ກຳປັ່ນລົບຂອງອີຣ່ານລຳນຶ່ງ ໄດ້ແນແສງເລເຊີໃສ່ເຮືອບິນເຮລິຄອບເຕີອາເມຣິກັນ ທີ່ໄດ້ຕິດຕາມກຳປັ່ນລົບ 3 ລຳຂອງສະຫະລັດ ຢູ່ໃນບໍລິເວນຊ່ອງແຄບ Hormuz ອີງຕາມ
ຄຳເວົ້າຂອງເຈົ້າໜ້າທີ່ກອງທັບເຮືອສະຫະລັດ ໃນວັນພຸດວານນີ້.
ພັນໂທ Bill Urban ໂຄສົກກອງທັບເຮືອທີ 5 ຂອງສະຫະລັດ ໄດ້ກ່າວວ່າ ກຳປັ່ນລົບ
ຂອງອີຣ່ານ ແມ່ນໄດ້ແລ່ນເຂົ້າມາໃກ້ປະມານ 730 ແມັດ ຫ່າງຈາກກຳປັ່ນລົບ USS
Batan ຊຶ່ງເປັນການກະທຳ “ທີ່ບໍ່ປອດໄພ ແລະບໍ່ເປັນມືອາຊີບ” ໃນແລງວັນອັງຄານ
ຜ່ານມານີ້.
ກຳປັ່ນລົບຍົກພົນຂຶ້ນບົກ USS Batan ເຮືອພິຄາດຕິດຈະຫຼວດນຳວິທີ USS Cole
ແລະກຳປັ່ນລຳລຽງ USNS Washington Chambers ກຳລັງແລ່ນຂ້າມຊ່ອງແຄບ
ດັ່ງກ່າວ ເວລາກຳປັ່ນອີຣ່ານ ແລ່ນເຂົ້າມາໃກ້ ຂະບວນກຳປັ່ນສະຫະລັດ ແລ້ວກໍແຍງ
ໄຟໃສ່ກຳປັ່ນ Cole ນັ້ນຄືຄຳເວົ້າຂອງພັນໂທ Urban.
ທ່ານໄດ້ກ່າວວ່າ ກຳປັ່ນອີຣ່ານ ຕໍ່ມາໄດ້ແນແສງເລເຊີໃສ່ເຮລິຄອບເຕີ CH-53 ແລະຊ່ອງໄຟໃສ່ເຮືອພິຄາດ USS Batan ກ່ອນທີ່ຈະແລ່ນອອກໄປຈາກທີ່ນັ້ນ.
ທ່ານ Urban ໄດ້ອະທິບາຍວ່າ ການແຍງແສງເລເຊີ້ໃສ່ເຮລິຄອບເຕີ ໃນຕອນກາງຄືນ ແມ່ນເປັນອັນຕະລາຍ ເພາະວ່າມັນເປັນອັນຕະລາຍຕໍ່ການບິນ ແລະສາມາດທີ່ຈະເຮັດ
ໃຫ້ເບິ່ງບໍ່ເຫັນ ແລະສ້າງຄວາມງຸນງົງໃຫ້ນັກບິນໄດ້ ທີ່ໃຊ້ແວນຕາພິເສດ ໃນການບິນຕອນກາງຄືນນັ້ນ.
