ລິ້ງ ສຳຫລັບເຂົ້າຫາ

ວັນສຸກ, ໒໙ ມີນາ ໒໐໒໔

ນັກຂ່າວຍິງຊາວອີຣ່ານ 2 ຄົນ ທີ່ຕ້ອງການລາຍງານ ກ່ຽວກັບ ການຕາຍຂອງນາງ ມາຊາ ອາມີນີ ຢູ່ໃນການດຳເນີນຄະດີ


ແຟ້ມພາບ - ແມ່ຍິງຄົນນຶ່ງເບິ່ງໜ້າຈໍຄອມພິວເຕີ້ທີ່ມີຮູບຂອງນັກຂ່າວຍິງຊາວອີຣ່ານ, ນາງ ນີລູຟາ ຮາເມດີ, ຊ້າຍ, ແລະ ນາງ ເອລາເຮ ໂມຮຳມາດີ, ຂວາ, ຢູ່ທີ່ນະຄອນຫຼວງ ນິໂກເຊຍ (Nicosia) ປະເທດໄຊປຣັສ (Cyprus) ວັນທີ 2 ພະຈິກ 2022
ແຟ້ມພາບ - ແມ່ຍິງຄົນນຶ່ງເບິ່ງໜ້າຈໍຄອມພິວເຕີ້ທີ່ມີຮູບຂອງນັກຂ່າວຍິງຊາວອີຣ່ານ, ນາງ ນີລູຟາ ຮາເມດີ, ຊ້າຍ, ແລະ ນາງ ເອລາເຮ ໂມຮຳມາດີ, ຂວາ, ຢູ່ທີ່ນະຄອນຫຼວງ ນິໂກເຊຍ (Nicosia) ປະເທດໄຊປຣັສ (Cyprus) ວັນທີ 2 ພະຈິກ 2022

ນັກ​ຂ່າວຍິງຊາວອີຣ່ານ 2 ຄົນ​ທີ່​ຖືກ​ຄຸມຄັງ, ຜູ້​ທີ່​ໄດ້​ຊ່ວຍ​ພິ​ມ​ເຜີຍແຜ່​ກ່ຽວ​ກັບ​ຄະດີ​ຂອງ​ແມ່ຍິງ​ອາຍຸ 22 ປີ ທີ່​ເສຍ​ຊີວິດ​ໃນລະຫວ່າງ​ການ​ຄວບ​ຄຸມຕົວ​ຂອງ​ຕຳຫຼວດ ​ໃນ​ເດືອນ​ກັນຍາ​ຜ່ານ​ມາ ​ໄດ້​ຖືກ​ດຳ​ເນີນ​ຄະດີ​ຢູ່​ໃນ​ອີຣ່ານ.

ນາງເອລາເຮ ໂມຮຳມາດີ (Elaheh Mohammadi), ຜູ້ທີ່ເຮັດວຽກກັບຫນັງສືພິມ ແຮມ ມີຮານ (Ham Mihan), ໄດ້ນຳ​ອອກເຜີຍແຜ່ເລື້ອງພິທີສົບຂອງ ນາງມາຊາ ອາມີນີ (Mahsa Amini). ການພິຈາລະນາຄະດີຂອງນາງໄດ້ເລີ້ມຂຶ້ນໃນວັນຈັນທີ່ຜ່ານມາ ໂດຍ​ການ​ປິດ​ລັບ ຢູ່ໃນສານປະຕິວັດ.

ທະນາຍຄວາມຂອງນາງ, ທ່ານ ຊາຮັບ ເມີໂລຮີ (Shahab Mirlohi), ບອກກັບໜັງສືພິມ ແຮມ ມີຮານ (Ham Mihan) ວ່າເຖິງວ່າຈະມີການເຂົ້າຮ່ວມຮັບຟັງການໄຕ່ສວນໃນວັນຈັນ, ໄດ້ມີຄວາມຊັກຊ້ານຶ່ງຊົ່ວໂມງ, ແລະທະນາຍຄວາມບໍ່ໄດ້ຮັບໂອກາດໃຫ້ກ່າວປົກປ້ອງ ຫຼືສະແດງຄວາມຄິດເຫັນອັນໃດເລີຍຕະຫຼອດການດຳເນີນການທັງຫມົດ.

ທ່ານ​ເມີໂລຮີ (Mirlohi) ກ່າວວ່າຄະດີນີ້ຄວນຈະຖືກພິຈາລະນາຢູ່ໃນສານອາຍາທີ່ມີສິດອຳນາດໃນການຕັດສິນ ໂດຍມີຄະນະຕຸລາການ ແລະຢູ່ໃນບ່ອນສາທາລະນະທີ່ເປີດເຜີຍ. ທ່ານ​ກ່າວ​ວ່າ ທ່ານ​ເຊື່ອ​ວ່າ​ສານ​ປະ​ຕິ​ວັດ ​ຍັງ​ຂາດ​ສິດ​ອຳ​ນາດ​ທີ່​ຈຳ​ເປັນ​ໃນ​ການ​ພິ​ຈາ​ລະ​ນາຄະດີ​ນີ້, ເຊິ່ງຕົ້ນຕໍແມ່ນ​ກ່ຽວ​ກັບ​ກິດ​ຈະ​ກຳ​ດ້ານ​ການ​ຂ່າວ ແລະ​ຄວາມ​ຄິດ​ເຫັນ ທີ່ໄດ້ສະແດງອອກໂດຍ ​ນາງໂມແຮມມາດີ.

ອ່ານຂ່າວນີ້ເປັນພາສາອັງກິດ

XS
SM
MD
LG