ສະມັດຊາໃຫຍ່ສະຫະປະຊາຊາດໄດ້ຮັບຜ່ານຮ່າງຍັດຕິສະບັບນຶ່ງ ປະນາມອີຣ່ານທີ່ຖືກ
ກ່າວຫາວ່າ ວາງແຜນລອບສັງຫານເອກອັກຄະລັດຖະທູດຊາອູດີອາຣາເບຍ ປະຈໍາ
ສະຫະລັດນັ້ນ.
ໃນວັນສຸກວານນີ້ ສະມັດຊາໃຫຍ່ສະຫະປະຊາຊາດ ບໍ່ໄດ້ກ່າວຫາອີຣ່ານໂດຍກົງວ່າ
ເປັນຜູ້ຢູ່ເບື້ອງຫລັງໃນການວາງແຜນລອບສັງຫານ ແຕ່ໄດ້ຮຽກຮ້ອງໃຫ້ລັດຖະບານ
ກຸງເຕຫະຣ່ານໃຫ້ຄວາມຮ່ວມໄມ້ຮ່ວມມືໃນການສືບສວນສອບສວນກ່ຽວກັບເລື້ອງນີ້.
ສະຫະລັດໄດ້ກ່າວຫາໃນເດືອນຕຸລາຜ່ານມາວ່າ ພວກສາຍລັບທີ່ເຊື່ອມໂຍງກັບໜ່ວຍ
ພິທັກການປະຕິວັດ ທີ່ມີອໍານາດອິດທິພົນຢ່າງຫລວງຫລາຍຂອງອີຣ່ານນັ້ນ ມີສ່ວນ
ພົວພັນໃນການວາງແຜນເພື່ອລອບສັງຫານທ່ານ Asel al-Jubeir ເອກອັກຄະລັດຖະ
ທູດຊາອູອາຣາເບຍທີ່ຮ້ານກິນດື່ມແຫ່ງນຶ່ງໃນກຸງວໍຊິງຕັນນັ້ນ.
ອີຣ່ານໄດ້ປະຕິເສດວ່າຕົນບໍ່ມີສ່ວນພົວພັນໃດໆ. ທ່ານ MohammadKhazaee ເອກ
ອັກຄະລັດຖະທູດອີຣ່ານປະຈໍາສະຫະປະຊາຊາດ ໄດ້ພະຍາຍາມຢ່າງບໍ່ສໍາເລັດຜົນ ເພື່ອ
ໃຫ້ກໍາຈັດຂໍ້ອ້າງອິງທຸກຢ່າງຕໍ່ກຸງເຕຫະຣ່ານອອກຈາກຮ່າງຍັດຕິສະບັບນຶ່ງ ທີ່ຊາອູດີອາ
ຣາເບຍເປັນຜູ້ສະເໜີຂຶ້ນນັ້ນ. ໃນເວລາຕໍ່ມາ ທ່ານ Mohammad Khazaee ກ່າວວ່າ
ການນໍາເອົາເລື້ອງນີ້ມາສະເໜີຢູ່ໃນສະມັດຊາໃຫຍ່ເປັນໂຕຢ່າງທີ່ອັນຕະລາຍທີ່ບໍ່ເຄີຍມີ
ມາກ່ອນ ແລະເປັນແກ້ໄຂເພື່ອຜົນປະໂຫຍດທາງດ້ານການເມືອງ.
ທ່ານນາງຮີນລາຣີຄລິນຕັນ ລັດຖະມົນຕີການຕ່າງປະເທດສະຫະລັດກ່າວໃນວັນສຸກ
ວານນີ້ວ່າ ການລົງມະຕິຂອງສະຫະປະຊາຊາດສະແດງໃຫ້ເຫັນວ່າ ການໂດດດ່ຽວ
ອີຣ່ານກໍາລັງເພີ່ມທະວີຂຶ້ນ ຍ້ອນອີຣ່ານບໍ່ຍອມປະຕິບັດຕາມພັນທະຂອງຕົນ ຕໍ່ປະຊາ
ຄົມນາໆຊາດນັ້ນ ຊໍ້າແລ້ວຊໍ້າອີກ.
ຊາຍຄົນນຶ່ງໃນບັນດາພວກທ່ີຖືກກ່າວຫາໃນການວາງແຜນລອບສັງຫານດັ່ງກ່າວ ຊຶ່ງ
ເປັນສັນຊາດອາເມຣິກັນເຊື້ອສາຍອີຣ່ານ ໄດ້ຖືກຈັບກຸມແລະບໍ່ຍອມຮັບຜິດໃນເລື້ອງນີ້
ແລະຜູ້ຊາຍຄົນທີສອງ ເຊື່ອກັນວ່າຢູໃນອີຣ່ານເວລານີ້ ແລະບໍ່ໄດ້ຖືກຈັບກຸມ.
ຊາຍທັງສອງຄົນນີ້ຖືກກ່າວຫາວ່າ ເປັນຜູ້ວ່າຈ້າງຊາຍຄົນນຶ່ງທີ່ພວກເຂົາເຈົ້າເຊື່ອວ່າເປັນ
ສະມາຊິກຂອງກຸ່ມລັກລອບຄ້າຢາເສບຕິດເມັກຊິໂກ ເປັນຜູ້ທີ່ຈະທໍາການລອບສັງຫານນີ້
ໂດຍການວາງລະເບີດໂຈມຕີ ຫລືຍິງປືນໃສ່ເອກອັກຄະລັດຖະທູດຊາອູດີອາຣາເບຍນັ້ນ.
ແຕ່ຜູ້ທີ່ຈະເປັນມືຄາດຕະກອນນີ້ ໄດ້ເປັນຄົນທີ່ໃຫ້ຂ່າວຂໍ້ມູນລັບຢູ່ໃນບັນຊີເງິນເດືອນ
ຂອງທາງການສະຫະລັດ ແລະໃຫ້ລາຍລະອຽດກ່ຽວກັບການວາງແຜນລອບສັງຫານ
ແລະຢຸດການວາງແຜນດັ່ງກ່າວໄວ້ກ່ອນ ກ່ອນເຫດການດັ່ງກ່າວຈະເກີດຂຶ້ນໄດ້ນັ້ນ.
