ອີຣ່ານ ແລະຫົກປະເທດມະຫາອໍານາດ ໄດ້ຕົກລົງທີ່ຈະເປີດການເຈລະຈາກັນອີກ
ຮອບໃໝ່ທີ່ກຸງມົສກູ ໃນເດືອນໜ້ານີ້ເພື່ອພະຍາຍາມຫາທາງແກ້ໄຂຄວາມເປັນຫ່ວງ
ກ່ຽວກັບໂຄງການນີວເຄລຍຂອງອີຣ່ານ ຫລັງຈາກໄດ້ມີການສົນທະນາກັນທີ່ກຸງ
ແບັກແດດ ທີ່ໄດ້ບັນລຸຜົນສຳ ເລັດເປັນບາງຢ່າງນັ້ນ.
ທັງສອງຝ່າຍຈະພົບປະກັນທີ່ນະຄອນຫລວງຂອງຣັດເຊຍໃນວັນທີ່ 18 ແລະ 19
ເດືອນມິຖຸນາ. ຫົວໜ້ານະໂຍບາຍຕ່າງປະເທດຂອງສະຫະພາບຢູໂຣບ ທ່ານນາງ
Catherine Ashton ກ່າວວ່າ ການປະຊຸມນີ້ ຈະຖືກນໍາໃຊ້ເພື່ອເສີມຂະຫຍາຍ
ຂໍ້ຄິດເຫັນທີ່ມີແບບດຽວກັນ.
ທ່ານນາງ Ashton ກ່າວວ່າ ການສົນທະນາທີ່ກຸງແບັກແດດໄດ້ດຳເນີນໄປ “ຢ່າງ
ຂຸ້ນຂ້ຽວ.” ທ່ານນາງໃຫ້ຄວາມເຫັນດັ່ງກ່າວໃນວັນພະຫັດວານນີ້ ໃນຕອນທ້າຍ
ຂອງກອງປະຊຸມເປັນເວລາສອງວັນ ທີ່ທ່ານນາງໄດ້ເປັນຜູ້ຕາງໜ້າຫົກປະເທດ
ມະຫາອໍານາດ. ທ່ານນາງຍັງກ່າວວ່າ ອີຣ່ານໄດ້ປະກາດວ່າ ຕົນ “ພ້ອມແລ້ວ” ທີ່
ຈະແກ້ໄຂຄວາມເປັນຫ່່ວງກົງວົນຂອງນາໆຊາດ ກ່ຽວກັບການກັ່ນທາດ uranium
ຂອງເຕຫະຣ່ານເພື່ອໃຫ້ມີຄວາມບໍຣິສຸດ ເຖິງ 20 ເປີເຊັນ.
ບັນດາປະເທດມະຫາອໍານາດຕາເວັນຕົກມີຄວາມຢ້ານກົວວ່າ ອີຣ່ານອາດຈະຍົກ
ລະດັບການກັ່ນທາດ uranium ໃຫ້ບໍລິສຸດຂື້ນຢ່າງວ່ອງໄວເຖິງ 90 ເປີເຊັນ ທີ່
ຈຳເປັນສຳຫຼັບສ້າງອາວຸດນີວເຄລຍນັ້ນ.
ແຕ່ເຖິງຢ່າງໃດກໍດີ ອີຣ່ານກ່າວວ່າ ຕົນຕ້ອງການຢາກໃຫ້ນາໆຊາດໂຍະຍານຜ່ອນຜັນ
ການລົງໂທດ ເພື່ອເປັນການແລກປ່ຽນກ່ຽວກັບການອ່ອນຂໍ້ໃນການກັ່ນທາດ uranium
ທີ່ອີຣ່ານເວົ້າ ໃຊ້ສຳຫຼັບການຄົ້ນຄວ້າດ້ານການແພດ ແລະການຜະລິດກະແສໄຟຟ້າ.
ຫົວໜ້າເຈຣະຈາຂອງອີຣ່ານ ທ່ານ Saeed Jalili ໄດ້ເນັ້ນໜັກໃນອັນ ທີ່ທ່ານຮ້ອງວ່າ
“ມັນເປັນສິດທິທີ່ຖືກຕ້ອງຊອບທຳ” ຂອງອີຣ່ານ ໃນ ການກັ່ນທາດ uranium ເພື່ອຈຸດ
ປະສົງໃນທາງສັນຕິ. ທ່ານໄດ້ກ່າວຕໍ່ ບັນດານັກຂ່າວວ່າ ການສົນທະນາກັນທີ່ກຸງແບັກ
ແດດໄດ້ມີ “ລາຍລະ ອຽດ ແຕ່ວ່າຍັງບໍ່ທັນເປັນທີ່ຮຽບຮ້ອຍເທື່ອ.”
ນັກວິເຄາະ ທ່ານ Micheal Adler ຜູ້ທີ່ຂຽນປື້ມກ່ຽວກັບວິກິດການນີວເຄລຍຂອງ
ອີຣ່ານ ໄດ້ບອກແກ່ ວີໂອເອວ່າ ການສົນທະນາກັນທີ່ກຸງແບັກແດັດນັ້ນ ກໍເພື່ອໃຫ້
ເປັນການ “ສ້າງຄວາມລື້ງເຄີຍກັນ” ລະຫວ່າງສອງກໍ້າສອງຝ່າຍ ແລະເນື້ອໃນໃຈຄວາມ
ທີ່ສຳຄັນຂອງບັນຫາແທ້ໆນັ້ນ ຈະໄດ້ອະພິປາຍກັນ ຢູ່ທີ່ກຸງມົສກູ.