ລັດຖະມົນຕີກະຊວງນ້ຳມັນຂອງອີຣ່ານ ກ່າວໃນວັນອາທິດນີ້ວ່າ ເຕຫະຣ່ານ (Tehran) ຈະ “ດຳເນີນການຕາມສິດຂອງຕົນ” ໃນແຫຼ່ງອາຍແກັສທີ່ມີການຂັດແຍ້ງກັນ ທີ່ຊາອຸດີ ອາຣາເບຍ (Saudi Arabia) ແລະ ຄູເວດ (Kuwait) ກໍ່ອ້າງສິດເຊັ່ນກັນ ຖ້າການເຈລະຈາບໍ່ສຳເລັດ, ອີງຕາມການລາຍງານຂອງ ສຳນັກຂ່າວຂອງກະຊວງດັ່ງກ່າວ.
ເຂດນອກຝັ່ງທະເລຂອງອ່າວທີ່ອຸດົມສົມບູນໄປດ້ວຍຊັບພະຍາກອນ ຊຶ່ງຮູ້ຈັກ ກັນໃນຊື່ ອາຣັຊ (Arash) ໃນອີຣ່ານແລະ ດໍຣ໌ຣາ (Dorra) ໃນ ຄູເວດ (Kuwait) ແລະ ຊາອຸດີ ອາຣາເບຍ (Saudi Arabia), ໄດ້ເປັນຈຸດສຳຄັນ ຂອງການຂັດແຍ້ງລະຫວ່າງສາມປະເທດມາເປັນເວລາດົນນານ.
"ອີຣ່ານຈະດຳເນີນການຕາມສິດ ແລະຜົນປະໂຫຍດຂອງຕົນ ກ່ຽວກັບການສຳຫຼວດ ແລະຂຸດຄົ້ນ" ຂົງເຂດດັ່ງກ່າວ "ຖ້າບໍ່ມີຄວາມປາຖະໜາທີ່ຈະທຳຄວາມເຂົ້າໃຈ ແລະ ການຮ່ວມມືກັນ," ທ່ານ ຈາວາດ ໂອຈິ (Javad Owji) ລັດຖະມົນຕີກະຊວງນ້ຳມັນອີຣ່ານ ຖືກອ້າງອີງຢູ່ໃນຖະແຫຼງການຂອງອົງການຂ່າວ ຊານາ (Shana) ຂອງທາງການ.
ທ່ານກ່າວວ່າ ເຕຫະຣ່ານ (Tehran) ໄດ້ສະແຫວງຫາ "ເສັ້ນທາງຂອງການເຈລະຈາ ແລະຄວາມເຂົ້າໃຈກັບເພື່ອນບ້ານຂອງພວກເຮົາ," ອີງຕາມອົງ ການຂ່າວຊານາ (Shana).
"ອີຣ່ານຈະບໍ່ຍອມໃຫ້ມີການລະເມີດສິດໃດໆຂອງຕົນ" ທ່ານ ໂອຈິ (Owji) ໄດ້ກ່າວຕື່ມ.