ລິ້ງ ສຳຫລັບເຂົ້າຫາ

ອີຣ່ານເຕືອນ ກ່ຽວກັບ ການເຈລະຈານິວເຄລຍ

  • ໄພສານ ວໍຣະຈັກ

ປະທານາທິບໍດີ ອີຣ່ານ ທ່ານ MAMOUD AHMADINEJAD ເຕືອນວ່າ ການລົງໂທດໃໝ່ ໃດໆກໍຕາມ ຂອງນາໆຊາດ ຕໍ່ອີຣ່ານ ອາດໝາຍເຖິງ ການຢຸດຕິລົງ ໃນການເຈລະຈາ ກ່ຽວກັບ ໂຄງການນິວເຄລຍ ທີ່ເປັນບັນຫາ ຖົກຖຽງໂຕ້ແຍ້ງ ຂອງອີຣ່ານ.

ໃນການຖະແຫຼງ ທີ່ນະຄອນ ISTANBUL ໃນວັນອັງຄານ ມື້ນີ້ ບ່ອນທີ່ທ່ານ ໄປຮ່ວມ ກອງປະຊຸມສຸດຍອດ ປະຈຳພູມີີພາກນັ້ນ ປະທານາທິບໍດີ AHMADINEJAD ກ່າວວ່າ ສະຫະລັດ ແລະບັນດາປະເທດ ພັນທະມິດ ແມ່ນ​ເຂົ້າ​ໃຈຜິດ ຖ້າເຂົາເຈົ້າ ຫາກຄິດວ່າ ເຂົາເຈົ້າສາມາດ ທຳການລົງໂທດ ​ແລ້ວນັ່ງ​ລົງ ເຈລະຈາ ກັບອີຣ່ານ​ໄດ້.

ການໃຫ້ຄວາມເຫັນ ດັ່ງກ່າວ ຂອງຜູ້ນຳອີຣ່ານ ມີຂຶ້ນ ໃນຂະນະທີ່ ສະພາຄວາມໝັ້ນຄົງ ອົງການສະຫະປະຊາຊາດ ພວມກະກຽມ ທີ່ຈະລົງຄະແນນສຽງ ກ່ຽວກັບ ການລົງໂທດ ຮອບທີ 4 ຕໍ່ອີຣ່ານ ທີ່ໄດ້ປະຕິເສດ ບໍ່ຍອມຢຸດເຊົາ ກິດຈະການນິວເຄລຍ ຂອງຕົນນັ້ນ.

ນາຍົກ ລມຕ ຣັດ​ເຊຍ ທ່ານ VLADIMIR PUTIN ທີ່​ໄດ້​ໄປ​ຮ່ວມ ​ກອງ​ປະຊຸມ​ສຸດ​ຍອດ ​ທີ່ ISTANBUL ເຊັ່ນ​ກັນນັ້ນ ​ໄດ້ບອກ ​ພວກນັກ​ຂ່າວ​ວ່າ ​ເກືອບ​ວ່າ ໃກ້​ຈະ​ມີ​ ການ​ຕົກລົງ​ກັນ​ ໄດ້​ແລ້ວ ກ່ຽວ​ກັບ ​ຮ່າງ​ຍັດຕິ​ ຂອງອົງການ​ ສະຫະ​ປະຊາ​ຊາດ ​ແຕ່​ທ່ານ​ກ່າ​ວຕື່ມ​ວ່າ ມາຕະການລົງ​ໂທດ ​ບໍ່​ຄວນ​ຮຸນ​ແຮງ​ເກີນ​ໄປ ຫລື​ວ່າ ເປັນ​ການ​ສ້າງ​ ສິ່ງ​ກີດຂວາງ​ຂຶ້ນ ຕໍ່​ເສັ້ນ​ທາງ​ ໄປ​ສູ່ການ​ມີ​ ພະລັງງານ​ນິວ​ເຄລຍ​ໃຊ້ ​ໃນ​ທາງທີ່​ສັນຕິ ​ຂອງ​ອີຣ່ານ.

XS
SM
MD
LG