ກອງທັບຂອງອີຣ່ານໄດ້ເລີ້ມດໍາເນີນການຊ້ອມລົບເປັນເວລາ 4 ມື້ຂອງຕົນ ເຖິງແມ່ນມີ
ການຕໍາໜິຕິຕຽນເພີ່ມຂຶ້ນເລື້ອຍໆກໍຕາມກ່ຽວກັບໂຄງການນີວເຄລຍຂອງປະເທດນັ້ນ.
ສື່ຂອງລັດ ກ່າວວ່າ ການຊ້ອມລົບດັ່ງກ່າວໄດ້ເລີ້ມຂຶ້ນໃນວັນເສົາວານນີ້ ໃນຂົງເຂດນຶ່ງ
ໃກ້ໆກັບຊາຍແດນອັຟການິສຖານ.
ຂ່າວໂທລະພາບຂອງທາງການອີຣ່ານກ່າວວ່າ ການຊ້ອມລົບໃນຂັ້ນຕົ້ນແມ່ນເພື່ອທົດ
ສອບເບິ່ງສະມັດຖະພາບຂອງໜ່ວຍທະຫານຕ່າງໆໃນການຕອບສະໜອງແລະເຄື່ອນ
ກໍາລັງໄປປະຈໍາການໃນກໍລະນີທີ່ມີການໂຈມຕີເກີດຂຶ້ນນັ້ນ.
ທັງອິສຣາແອລແລະສະຫະລັດບໍ່ຍອມປະຕິເສດຕໍ່ການໃຊ້ກໍາລັງທາງທະຫານເພື່ອປ້ອງ
ກັນບໍ່ໃຫ້ອີຣ່ານຜະລິດພວກອາວຸດນີວເຄລຍນັ້ນ. ບັນດາເຈົ້າໜ້າທີ່ອິສຣາແອລຍັງໄດ້ກ່າວ
ແຍ້ມອອກມາໃຫ້ຮູ້ເຊ່ນກັນວ່າ ອິສຣາແອລອາດຈະທໍາການເຄື່ອນໄຫວຕາມລໍາພັງໃນໄວໆ
ນີ້ ຖ້າການລົງໂທດຂອງພວກປະເທດຝ່າຍຕາເວັນຕົກປະສົບກັບຄວາມລົ້ມແຫລວໃນການ
ເກ້ຍກ່ອມ ໃຫ້ກຸງເຕຫະຣ່ານຢຸດການພັດທະນາພວກອາວຸດນີວເຄລຍຂອງຕົນ.
ອີຣ່ານໄດ້ປະຕິເສດຢູ່ຕະຫຼອດມາຕໍ່ຂໍ້ກ່າວຫາກ່ຽວກັບໂຄງການນີວເຄລຍຂອງຕົນນັ້ນວ່າ
ໂຄງການນີວເຄລຍນີ້ແມ່ນໃຊ້ເພື່ອຜົນປະໂຫຍດໃນທາງສັນຕິເທົ່ານັ້ນ.
