ລັດຖະມົນຕີ ຕ່າງປະເທດອີຣ່ານ ທ່ານ Mohammad Javad
Zarif ກ່າວໃນວັນອັງຄານມື້ນີ້ວ່າ ການທົດລອງລູກສອນໄຟໃນ
ອາທິດແລ້ວນີ້ຂອງປະເທດທ່ານ ບໍ່ໄດ້ລະເມີດຂໍ້ຕົກລົງນິວເຄລຍ
ທີ່ອີຣ່ານໄດ້ເຊັນ ກັບກຸ່ມປະເທດມະຫາອຳນາດໂລກໃນປີກາຍນີ້.
ໃນການຖະແຫຼງລະຫວ່າງໄປຢ້ຽມຢາມ Australia ທ່ານ Zarif
ກ່າວຢໍ້າວ່າ ອີຣ່ານ ເຫັນວ່າລູກສອນໄຟ ເປັນມາດຕະການທີ່ສຳ
ຄັນ ໃນການປ້ອງກັນຕົນເອງ ແລະບໍ່ໄດ້ໝາຍຄວາມວ່າ ຈະຖືກ
ນຳໃຊ້ເພື່ອບັນທຸກຫົວລະເບີດນິວເຄລຍ.
ທ່ານກ່າວວ່າ “ພວກເຮົາບໍ່ໄດ້ອອກແບບ ລູກສອນໄຟໃດໆ ທີ່ຈະ
ລຳລຽງໃນສິ່ງທີ່ພວກເຮົາບໍ່ມີ.”
ນອກນັ້ນ ທ່ານຍັງໄດ້ທ້າທາຍຕໍ່ “ບັນດາຜູ້ຕິຕຽນ ກ່ຽວກັບໂຄງການລູກສອນໄຟຂອງ
ອີຣ່ານ” ເພື່ອຮ່ວມກັບອີຣ່ານ ໃນການປະກາດວ່າເຂົາເຈົ້າພຽງແຕ່ໃຊ້ກຳລັງໃນການ
ປ້ອງກັນຕົນເອງ.
ທ່ານໃຫ້ຄວາມເຫັນດັ່ງກ່າວໜຶ່ງມື້ ຫລັງຈາກ ເອກອັກຄະລັດຖະທູດ ສະຫະລັດ ປະຈຳ
ສະຫະປະຊາຊາດ ທ່່ານນາງ Samantha Power ກ່າວໃນວັນຈັນວານນີ້ວ່າ ການຍິງ
ລູກສອນໄຟແມ່ນ “ເປັນອັນຕະລາຍ ສ້າງຄວາມບໍ່ທຸ່ນທ່ຽງ ແລະເປັນການທ້າທາຍ”
ແລະ “ບ່ອນທຳລາຍຕໍ່ໂອກາດທີ່ຈະມີສັນຕິພາບ” ຢູ່ໃນຂົງເຂດ.
ວໍຊິງຕັນ ກ່າວວ່າ ການຍິງລູກສອນໄຟ ແມ່ນເປັນການລະເມີດຕໍ່ເນື້ອໄນຂອງ ມະຕິສະ
ຫະປະຊາຊາດທີ່ຮັບເອົາໃນເດືອນກໍລະກົດທີ່ຜ່ານມາທີ່ໄດ້ “ຮຽກຮ້ອງ" ໃຫ້ອີຣ່ານ ຢ່າ
ໄດ້ "ດຳເນີນກິດຈະການໃດໆທີ່ພົວພັນກັບການອອກແບບລູກສອນໄຟຂີປະນາວຸດ ທີ່
ຈະສາມາດບັນທຸກຫົວລະເບີດນິວເຄລຍ ຮວມທັງການຍິງ ທີ່ໃຊ້ເທັກໂນໂລຈີລູກສອນ
ໄຟຂີປະນາວຸດດັ່ງກ່່າວ.”
ທ່ານ John Kirby ໂຄສົກກະຊວງຕ່າງປະເທດສະຫະລັດ ກ່າວວ່າ “ພວກເຮົາຮູ້ສຶກ
ສະບາຍໃຈວ່າ ພວກເຮົາມີກໍລະນີທີ່ເຂັ້ມແຂງ. ການຍິງລູກສອນໄຟເຫລົ່ານີ້ແມ່ນແຈ້ງ
ຂາວເປັນການທ້າທາຍຕໍ່ມະຕິດັ່ງກ່າວ. ບໍ່ມີຄຳຖາມໃດໆອີກກ່ຽວກັບເລື້ອງນີ້.”
