ອີຣ່ານກ່າວວ່າ ນາຍົກລັດຖະມົນຕີອິສຣາແອລ ທ່ານ Benjamin
Netanyahu ໄດ້ກ່າວຫາ ແບບບໍ່ມີມູນຄວາມຈິງເລີຍທີ່ວ່າ ປະເທດ
ຕ່າງໆທີ່ນັບຖືສາສະໜາອິສລາມໃນໂລກ ພົວພັນກັບພວກກຸ່ມຫົວ
ຮຸນແຮງລັດອິສລາມ ໃນລະຫວ່າງການກ່າວຄຳປາໄສຂອງທ່ານ
ຕໍ່ກອງປະຊຸມສະມັດຊາໃຫຍ່ ອົງການສະຫະປະຊາຊາດ.
ໃນການຕອບຕໍ່ຄຳປາໄສຂອງທ່ານ Netanyahu ໃນວັນຈັນ
ວານນີ້ ອີຣ່ານຍັງເວົ້າວ່າ ທ່ານ Netanyahu ຍັງສືບຕໍ່ນະໂຍບາຍ
“ບ່ອນ ທຳລາຍ ແລະ ລົບກວນ” ການເຈລະຈາ ຂອງອີຣ່ານກັບ
ບັນດາປະເທດມະຫາອຳນາດ ກ່ຽວກັບໂຄງການນິວເຄລຍຂອງຕົນນັ້ນ.
ກອງປະຊຸມ ສະມັດຊາໃຫຍ່ ສປຊ
ຜູ້ນຳອິສຣາແອລ ກ່າວຕໍ່ອົງການສະຫະປະຊາຊາດວ່າ ອີຣ່ານ ແມ່ນພະຍາຍາມຈະຫລອກ ລວງໂລກ ເພື່ອໃຫ້ຮັບເອົາຂໍ້ຕົກລົງຍຸດຕິການລົງໂທດຕ່າງໆໃນຂະນະທີ່ອະນຸຍາດໃຫ້ ອີຣ່ານພັດທະນາອາວຸດນິວເຄລຍໄດ້. ອີຣ່ານໄດ້ປະກາດ ເປັນເວລານານມາແລ້ວວ່າ ໂຄງການນິວເຄລຍ ຂອງຕົນ ແມ່ນມີຈຸດປະສົງ ໃນທາງສັນຕິ.
ທ່ານ Netanyahu ກ່າວຕໍ່ໄປວ່າ ອີຣ່ານແມ່ນກຳລັງປະຕິບັດການ ເພື່ອເຜີຍແຜ່ການ
ປະຕິວັດອິສລາມໃນທົ່ວໂລກ ແລະວ່າ ຖ້າອີຣ່ານຫາກມີອາວຸດນິວເຄລຍພ້ອມພຽງແລ້ວ
ນັ້ນ ຈະເປັນອັນຕະລາຍຫຼາຍ ກວ່າພວກກຸ່ມລັດອິສລາມອີກ.
ທ່ານເວົ້າວ່າ ພວກຫົວຮຸນແຮງມຸສລິມທັງໝົດ ລວມທັງກຸ່ມລັດອິສລາມ ຮາມັສ ອາລກາອີດາ ແລະໂບໂກ ຮາຣາມ ມີແນວຄິດຫົວຮຸນແຮງຈັດ ແບບດຽວກັນ ແລະວ່າອີຣ່ານສາມາດ ເປັນຖານທີ່ໝັ້ນ ອັນແຂງແຮງໃຫ້ພວກເຂົາໄດ້.
ສ່ວນອີຣ່ານ ໄດ້ຕອບຕໍ່ການກ່າວຫາທ່ານ Netanyahu ວ່າ ເຜີຍແຜ່ “ຄວາມຢ້ານກົວ
ກ່ຽວກັບອີຣ່ານ ແລະຄວາມຢ້ານກົວກ່ຽວກັບສາສະໜາອິສລາມ.”
