ລິ້ງ ສຳຫລັບເຂົ້າຫາ

ວັນຈັນ, ໒໗ ພຶດສະພາ ໒໐໒໔

ເຕຫະຣ່ານ ພວມຮູ້ສຶກ ເຖິງຄວາມກົດດັນ ຈາກ ການລົງໂທດ ຂອງນາໆຊາດ (ເບິ່ງວີດີໂອ)


ປະທານາທິບໍດີ Mahmoud Ahmadinejad ແຫ່ງອີຣ່ານ ສະແດງທ່າທາງກ່ຽວກັບຄວາມຄືບໜ້າ ໃນດ້ານນີວ ເຄລຍຂອງຕົນ.
ວັນທີ 16 ກຸມພາ 2012.
ປະທານາທິບໍດີ Mahmoud Ahmadinejad ແຫ່ງອີຣ່ານ ສະແດງທ່າທາງກ່ຽວກັບຄວາມຄືບໜ້າ ໃນດ້ານນີວ ເຄລຍຂອງຕົນ. ວັນທີ 16 ກຸມພາ 2012.

ສະຫະລັດ​ບໍ່​ຖື​ສໍາຄັນ​ ກ່ຽວ​ກັບ​ການ​ກ່າວ​ອ້າງ​ຄວາມ​ຄືບ​ໜ້າຂອງ​ໂຄງການ​ນີວ​ເຄລຍຂອງ​ອີຣ່ານນັ້ນ ​ໂດຍ​ກ່າວ​ວ່າ ກຸງ​ເຕຫະຣ່ານພວມ​ຮູ້ສຶກ​ຄວາມ​ກົດ​ດັນ​ຂອງ​ການ​ລົງ​ໂທດ​ນາໆ​ຊາດ ​ແລະ​ຢາກຫັນ​ເຫ​ຈາກ​ການ​ໂດດດ່ຽວ​ທາງ​ການ​ທູດ​ທີ່​ກໍາລັງ​ເພີ່ມ​ຂຶ້ນ​ນັ້ນ.

ອີຣ່ານກ່າວ​ໃນ​ວັນ​ພຸດ​ວານ​ນີ້​ວ່າ ຕົນໄດ້​ຕິດ​ຕັ້ງ​ເຄື່ອງ​ກັ່ນ​ທາດ​ຢູ​ເຣນຽມຮຸ້ນໃໝ່ ​ແລະ​ເປັນ​ເທື່ອ​ທໍາ​ອິດ​ທີ່​ໄດ້​ໃຊ້​ເຊື້ອ​ໄຟ​ນີວ​ເຄລຍທີ່​ຜະລິດ​ພາຍ​ໃນ​ປະ​ເທດ​ເອງ​ເຂົ້າ​ໃນ​ເຕົາ​ແຍກ​ນີວ​ເຄລຍສໍາລັບ​ການ​ຄົ້ນຄວ້າ​ທີ່​ກຸງ​ເຕຫະຣ່ານ.

ທ່ານ​ນາງ Victoria Nulan ​ໂຄສົກ​ປະ​ຈໍາ​ກະຊວງ​ການ​ຕ່າງປະ​ເທດ​ສະຫະລັດ​ບໍ່​ໄດ້​ໃຫ້​ຄວາມ​ສຳຄັນ​ໃດໆ​ຕໍ່ຄໍາ​ປະກາດ​ດັ່ງກ່າວໂດຍ​ເວົ້າວ່າ​ເປັນ​ການ​ໂຄສະນາ​ນັ້ນ ຊຶ່ງ​ທ່ານ​ນາງ​ກ່າວ​ວ່າ ​ເວົ້າ​ຢ່າງ​ກົງ​ໄປ​ກົງ​ມາ​ແລ້ວ ພວກ​ເຮົາ​ບໍ່​ເຫັນ​ສິ່ງໃດ​ໃໝ່ ອັນ​ນີ້​ມັນ​ບໍ່​ແມ່ນ​ຂ່າວ​ໃຫຍ່. ປາກົດ​ວ່າມັນເປັນ​ການ​ຫລອກ​ລວງ. ຊາວ​ອີຣ່ານ​ໄດ້​ປະກາດ​ເລື້ອງ​ຄວາມ​ສໍາ​ເລັດ​ຂອງ​ຕົນ​ມາ​ຫລາຍ​ເດືອນ​ແລ້ວ ​ແລະ​ອິງ​ຕາມລາຍການ​ຂອງ​ເຂົາ​ເຈົ້າ​ເອງ ​ເຂົາເຈົ້າ​ຍັງ​ຢູ່​ໃນ​ຂັ້ນ​ລ້າ​ຫຼັງຫລາຍ​ເດືອນ​. ອັນ​ນີ້​ພາ​ໃຫ້​ພວກ​ເຮົາເຫັນ​ວ່າ​ເປັນ​ການ​ວັດ​ແທກ​ສ່ວນ​ໃຫຍ່​ສໍາລັບ​ພວກ​ຜູ້​ຟັງ​ພາຍ​ໃນ​ປະ​ເທດ​ຂອງ​ຕົນ.

ອິສຣາ​ແອ​ລ​ແລະ​ພວກ​ປະ​ເທດ​ມະຫາ​ອໍານາດ​ຝ່າຍ​ຕາ​ເວັນ​ຕົກ​ສົງ​ໄສອີຣ່ານວ່າ ກໍາລັງ​ພະຍາຍາມ​ເລັ່ງລັດ​ການ​ຫລອມ​ທາດ​ຢູ​ເຣນຽມ​ຂອງຕົນຂຶ້ນ​ສູ່​ລະດັບສູງ​ຂຶ້ນ ​ເພື່ອ​ຜະລິດອາວຸດ​ນີວ​ເຄລຍ. ອີຣ່ານກ່າວ​ວ່າ ​ການ​ຫລອມ​ທາດ​ຢູ​ເຣນຽມ​ຂອງ​ຕົນມີ​ວັດຖຸປະສົງ​ເພື່ອ​ຜະລິດ​ເຊື້ອ​ໄຟ​ສໍາລັບ​ໂຮງ​ໄຟຟ້າ​ແລະ​ການ​ຄົ້ນຄວ້າ​ດ້ານ​ການ​ແພດ​.

ທ່ານ​ນາງ Nuland ກ່າວ​ວ່າ ອີຣ່ານຈະ​ຕ້ອງໄດ້ສະ​ແດງ​ໃຫ້​ເຫັນ​ວ່າ ໂຄງການ​ນີວ​ເຄລຍຂອງ​ຕົນ ​ແມ່ນ​ມີເປົ້າ​ໝາຍ​ທາງ​ພົນລະ​ເຮືອນ.

ອີຣ່ານກ່າວ​ອ້າງ​ວ່າ ຄວາມ​ກ້າວໜ້າ​ເຫລົ່າ​ນີ້​ເປັນ​ບາດກ້າວ​ນຶ່ງ​ໄປ​ໜ້າ ເພື່ອ​ຄວບ​ຄຸມ​ເຊື້ອ​ໄຟ​ນີວ​ເຄລຍຂອງ​ຕົນ​ໃຫ້​ເສັດ​ສິ້ນ​ລົງ ​ເຖິງ​ແມ່ນມີ​ການ​ລົງ​ໂທດ​ຈາກ​ສະຫະ​ປະຊາ​ຊາດ​ແລະ​ພວກ​ປະ​ເທດ​ຝ່າຍ​ຕາ​ເວັນ​ຕົກ ທີ່​ມີ​ວັດຖຸ​ປະສົງ​ເພື່ອ​ໃຫ້​ຕົນ​ຢຸດ​ເຊົາ​ຂັ້ນ​ຕອນ​ດັ່ງ​ກ່າວ​ກໍ​ຕາມ. ທ່ານ Jay Carney ​ໂຄສົກ​ປະ​ຈໍາ​ທໍານຽບຂາວ ກ່າວ​ວ່າ ອີຣ່ານພວມ​ອອກ​ຖ້ອຍ​ຖະ​ແຫລ​ງທີ່​ທ້າ​ທາຍ​ຕ່າງໆ​ ​ເພາະວ່າ ຄະນະ​ນໍາພາແລະການ​ເສດຖະກິດ​ຂອງ​ຕົນ​ພວມ​ຖືກ​ກົດ​ດັນ​ຢ່າງ​ຫລວງຫລາຍ​ຈາກ​ການລົງ​ໂທດ​ເຫລົ່າ​ນີ້.

ອິສຣາ​ແອ​ລ​ແລະ​ພັນທະ​ມິດ​ທີ່​ສໍາຄັນ​ທີ​ສຸດ​ຂອງ​ຕົນ ຄື ສະຫະລັດບໍ່​ປະຕິ​ເສດ ​ທີ່​ຈະ​ບໍ່​ເອົາ​ມາດ​ຕະການ​ທາງ​ທະຫານ​ເພື່ອ​ປ້ອງ​ກັນ​ບໍ່​ໃຫ້ອີຣ່ານຜະລິດ​ອາວຸດ​ນີວ​ເຄລຍຂຶ້ນ​ມາ​ນັ້ນ ຊຶ່ງ
ທາງ​ອິສຣາ​ແອ​ລ​ມອງ​ເຫັນວ່າ ລະ​ເບີດ​ປະລະມະ​ນູຂອງ​ອີຣ່ານນັ້ນ​ເປັນ​ໄພ​ຂົ່ມຂູ່​ອັນ​ນຶ່ງ​ສໍາລັບ
ການ​ຄົງ​ຢູ່​ຂອງ​ຕົນ.

XS
SM
MD
LG