ໂທລະພາບແຫ່ງລັດຂອງອິຣ່ານກ່າວວ່າ ພວກນັກເຄື່ອນ
ໄຫວຝ່າຍຄ້ານແລະພວກຈົງຮັກພັກດີຕໍ່ລັດຖະບານໄດ້
ທໍາການຕໍ່ສູ້ກັນໃນພິທີໄວ້ອາໄລແຫ່ງນຶ່ງ ໃຫ້ແກ່ນັກສຶກ
ສາຄົນນຶ່ງທີ່ໄດ້ເສຍຊີວິດໄປໃນລະຫວ່າງການປະທ້ວງຕໍ່
ຕ້ານລັດຖະບານໃນກຸງເຕຮະຣ່ານໃນຕົ້ນສັບປະດານີ້.
ໂທລະພາບແຫ່ງລັດເວົ້າວ່າ ພວກກຸ່ມທີ່ເປັນປໍລະປັກໄດ້
ປະທະກັນໃນວັນພຸດມື້ນີ້ ທີ່ສະຖາບັນສິນລະປະມະຫາ
ວິທະຍາໄລກຸງເຕຮະຣ່ານ ບ່ອນທີ່ກຳລັງມີພິທີໄວ້ອາໄລ
ໃຫ້ແກ່ທ້າວ Sanee Zhaleh ນັກສຶກສາຢູ່ທີນັ້ນ. ກຸ່ມ
ຝ່າຍຄ້ານແລະລັດຖະບານຂອງອິຣ່ານຕ່າງກໍກ່າວຫາ
ຊຶ່ງກັນແລະກັນວ່າ ເປັນຜູ້ສັງຫານທ້າວ Zhaleh.
ນັກສຶກສາຄົນນີ້ ເປັນນຶ່ງໃນບັນດາຜູ້ເສຍຊີວິດໄປ 2 ຄົນໃນວັນຈັນຜ່ານມານີ້ ໃນຂະນະທີ່ພວກເຈົ້າໜ້າທີ່ຕໍາຫລວດອິຣ່ານຂັບໄລ່ໃຫ້ພວກນັກເຄື່ອນໄຫວຊາວອິຣ່ານຫລາຍພັນຄົນແຕກສະຫລາຍໂຕໄປທີ່ພາກັນເດີນຂະບວນປະທ້ວງໃນຫລາຍຫົວເມືອງ ອັນເປັນການປະທ້ວງຕໍ່ຕ້ານລັດຖະບານຄັ້ງໃຫຍ່ທີ່ສຸດນັບແຕ່ປີ 2009 ເປັນຕົ້ນມາ.
ລາຍງານຂ່າວໂທລະພາບແຫ່ງລັດຂອງອິຣ່ານກ່າວວ່າ ພວກຈົງຮັກພັກດີຕໍ່ລັດຖະບານໄດ້ຂັບໄລ່ໃຫ້ພວກນັກເຄື່ອນໄຫວຝ່າຍຄ້ານອອກຈາກບ່ອນທໍາພິທີໄວ້ອາໄລໄປ ໂດຍພາກັນໂຮຮ້ອງຄໍາຂວັນຕ່າງໆຮຽກຮ້ອງໃຫ້ພວກກໍ່ຄວາມວຸ້ນວາຍຈົ່ງພິນາດ.
ຜູ້ນໍາຫົວປະຕິຮູບອິຣ່ານຄົນນຶ່ງທີ່ຈັດແຈງການປະທ້ວງຂຶ້ນໃນວັນຈັນຜ່ານມານີ້ກ່າວວ່າ ທ່ານບໍ່ຢ້ານຄໍາຮຽກຮ້ອງຕ່າງໆຂອງພວກສະມາຊິກສະພານິຕິບັນຍັດນິຍົມແນວທາງເດີມທີ່ຢາກໃຫ້ທ່ານປະເຊີນກັບການລົງໂທດປະຫານຊີວິດນັ້ນ.ໃນຖະແຫລງການສະບັບນຶ່ງທາງ website ຂອງທ່ານໃນວັນພຸດມື້ນີ້ ທ່ານ Mehdi Karroubi ກ່າວວ່າ ທ່ານເຕັມໃຈທີ່ຈະປະເຊີນກັບເຫດການໃດໆກໍຕາມ ເພື່ອນໍາມາຊຶ່ງການປ່ຽນແປງດ້ານການເມືອງໃນອີຣ່ານນັ້ນ.
ກໍາລັງຮັກສາຄວາມປອດໄພຂອງອິຣ່ານປົກປ້ອງບໍ່ໃຫ້ທ່ານ Karroubi ແລະເພື່ອນຮ່ວມງານຈັດແຈງການປະທ້ວງຂຶ້ນອີກທ່ານນຶ່ງຄື ທ່ານ Mir Hossein Mousavi ເຂົ້າຮ່ວມໃນການຊຸມນຸມປະທ້ວງ ທີ່ພວກເຂົາເຈົ້າໄດ້ຮຽກຮ້ອງໃຫ້ມີຂຶ້ນເພື່ອສະແດງເຖິງຄວາມເປັນເອກກະພາບກັນກັບການລຸກຮືຂຶ້ນຕໍ່ຕ້ານພວກຜູ້ນໍາແບບຜະເດັດການຫວ່າງໄວໆມານີ້ທີ່ປະເທດ ອີຈິບແລະຕູນີເຊຍນັ້ນ.
ພວກສະມາຊິກສະພານິຍົມແນວທາງເດີມ 223 ທ່ານໄດ້ອອກຖະແຫລງການສະບັບນຶ່ງໃນວັນອັງຄານວານນີ້ ຮຽກຮອງໃຫ້ຜູ້ນໍາຝ່າຍຄ້ານທັງສອງທ່ານນີ້ ຖືກດໍາເນີນຄະດີໃນຂໍ້ຫາຖານກໍ່ຄວາມວຸ້ນວານຂຶ້ນ ອັນເປັນໂທດເຖິງຂັ້ນປະຫານຊີວິດໄດ້ນັ້ນ. ປະທານາທິບໍດີ Mahmoud Ahmadinejad ແຫ່ງອິຣ່ານໃຫ້ຄໍາໝັ້ນສັນຍາວ່າ ພວກຈັດແຈງການປະທ້ວງຈະບໍ່ບັນລຸເປົ້າໝາຍຂອງພວກເຂົາເຈົ້າ ແລະທໍານາຍວ່າພວກເຂົາເຈົ້າຈະເຫັນ" ຂີ້ດິນກັບຄືນມາຖົມໜ້າເຂົາເຈົ້າ.”
