ນັກເດີນປ່າຊາວອາເມຣິກັນ 2 ຄົນ ທີ່ຖືກຈໍາຄຸກເປັນເວລາ 2 ປີໃນອິຣ່ານ ໃນຂໍ້ຫາຈາລະກໍານັ້ນ ກ່າວວ່າ ພວກເຂົາຖືກຈັບແລະກັກຂັງໄວ້ ກໍຍ້ອນວ່າ ເຂົາເຈົ້າເປັນຊາວອະເມຣິກັນ ບໍ່ແມ່ນຍ້ອນວ່າພວກເຂົາເຈົ້າໄດ້ກະທໍາຜິດແຕ່ຢ່າງໃດເລີຍ.
ນາຍ Josh Fattal ແລະ ນາຍ Shane Bauer ຊຶ່ງໄດ້ຖືກຈັບກຸມພ້ອມກັບເພື່ອນອີກຄົນນຶ່ງ ນາງ Sarah Shourd ໃນຂະນະທີ່ເດີນປ່າຕາມເສັ້ນທາງເລາະລຽບຊາຍແດນ Iraq-Iran ໃນເດືອນກໍລະກົດ ປີ 2009 ນັ້ນ ໄດ້ຖືກປ່ອຍຕົວໃນວັນພຸດແລ້ວນີ້ ຫຼັງຈາກທີ່ທາງປະເທດ Oman ໄດ້ຈ່າຍເງິນປະກັນຕົວຈໍານວນ 1 ລ້ານໂດລ່າ ໃຫ້ທາງອິຣ່ານ. ສ່ວນນາງ Sarah ນັ້ນແມ່ນໄດ້ປະກັນອອກໄປ 5 ແສນໂດລ່າ ໃນປີແລ້ວນີ້.
ໃນການຖະແຫລງຂ່າວທີ່ນະຄອນນິວຢອກໃນວັນອາທິດວານນີ້ ນາຍ Fattal ແລະນາຍ Bauer ກ່າວວ່າ ພວກເຂົາເຈົ້າຖືກຈັບໄວ້ເປັນຕົວປະກັນ ກໍຍ້ອນ ການຜິດຖຽງກັນທາງການເມືອງຂອງອິຣ່ານ ກັບສະຫະລັດນັ້ນ.
ນາຍ Fattal ກ່າວວ່າ ລາວກັບນາຍ Bauer ເກືອບວ່າໄດ້ຖືກຂັງດ່ຽວ ຢູ່ຕະຫລອດ ເວລາ ແລະວ່າພວກຕົນຕ້ອງອົດອາຫານປະທ້ວງຢູ່ເລື້ອຍໆ ພຽງເພື່ອໃຫ້ໄດ້ຮັບຈົດໝາຍຈາກຄອບຄົວ. ລາວຍັງກ່າວອີກວ່າ ໃນຫຼາຍໆຄັ້ງ ລາວໄດ້ຍິນສຽງຮ້ອງດັ່ງລັ່ນ ຈາກພວກນັກໂທດຄົນອື່ນໆ ທີ່ຖືກທຸບຕີທາລຸນນັ້ນ ແຕ່ລາວບໍ່ໄດ້ເວົ້າວ່າ ພວກເຂົ້າເຈົ້າໄດ້ຮັບຊະຕາກໍາແບບດຽວກັນນີ້ ຫຼືບໍ່.
