ອີຣ່ານກ່າວວ່າ ຕົນພ້ອມແລ້ວທີ່ຈະສຶກສາເບິ່ງຂໍ້ກ່າວຫາຂອງສະຫະລັດກ່ຽວກັບການ
ວາງແຜນລອບສັງຫານເອກອັກຄະລັດຖະທູດຊາອູດີອາເຣເບຍ ປະຈໍາສະຫະລັດນັ້ນ.
ອົງການຂ່າວ IRNA ຂອງລັດຖະບານອີຣ່ານກ່າວໃນວັນຈັນມື້ນີ້ວ່າ ລັດຖະມົນຕີການ
ຕ່າງປະເທດອີຣ່ານ ທ່ານ Ali-Akbar Salehi ໄດ້ ຮຽກຮ້ອງໃຫ້ສະຫະລັດນໍາສະເໜີ
ຕໍ່ອີຣ່ານ ເອກກະສານໃດໆທີ່ສະຫະລັດມີ ກ່ຽວກັບກໍລະນີດັ່ງກ່າວ.
ອີຣ່ານໄດ້ປະຕິເສດຕໍ່ຂໍ້ກ່າວຫາ ແລະທ່ານ Ayatollah Ali Khamenei ຜູ້ນໍາສູງສຸດ
ຂອງອີຣ່ານ ໄດ້ກ່າວໃນວັນອາທິດວານນີ້ວ່າ ການເຄື່ອນໄຫວ ທີ່ບໍ່ເໝາະສົມໃດໆ
ທີ່ພົວພັນກັບການເມືອງແລະຄວາມປອດໄພ ໂດຍຝ່າຍສະຫະລັດກ່ຽວກັບເລື້ອງນີ້
ແມ່ນຈະໄດ້ຮັບການຕອບໂຕ້ຢ່າງເດັດຂາດຈາກອີຣ່ານ.
ທ່ານກ່າວຕໍ່ໄປວ່າ ການກ່າວຫາຂອງສະຫະລັດເປັນຄວາມພະຍາຍາມ ອັນນຶ່ງເພື່ອ
ຫັນເຫຄວາມສົນໃຈອອກຈາກບັນຫາການເງິນແລະການປະທ້ວງໃນປະເທດຂອງຕົນ.
ໃນເຊົ້າວັນອາທິດວານນີ້ ປະທານາທິບໍດີ Mahmoud Ahmadinejad ແຫ່ງອີຣ່ານ
ກ່າວວ່າ ປະຊາຊົນອີຣ່ານມີຄວາມຈະເລີນສີວິໄລ ແລະບໍ່ຈໍາເປັນຕ້ອງຫັນໄປອາໄສ
ການລອບສັງຫານ.
ທ່ານນາງ Diane Feinstein ຫົວໜ້າຄະນະກໍາມາທິການດ້ານຂ່າວລັບປະຈໍາສະພາ
ສູງສະຫະລັດ ກ່າວຕໍ່ຕາໜ່າງຂ່າວໂທລະພາບ Fox News ໃນວັນອາທິດວານນີ້ວ່າ
ທາງການສະຫະລັດໄດ້ເກັບກໍາຫລັກຖານທີ່ແຈ້ງຂາວຢ່າງຫລວງຫລາຍ ທີ່ສະແດງ
ໃຫ້ເຫັນເຖິງການພົວພັນຂອງກອງກໍາລັງ Quds ຫົວກະທິຂອງອີຣ່ານ ໃນການວາງ
ແຜນລອບສັງຫານດັ່ງກ່າວ.
