ການຕັດສິນໃຈຂອງກະຊວງການຕ່າງປະເທດສະຫະລັດເພື່ອລຶບບາງສ່ວນຂອງວີດີໂອ ໂດຍເຈດຕະນາ ໃນການຖະແຫລງຂ່າວ ໄດ້ເປັນທີ່ສົນໃຈ ຂອງບັນດາສະມາຊິກສະພາ ໂດຍມີຄຳຖາມບາງຢ່າງ ກ່ຽວກັບວ່າ ລັດຖະບານທ່ານໂອບາມາພະຍາຍາມທີ່ຈະເຮັດໃຫ້ ປະຊາຊົນເຂົ້າໃຈຜິດຫຼືບໍ່ໃນການເຈລະຈານິວເຄລຍກັບອີຣ່ານ.
ປະທານຄະນະກຳມະການ ກິດຈະການຕ່າງປະເທດ ຂອງສະພາຕ່ຳສະຫະລັດທ່ານ Ed Royce ໃນວັນສຸກວານນີ້ ໄດ້ຮຽກຮ້ອງ ໃຫ້ຜູ້ກວດກາທົ່ວໄປ ຂອງກະຊວງການຕ່າງປະ ເທດສະຫະລັດ ສືບສວນເບິ່ງເລື້ອງດັ່ງກ່າວ.
ຄະນະກຳມະການອີກຈຸນຶ່ງຂອງສະພາຕ່ຳສະຫະລັດ ກໍໄດ້ໃຫ້ເວລາແກ່ລັດຖະມົນຕີການ ຕ່າງປະເທດ John Kerry ຈົນຮອດວັນພຸດເພື່ອລະບຸໂຕເຈົ້າໜ້າທີ່ກະຊວງຕ່າງປະເທດ ທີ່ໄດ້ສັ່ງໃຫ້ລຶບວີດີໂອທີ່ວ່ານີ້.
ສ່ວນສະມາຊິກລັດຖະສະພາຄົນອື່ນໆຂອງພັກຣີພັບບລີກັນຕ່າງກໍໄດ້ສະແດງຄວາມວິຕົກ ກັງວົນກ່ຽວກັບເລື້ອງນີ້.
ປະທານສະພາຕ່ຳ ທ່ານ Paul Ryan ຮຽກຮ້ອງໃຫ້ ລັດຖະບານທ່ານໂອບາມາ ທຳການ ສືບສວນກ່ຽວກັບເຫດການດັ່ງກ່າວ ໃນຂະນະທີ່ສະມາຊິກສະພາສູງ Tom Cotton ໄດ້ ກ່າວຫາກະຊວງການຕ່າງປະເທດວ່າ ຫາທາງຊຸກຍູ້ ແບບບໍ່ມີຄວາມຈິງ ໃນຄວາມສຳພັນ ຂອງສະຫະລັດກັບອີຣ່ານ.
ສິ່ງທີ່ເປັນບັນຫາ ກໍແມ່ນ ເມື່ອວັນທີ 2 ທັນວາ ປີ 2013 ການຖະແຫຼງຂ່າວຂອງກະຊວງການຕ່າງປະເທດໂດຍທ່ານນາງ Jen Psaki ຊຶ່ງເປັນໂຄສົກຂອງກະຊວງໃນເວລານັ້ນ.
ເມື່ອມີການຊັກຖາມກ່ຽວກັບຄວາມຖືກຕ້ອງ ໃນການປະຕິເສດຂອງກະຊວງການຕ່າງປະເທດກ່ອນໜ້ານັ້ນໃນການເຈລະຈາແບບລັບໆຂອງລັດຖະບານລະຫວ່າງສະຫະລັດແລະອີຣ່ານ ທ່ານນາງ Psaki ກ່າວວ່າ ມີບາງເວລາບ່ອນທີ່ການທູດມີຄວາມຈຳເປັນທີ່ຕ້ອງໄດ້ມີຄວາມລັບເພື່ອວ່າຈະສ້າງຄວາມກ້າວໜ້າໄດ້.
ທ່ານນາງອະທິບາຍວ່າ ນີ້ແມ່ນຕົວຢ່າງທີ່ດີຂອງສິ່ງນັ້ນ.
