ຜູ້ນຳສູງສຸດຂອງອີຣ່ານ Ayatollah Ali Khamenei ກ່າວວ່າ
ສະຫະລັດແລະ “ບັນດາປະເທດມະຫາອຳນາດລ່າຫົວເມືອງຂຶ້ນ
ຢູໂຣບ” ໄດ້ປະສົບກັບຄວາມລົ້ມແຫຼວໃນຄວາມພະຍາຍາມທີ່
ຈະເຮັດໃຫ້ອີຣ່ານ ຄູ້ເຂົ່າກົ້ມລົງ ໃນລະຫວ່າງການເຈລະຈາ
ກ່ຽວກັບໂຄງການນີວເຄລຍຂອງເຕຫະຣ່ານນັ້ນ.
ການໃຫ້ຄຳເຫັນດັ່ງກ່າວໄດ້ພິມເຜີຍແຜ່ໃນໜ້າ website
ຂອງທ່ານ ໃນວັນອັງ ຄານມື້ນີ້ ຊຶ່ງເປັນຄຳເຫັນອັນທຳອິດ
ຂອງທ່ານ ນັບແຕ່ຄະນະເຈລະຈາຂອງອີຣ່ານແລະກຸ່ມປະເທດ
ມະຫາອຳນາດຂອງໂລກ ໄດ້ຕົກລົງຕໍ່ເວລາໃນການເຈລະຈາ
ກ່ຽວກັບໂຄງການນີວເຄລຍ ອອກໄປຈົນຮອດກາງປີໜ້ານີ້.
ການຕໍ່ເວລາໃນການເຈລະຈາອອກໄປ ແມ່ນມີຂຶ້ນຫຼັງຈາກທີ່ທັງສອງຝ່າຍບໍ່ໄດ້ບັນລຸຂໍ້ຕົກລົງພາຍໃນແລງວັນຈັນວານນີ້ ເພື່ອຄ້ຳປະກັນວ່າໂຄງການນີວເຄລຍອີຣ່ານ ມີຈຸດປະສົງໃນທາງສັນຕິ ເພື່ອແລກປ່ຽນກັບການຜ່ອນເບົາການລົງໂທດທາງດ້ານເສດຖະກິດຕໍ່ອີຣ່ານນັ້ນ.
ນັກການທູດ ຕໍ່ອາຍຸ ການເຈລະຈາ ນິວເຄລຍ ກັບອີຣ່ານ
ລັດຖະມົນຕີການຕ່າງປະເທດສະຫະລັດ ທ່ານ John Kerry ໄດ້ກ່າວວ່າ ອີຣ່ານ ແລະກຸ່ມທີ່ປະກອບດ້ວຍສະຫະລັດ ອັງກິດ ຈີນ ຝຣັ່ງ ຣັດເຊຍ ແລະເຢຍຣະມັນ ແມ່ນໃກ້ທີ່ສຸດ ທີ່ຈະບັນ
ລຸການຕົກລົງ ທີ່ຄອງຄອຍຖ້າມານານແລ້ວນັ້ນ. ທ່ານໄດ້ລາຍງານໃຫ້ຊາບເຖິງຄວາມຄືບໜ້າ ໃນອັນທີ່ທ່ານເອີ້ນວ່າ ບາງບັນຫາທີ່ສ້າງຄວາມກັງວົນໃຈທີ່ສຸດ ທີ່ຍັງແກ້ໄຂບໍ່ຕົກເທື່ອ.
