ອົງການເຝົ້າລະວັງດ້ານນິວເຄລຍຂອງອົງການສະຫະປະຊາຊາດ ກ່າວໃນວັນຈັນວານນີ້ວ່າ ອີຣ່ານໄດ້ສະສົມທາດຢູເຣນຽມທີ່ກັ່ນຕ້ອງເປັນຢ່າງສູງ ຫຼາຍຂຶ້ນ ກວ່າເກົ່າ ໂດຍໄດ້ເພີ່ມຄັງສະສົມຂອງຕົນຂຶ້ນສູ່ລະດັບໃກ້ກັບລະດັບອາວຸດ.
ບົດລາຍງານທີ່ເຫັນໂດຍອົງການຂ່າວ AP ກ່າວວ່າ ການສະໜອງທາດຢູເຣນຽມທີ່ກັ່ນແລ້ວຂອງອີຣ່ານມີຈຳນວນຫຼາຍກວ່າ 30 ເທົ່າ ຂອງຈຳນວນທີ່ໄດ້ຕົກລົງໄວ້ ໃນຂໍ້ຕົກລົງປີ 2015 ລະຫວ່າງເຕຫະຣ່ານ ແລະບັນດາປະເທດມະຫາອຳນາດໂລກ ເພື່ອຈຳກັດໂຄງການນິວເຄຼຍຂອງອີຣ່ານ.
ຄັງເກັບທາດຢູເຣນຽມທີ່ກັ່ນແລ້ວຂອງອີຣ່ານມີຫຼາຍກວ່າ 6,201.3 ກິໂລກຣາມ ຫຼື 13,671.5 ພາວ ເພີ່ມຂຶ້ນ 675.8 ກິໂລກຣາມ ຫຼື 1,489.8 ພາວ ນັບຕັ້ງແຕ່ບົດລາຍງານຫຼ້າສຸດໃນເດືອນກຸມພາທີ່ຜ່ານມາ ຂອງອົງການພະລັງງານປະລະມານູສາກົນ ຫຼື IAEA.
ທ່ານ ຣາຟາເອລ ກຣອສຊີ (Rafael Grossi), ຜູ້ອຳນວຍການ IAEA ແລະຫົວໜ້າອົງການເຝົ້າລະວັງນິວເຄລຍຂອງສະຫະປະຊາຊາດ ໄດ້ເຕືອນເມື່ອເດືອນແລ້ວນີ້ວ່າ ອີຣ່ານ ມີທາດຢູເຣນຽມທີ່ກັ່ນຕອງສູງ ພຽງພໍສຳລັບລະເບີດນິວເຄລຍ “ຫຼາຍລູກ” ຖ້າຫາກເລືອກທີ່ຈະສ້າງມັນຂຶ້ນມາ.
"ລະດັບການກວດກາ [ໃນອີຣ່ານ] ບໍ່ໄດ້ຢູ່ໃນລະດັບທີ່ພວກເຮົາຄວນຈະມີ," ທ່ານບອກກັບໂທລະພາບ Sky News ໃນເດືອນເມສາ.
ເຈົ້າໜ້າທີ່ອີຣ່ານ ໄດ້ຂົ່ມຂູ່ວ່າພວກເຂົາເຈົ້າສາມາດດຳເນີນການຜະລິດອາວຸດປະລະມານູ. ອີຣ່ານ ໄດ້ກ່າວວ່າໂຄງການນິວເຄລຍຂອງຕົນແມ່ນສະຫງົບສຸກ.
ສະຫະປະຊາຊາດ ແລະ ອີຣ່ານ ຍັງບໍ່ໄດ້ບັນລຸຂໍ້ຕົກລົງກ່ຽວກັບຂໍ້ຕົກລົງປີ 2023 ກ່ຽວກັບການຂະຫຍາຍການກວດກາໂຄງການນິວເຄຼຍຂອງສາທາລະນະລັດອິສລາມ.
ຟໍຣັມສະແດງຄວາມຄິດເຫັນ