢາກຫົວແລະບໍ່ມີມູນຄວາມຈິງເຫຼົ່ານີ້.”
ທີ່ປຶກສາດ້ານຄວາມໝັ້ນຄົງແຫ່ງຊາດ ຄົນປັດຈຸບັນ ຂອງສະຫະລັດ ທ່ານເຈກ ຊູລລີວານ ກ່າວວ່າ “ຖ້າອີຣ່ານຫາກທຳການໂຈມຕີຕໍ່ພົນລະເມືອງຂອງພວກເຮົາ ທີ່ຮວມທັງບັນດາຜູ້ທີ່ຍັງສືບຕໍ່ຮັບໃຊ້ສະຫະລັດ ຫຼືບັນດາຜູ້ທີ່ເຄີຍໃຫ້ການຮັບໃຊ້ມາແລ້ວນັ້ນ ອີຣ່ານຈະປະເຊີນກັບຜົນທີ່ຕິດຕາມມາຢ່າງຮ້າຍແຮງ. ພວກເຮົາຈະສືບຕໍ່ໃຊ້ຊັບພະຍາກອນທີ່ມີຢູ່ໂດຍເຕັມຂອງລັດຖະບານສະຫະລັດ ເພື່ອໃຫ້ການປົກປ້ອງຊາວອາເມຣິກັນ.”
