ລິ້ງ ສຳຫລັບເຂົ້າຫາ

ອີຣ່ານຈະບໍ່ເຈລະຈາກ່ຽວກັບ ໂຄງການນິວເຄລຍຂອງຕົນ

  • ໄພສານ ວໍຣະຈັກ

ປະທານາທິບໍດີອີຣ່ານກ່າວວ່າ ອີຣ່ານຈະບໍ່ທຳການເຈລະຈາ ກ່ຽວກັບໂຄງການ ນິວເຄລຍຂອງຕົນ ຈົນເທົ່າເດືອນສິງຫາ ເພື່ອເປັນການລົງໂທດຕໍ່ບັນດາປະເທດ ມະຫາອຳນາດຕາເວັນຕົກ ທີ່ໄດ້ລົງໂທດທາງດ້ານເສດຖະກິດຮອບໃໝ່ຕໍ່ອີຣ່ານນັ້ນ.

ທ່ານ MAHMOUD AHMADINEJAD ກ່າວໃນມື້ວັນ ຈັນວານນີ້ວ່າ ອົງການ ສະຫະປະຊາຊາດ ສະຫະລັດ ແລະສະຫະພາບຢູໂຣບ ຄວນຢຸດເຊົາການເອົາ ທ່າທີແບບຂົ່ມ​ເຫັງ ແລະຮວມເອົາບັນດາປະເທດອິສະລະ ​ເຂົ້າໃນການເຈລະຈາ ໃນອະຄົດຂ້າງໜ້ານຳ.

ທີ່ນະຄອນນິວຢອກ ຣັດເຊຍໄດ້ຮ້ອງທຸກ ຕໍ່ສະພາຄວາມໝັ້ນຄົງ ຂອງອົງການສະ ຫະປະຊາຊາດ ໃນມື້ວານນີ້ ກ່ຽວກັບການທີ່ເຢຍຣະມັນ ໄດ້ຢຶດອຸບປະກອນຈຳ ນວນນຶ່ງທີ່ສົ່ງໄປຍັງໂຮງໄຟຟ້ານິວເຄລຍ BUSHEHR ຂອງອີຣ່ານ ທີ່ຣັດເຊຍເປັນຜູ້ສ້າງ ນັ້ນ. ເອກອັກຄະລັດຖະ ທູດຂອງຣັດເຊຍປະຈຳອົງການສະຫະປະຊາ ຊາດ ທ່ານ VITALY CHURKIN ກ່າວຕໍ່ສະພາຄວາມໝັ້ນຄົງວ່າ ມັນເປັນສິ່ງ ທີ່ຮັບເອົາບໍ່ໄດ້ ທີ່ປະເທດທີ 3 ໄດ້ຢຶດເອົາສິ່ງຂອງທີ່​ສົ່ງໄປຍັງອີຣ່ານ ທີ່ໄດ້ຮັບ ການອະນຸຍາດ ພາຍໃຕ້ລະບຽບການຂອງສະຫະປະຊາຊາດໃນປັດຈຸບັນ.

ການລົງໂທດຂັ້ນຕົ້ນຂອງສະຫະປະຊາຊາດຕໍ່ອີຣ່ານ ທີ່ມີການຮັບຮອງເອົາໃນປີ 2006 ນັ້ນ ແມ່ນໄດ້ຍົກເວັ້ນເທັກໂນໂລຈີ ສຳລັບ ເຕົາແຍກນິວເຄລຍ ທີ່ໃຊ້ນໍ້າທຳມະດາ ຄືກັນກັບຢູ່ໂຮງໄຟຟ້າ BUSHEHR ຂອງອີຣ່ານ ທີ່ຖືກເບິ່ງ​ເຫັນວ່າ ເປັນໄພຂົ່ມຂູ່ໃນການ ແຜ່ຜາຍນິວເຄລຍບໍ່ຮ້າຍແຮງ ຄືກັນກັບ ເຕົາແຍກທີ່ໃຊ້ ນໍ້າພິເສດນັ້ນ. ແຕ່ການລົງໂທດໃໝ່ຂອງສະຫະພາບຢູໂຣບ ແມ່ນເຄັ່ງຄັດຂຶ້ນກວ່າແຕ່ກ່ອນ ແລະບໍ່ອະນຸຍາດໃຫ້ ມີການໂອນ ເທັກໂນໂລຈີ ປະເພດນີ້.

ນອກນັ້ນແລ້ວໃນມື້ວານນີ້ ບໍລິສັດເຈາະນໍ້າມັນຂອງຕາເວັນຕົກ 2 ບໍລິສັດ ກໍໄດ້ ຢຸດເຊົາການເຮັດທຸລະກິດກັບອີຣ່ານ.

XS
SM
MD
LG