ປະທານາທິບໍດີອີຣ່ານ ກ່າວວ່າ ຂໍ້ຕົກລົງນິວເຄລຍຂັ້ນສຸດທ້າຍ
ລະຫວ່າງ Tehran ແລະບັນດາປະເທດມະຫາອຳນາດ ແມ່ນ
“ຢູ່ພຽງ ເອື້ອມມື” ໃນເດືອນນີ້ ຖ້າຫາກວ່າ ບໍ່ມີບັນຫາໃໝ່
ເກີດຂຶ້ນ ໃນສອງສາມມື້ຂ້າງໜ້ານີ້.
ໃນການກ່າວຖະແຫລງຕໍ່ບັນດານັກຂ່າວ ຢູ່ທີ່ນະຄອນ Tehran
ໃນວັນເສົາວານນີ້ ປະທານາທິບໍດີ Hasan Rouhani ກ່າວວ່າ
ການເຈລະຈາ ທີ່ດຳເນີນມາເປັນເວລາດົນນານນັ້ນ ແມ່ນກຳລັງ
ມີຄວາມຄືບໜ້າ ໃນຂະນະທີ່ ວັນທີ 30 ມີຖຸນາ ຊຶ່ງເປັນເສັ້ນຕາຍ
ເພື່ອໃຫ້ມີຂໍ້ຕົກລົງຂັ້ນສຸດທ້າຍ ໃກ້ເຂົ້າມາແລ້ວ ແຕ່ບັນຫາບາງ
ສ່ວນ ແມ່ນຍັງຄ້າງຄາຢູ່.
ທ່ານ Rouhani ເວົ້າວ່າ “ບັນດານັກເຈລະຈາຂອງພວກເຮົາ ແມ່ນເຄື່ອນໄຫວ ຢ່າງ
ເອົາຈິງເອົາຈັງໄປຕາມເສັ້ນທາງ ແລະ ຖ້າອີກຝ່າຍນຶ່ງນັ້ນ ຍັງປະຕິບັດຕາມ ຂອບ
ຂໍ້ຕົກລົງນີ້ ແລະ ນັບຖືສິດຂອງປະເທດອີຣ່ານ ແລະ ປະໂຫຍດຕ່າງໆຂອງປະເທດ
ພວກເຮົາ ແລະ ບໍ່ຫາທາງຕັ້ງຂໍ້ຮຽກຮ້ອງຫຼາຍເກີນໄປ ຂ້າພະເຈົ້າຄິດວ່າ ຂໍ້ຕົກລົງ
ແມ່ນຢູ່ພຽງເອື້ອມມືທີ່ຈະຄວ້າເອົາມາໄດ້.”
ອີງຕາມບັນຫາສຳຄັນອັນນຶ່ງ ທີ່ສະຫະລັດ ແລະ ພັນທະມິດຢູໂຣບ ໄດ້ເນັ້ນໜັກໃສ່ ແມ່ນ
ການກວດສອບ ສະຖານທີ່ນິວເຄລຍຕ່າງໆ ຂອງອີຣ່ານ ຊຶ່ງທ່ານ Rouhani ກ່າວວ່າ
ອີຣ່ານ ຈະບໍ່ອະນຸຍາດໃຫ້ກວດກາ ທີ່ອາດຈະເຮັດໃຫ້ຂໍ້ມູນລັບຂອງປະເທດ ຕົກຢູ່ໃນ
ອັນຕະລາຍ ນັ້ນ.
ບັນດາປະເທດມະຫາອຳນາດຂອງໂລກ ທີ່ພວມຊອກຫາຊ່ອງທາງເພື່ອ ໃຫ້ບັນລຸຂໍ້ຕົກລົງ
ກ່ຽວກັບໂຄງການພັດທະນານິວເຄລຍ ຂອງອີຣ່ານ ປະກອບມີ ສະຫະລັດ ຣັດເຊຍ ຈີນ
ອັງກິດ ຝຣັ່ງ ແລະເຢຍຣະມັນ. ເພື່ອເປັນການແລກປ່ຽນໃນການຈຳກັດການພັດທະນາ
ນິວເຄລຍ ໃນອະນາຄົດຂອງຕົນນັ້ນ ອີຣ່ານ ຄາດຫວັງວ່າ ນາໆຊາດຈະຍົກເລີກມາດຕະການລົງໂທດຕ່າງໆ ທີ່ໄດ້ເຮັດໃຫ້ເສດຖະກິດຂອງອີຣ່ານປະສົບ ບັນຫາ.
