ກະຊວງຕ່າງປະເທດອິຣ່ານກ່າວວ່າ ພວກເດີນປ່າຊາວ ອາເມຣິກັນສາມຄົນທີ່ຖືກຈັບແລະກັກຂັງໄວ້ໃນອິຣ່ານ ໃນລະຫວ່າງປີຜ່ານມານີ້ ຄວນຈະຖືກດຳເນີນຄະດີ.
ນາຍ ຣາມິນ ເມຫະມານປາຣາສ ໂຄສົກກະຊວງຕ່າງ ປະເທດຂອງ ອິຣ່ານກ່າວເມື່ອວັນອາທິດມື້ນີ້ວ່າ ມີ ຫລັກຖານພຽງພໍທີ່ວ່າ ນາຍ Shane Bauer, ນາງ Sarah Shourd ແລະນາຍ Josh Fattal ໄດ້ເຂົ້າ ປະເທດຢ່າງຜິດກົດໝາຍ.
ທາງການອິຣ່ານໄດ້ກ່າວເປັນໃນໆວ່າ ພວກເດີນປ່າ ອາເມຣິກັນສາມຄົນນັ້ນ ແມ່ນມີເຈດຕະນາທີ່ຈະປະຕິບັດການກໍ່ວິນາດສະກຳ ຕໍ່ຕ້ານອິຣ່ານ ແຕ່ກໍບໍ່ໄດ້ມີການຕັ້ງຂໍ້ຫາໃດໆຕໍ່ພວກເຂົາເຈົ້າ ເຖິງແມ່ນໄດ້ມີການສອບປາກສອບຄຳຢ່າງ ຂຸ້ນຂ້ຽວກໍຕາມ ແຕ່ທາງການສະຫະລັດແລະຄອບຄົວຂອງພວກກ່ຽວກ່າວ ວ່າພວກເຂົາເຈົ້າ ບໍ່ມີຄວາມຜິດ.
ປະທານາທິບໍດີ ບາຣັກ ໂອບາມາ ໄດ້ຮຽກຮ້ອງໄປຍັງກຸງເຕຫະຣ່ານ ເມື່ອວັນສຸກຜ່ານມາ ຂໍໃຫ້ປ່ອຍ ພວກເດີນປ່າຊາວອາເມຣິກັນສາມ ຄົນນັ້ນໂດຍທັນທີ ຊຶ່ງທ່ານໂອບາມາກ່າວ ວ່າການກັກຂັງເຂົາເຈົ້າຢ່າງບໍ່ຍຸຕິທໍານັ້ນ ບໍ່ໄດ້ກ່ຽວກັບບັນຫາຕ່າງໆ ທີ່ສືບຕໍ່ແບ່ງແຍກ ປະຊາຄົມນາໆຊາດຈາກອິຣ່ານນັ້ນເລີຍ. ວັນສຸກຜ່ານມານີ້ເປັນຂີດໝາຍຄົບນຶ່ງປີ ທີ່ພວກ ເດີນປ່າຊາວໜຸ່ມອາເມຣິກັນສາມຄົນນີ້ຖືກຈັບຢູ່ໃນເຂດ ຊາຍແດນອິຣ່ານທີ່ຕິດກັບອີຣັກນັ້ນ.