ບັນດາສະມາຊິກສະພາແຫ່ງຊາດອິຣ່ານ ຮຽກຮ້ອງໃຫ້ລົງໂທດປະຫານຊີວິດພວກຜູ້ນໍາຝ່າຍຄ້ານ ໃນຂໍ້ຫາຈັດແຈງການໂຮມຊຸມນຸມຕໍ່ຕ້ານລັດຖະບານຂຶ້ນໃນຫລາຍຫົວເມືອງຂອງອິຣ່ານ ໃນວັນຈັນວານນີ້.
ພວກຜູ້ແທນນິຍົມແນວທາງເດີມກ່າວໃນວັນອັງຄານມື້ນີ້ວ່າ ພວກຜູ້ນໍາຝ່າຍຄ້ານ ຄື ທ່ານ Mir Hossein Mousavi ແລະ ທ່ານ Mehdi Karroubi ນັ້ນ ຄວນຈະຖືກດໍາເນີນຄະດີ ໃນຖານປຸກປັ່ນໃຫ້ກໍ່ກະບົດ ອັນເປັນຄວາມຜິດທີ່ເຖິງໂທດຂັ້ນປະຫານຊີວິດນັ້ນ. ນັກເຄື່ອນໄຫວຫົວ ປະຕິຮູບ 2 ທ່ານນີ້ ໄດ້ຮຽກຮ້ອງໃຫ້ທໍາການໂຮມຊຸມນຸມປະທ້ວງຂຶ້ນໃນກຸງເຕຮະຣ່ານແລະເມືອງອື່ນໆ ເພື່ອສະແດງຄວາມເປັນເອກະພາບກັບການລຸກຮື້ຂຶ້ນເມື່ອໄວໆມານີ້ ຕໍ່ຕ້ານພວກລັດຖະບານຜະເດັດການຕ່າງໆໃນໂລກອາຫຣັບນັ້ນ.
Website ຂອງທ່ານ Mousavi ກ່າວວ່າ ຕົນມີລາຍງານຂ່າວທີ່ບໍ່ໄດ້ຮັບການຢືນຢັນ ທີ່ວ່າພວກກໍາລັງຮັກສາຄວາມປອດໄພໄດ້ຈັບກຸມຜູ້ຄົນຫລາຍຮ້ອຍຄົນໃນລະຫວ່າງການເດີນປະທ້ວງໃນວັນຈັນວານນີ້ ຊຶ່ງໄດ້ດຶງດູດເອົາພວກນັກເຄື່ອນໄຫວຫລາຍພັນຄົນ ມາຮ່ວມປະທ້ວງຕາມຖະໜົນຫົນທາງສາຍຕ່າງໆໃນນະຄອນຫລວງຂອງປະເທດ ໃນການ ຝ່າຝືນຕໍ່ຄໍາສັ່ງຫ້າມຂອງລັດຖະບານນັ້ນ.
ທ່ານ Ahmad Reza Radan ຮອງຫົວໜ້າຕໍາຫລວດກ່າວວ່າ ພວກເຈົ້າໜ້າທີ່ໄດ້ຈັບກຸມພວກປະທ້ວງ ແຕ່ບໍ່ບອກວ່າຈັກຄົນ. ທ່ານຍັງກ່າວຕື່ມວ່າ ກຸ່ມຝ່າຍຄ້ານທີ່ຖືກຫ້າມກຸ່ມນຶ່ງໄດ້ເຂົ້າຮ່ວມໃນການຊຸມນຸມປະທ້ວງ ແລະໄດ້ເປີດສາກຍິງປືນໃສ່ຕໍາຫລວດ ເຮັດໃຫ້ຜູ້ຄົນຢືນເບິ່ງເຫດການຄົນນຶ່ງເສຍຊີວິດ ແລະເຈົ້າໜ້າທີ່ຮັກສາຄວາມປອດໄພ 9 ຄົນໄດ້ຮັບບາດເຈັບ. ບໍ່ມີການຢືນຢັນຈາກແຫລ່ງຂ່າວອື່ນທີ່ເປັນອິດສະລະ ກ່ຽວກັບເຫດການດັ່ງກ່າວ.
ພວກທີ່ເຫັນການປະທ້ວງກ່າວວ່າ ກໍາລັງຮັກສາຄວາມປອດໄພໄດ້ຍິງແກສນໍ້າຕາແລະປືນສີດນໍ້າສີ ເພື່ອຂັບໄລ່ພວກປະທ້ວງໃຫ້ແຕກໜີໄປ. ພວກປະທ້ວງບາງຄົນພາກັນຮ້ອງໂຮຄໍາຂັວນຕ່າງໆ ທີ່ສົມທຽບພວກຜູ້ນໍາອິຣ່ານໃສ່ພວກຜູ້ນໍາຜະເດັດການຊາວອາຫຣັບ ທີ່ຖືກໂຄ່ນລົ້ມຈາກຕໍາແໜ່ງໂດຍການລຸກຮື້ຂຶ້ນຂອງປະຊາຊົນ ໃນອີຈິບແລະຕູນີເຊຍນັ້ນ.
ທ່ານ Ali Larijani ປະທານສະພາແຫ່ງຊາດຂອງອິຣ່ານກ່າວຫາສະຫະລັດອະເມຣິກາແລະພວກພັນທະມິດຂອງສະຫະລັດວ່າ ໃຊ້ຂະບວນການຝ່າຍຄ້ານຂອງອິຣ່ານ ເປັນເຄື່ອງມືເພື່ອຍຸຍົງສົ່ງເສີມໃຫ້ກໍ່ຄວາມວຸ້ນວາຍຂຶ້ນ.
