ຄະນະເຈລະຈາຂອງອີຣ່ານແລະ 6 ປະເທດມະຫາອຳນາດທີ່ສຳຄັນຂອງໂລກ ປະຊຸມກັນ
ເປັນເທື່ອທຳອິດໃນຮອບນຶ່ງປີກວ່າໆເພື່ອສົນທະນາຫາລືກ່ຽວກັບໂຄງການນິວເຄລຍທີ່ເປັນ
ບັນຫາໂຕ້ແຍ່ງຂອງເຕຫະຣ່ານ.
ເຈົ້າໜ້າທີ່ເທີກີ ໃຫ້ການຢືນຢັນໃນວັນເສົາມື້ນີ້ວ່າ ການເຈລະຈາກຳລັງດຳເນີນຢູ່ ລະຫວ່າງ
ພວກນັກການທູດອີຣ່ານແລະຜູ້ຕາງໜ້າຂອງສະຫະລັດ ອັງກິດ ຝຣັ່ງ ຈີນ ເຢຍຣະມັນແລະ
ຣັດເຊຍ ຊຶ່ງຮູ້ກັນໃນນາມກຸ່ມ P5+1 ນັ້ນ.
ໄດ້ມີການຮັກສາຄວາມປອດໄພຢ່າງເຄັ່ງຄັດທີ່ນະຄອນອິສຕັນບູລ ສຳລັບກອງປະຊຸມທີ່ສຳ
ຄັນໃນຄັ້ງນີ້ແຕ່ພວກນັກການທູດຕາເວັນຕົກໄດ້ສະແດງໃຫ້ເຫັນຢ່າງໄວວາວ່າ ບໍ່ໄດ້ມີການ
ຄາດຫວັງຫຍັງໄວ້ຫຼາຍ. ພວກທ່ານກ່າວວ່າ ສິ່ງທີ່ຄາດຫວັງໄວ້ຫຼາຍທີ່ສຸດໃນການເຈລະຈາ
ຮອບນີ້ກໍຄືຈະພາໃຫ້ມີການເຈລະຈາຮອບໃໝ່ອີກ.
ທ່ານ Ben Rhodes ຮອງທີ່ປຶກສາດ້ານຄວາມໝັ້ນຄົງແຫ່ງຊາດຂອງສະຫະລັດເອີ້ນການ
ເຈລະຈາໃນຄັ້ງນີ້ວ່າ ເປັນບາດກ້າວທີ່ດີອັນທຳອິດ ຂະນະທີ່ພົບປະກັບພວກນັກຂ່າວໃນວັນ
ສຸກວານນີ້. ນອກນັ້ນທ່ານຍັງເວົ້າວ່າໜ້າທີ່ໃນການພິສູດແມ່ນຍັງເປັນຂອງຝ່າຍອີຣ່ານຍ້ອນ
ວ່າພວກເຂົາເຈົ້າເປັນຝ່າຍລ່ວງລະເມີດຕໍ່ຄວາມໝັ້ນໝາຍຕໍ່ນາໆຊາດຂອງພວກເຂົາເຈົ້າ.
ເຕຫະຣ່ານໄດ້ປະເຊີນ ກັບການລົງໂທດຂອງບັນດາປະເທດຕາເວັນຕົກ ກ່ຽວກັບການກ່າວ
ຫາວ່າ ອີຣ່ານພະຍາຍາມທີ່ຈະສ້າງອາວຸດນິວເຄລຍແຕ່ອີຣ່ານກ່າວວ່າ ໂຄງການນິວເຄລຍ
ຂອງຕົນມີຈຸດປະສົງເພື່ອນຳໃຊ້ໃນທາງສັນຕິ.
ໃນຕົ້ນອາທິດນີ້ ຫົວໜ້າເຈລະຈານິວເຄລຍຂອງອີຣ່ານກ່າວວ່າ ປະເທດຂອງທ່ານຈະນຳສະ
ເໜີຂໍ້ລິເລີ່ມໃໝ່ທີ່ບໍ່ໄດ້ລະບຸຊື່ຈຳນວນນຶ່ງໃນການເຈລະຈາຄັ້ງນີ້ແຕ່ກໍເຕືອນວ່າ ການດຳເນີນ
ຄວາມພະຍາຍາມຂອງປະເທດຕາເວັນຕົກທີ່ຈະທຳ ການກົດດັນຕໍ່ເຕຫະຣ່ານນັ້ນອາດຈະສົ່ງ
ຜົນໃນທາງກົງກັນຂ້າມ. ນອກນັ້ນທ່ານ Saeed Jalili ຍັງເວົ້າວ່າ ການດຳເນີນຄວາມພະ
ຍາຍາມທີ່ຈະສວຍໃຊ້ໃນອັນ ທີ່ທ່ານເອີ້ນວ່າ ພາສາທີ່ມີກຳລັງຕໍ່ອີຣ່ານນັ້ນຈະບໍ່ມີປະໂຫຍດ
ຫຍັງເລີຍ.