ປະທານາທິບໍດີ ອີຣ່ານ ທ່ານ MAHMOUD AHMADINEJAD ກ່າວວ່າ ປະເທດຂອງທ່ານ ເຕັມໃຈ ທີ່ຈະເປີດ ການເຈລະຈາ ຄືນໃໝ່ ກັບພວກປະເທດ ຕາເວັນຕົກ ກ່ຽວກັບ ໂຄງການນິວເຄລຍຂອງຕົນ ຖ້າເງື່ອນໄຂບາງຂໍ້ ຫາກໄດ້ຮັບການສະໜອງຕອບ.
ທ່ານ AHMADINEJAD ໃຫ້ທັດສະນະ ດັ່ງກ່າວ ໃນລະຫວ່າງ ຄຳປາໄສ ທາງໂທລະພາບ ໃນວັນພຸດມື້ນີ້ ທີ່ເມືອງ SHAHR-E-KORD.
ທ່ານເວົ້າວ່າ ອີຣ່ານ ຈະປະກາດ ເງື່ອນໄຂໃຫ້ຊາບ ໃນໄວໆນີ້ ແລະບັນດາປະເທດ ມະຫາອຳນາດ ຂອງໂລກ ຕ້ອງໄດ້ຮັບການສັ່ງສອນ ຍ້ອນໄດ້ທຳການ ລົງໂທດຄັ້ງໃໝ່ ຕໍ່ເຕຫະຣ່ານ ກ່ຽວກັບ ໂຄງການນິວເຄລຍ ທີ່ເປັນບັນຫາ ຖົກຖຽງໂຕ້ແຍ້ງກັນນັ້ນ.
ໃນສັບປະດາແລ້ວ ສະພາຄວາມໝັ້ນຄົງ ຂອງອົງການ ສະຫະປະຊາຊາດ ໄດ້ຮັບຜ່ານ ມະຕິການລົງໂທດ ຮອບທີ 4 ຕໍ່ອີຣ່ານ ຍ້ອນສືບຕໍ່ ຫາທາງຂົນຂວາຍ ເອົາເທັກໂນໂລຈີ ນິວເຄລຍ ແລະ ໃນມື້ວັນຈັນ ຜ່ານມານີ້ ສະຫະພາບຢູໂຣບ ກໍໄດ້ ໃຫ້ການອະນຸມັດ ຕໍ່ຮ່າງແຜນການ ກ່ຽວກັບ ການລົງໂທດເພີ້ມຕື່ມຕໍ່ອີຣ່ານ.
ບັນດາ ລັດຖະມົນຕີ ຂອງ EU ກ່າວວ່າ ການລົງໂທດ ເພີ້ມຕື່ມ ໃນເລື່ອງການຄ້າ ການໂອນເງິນ ແລະການຂົນສົ່ງ ສາມາດນຳໃຊ້ ພາຍໃນ ເດືອນໜ້ານີ້.
