ກະຊວງຕ່າງປະເທດອີຣ່ານ ກ່າວໃນວັນອັງຄານມື້ນີ້ວ່າ ລັດຖະ
ບານໄດ້ສົ່ງເຄື່ອງຊ່ອຍເຫຼືອໄປຍັງເຢເມັນ ແຕ່ປະຕິເສດວ່າບໍ່
ແມ່ນສົ່ງອາວຸດໄປຍັງປະເທດບ່ອນທີ່ກຸ່ມປະສົມພາຍໃຕ້ການ
ນຳພາຂອງ Saudi Arabia ກຳລັງທຳການໂຈມຕີທາງອາ
ກາດເພື່ອພະຍາຍາມຢຸດພວກກະບົດທີ່ໄດ້ ຮັບການໜຸນຫຼັງ
ຈາກອີຣ່ານນັ້ນ.
ອົງການຂ່າວ IRNA ທາງການຂອງອີຣ່ານ ອ້າງຄຳເວົ້າຂອງ
ນາງ Marziyeh Afkham ໂຄສົກປະຈຳກະຊວງຕ່າງປະ
ເທດອີຣ່ານ ທີ່ເວົ້າວ່າ ການກ່າວຫາກ່ຽວກັບການສົ່ງອາວຸດ
ໄປໃຫ້ພວກກະບົດ Houthis ນັ້ນ ແມ່ນເປັນການເສກສັນ
ປັ້ນແຕ່ງຂຶ້ນຢ່າງສິ້ນເຊີງ. ທ່ານນາງເວົ້າວ່າ ພວກຖ້ຽວບິນທີ່ບໍ່ພົວພັນກັບການທະຫານໄດ້ຂົນສົ່ງເຄື່ອງຊ່ອຍເຫຼືອ ແລະຢຸກຢາປົວພະຍາດໄປຍັງປະເທດເຢເມັນ.
ພວກເຮືອບິນລົບຂອງກຸ່ມປະສົມ ໄດ້ສືບຕໍ່ຖິ້ມລະເບີດໃສ່ນະຄອນຫຼວງ Sana’a ຮວມທັງ
ໂຈມຕີເຂດສາງເກັບອາວຸດ ໃນວັນຈັນວານນີ້ ແລະໄດ້ເຮັດໃຫ້ສະຖານທີ່ດັ່ງກ່າວເກີດລະເບີດຂຶ້ນຢ່າງໃຫຍ່.
ການໂຈມຕີທາງອາກາດອີກບັ້ນໜຶ່ງໃນຕອນເຊົ້າວັນຈັນວານນີ້ ໄດ້ສັງຫານປະຊາຊົນຢ່າງໜ້ອຍ 45 ຄົນ ແລະໄດ້ຮັບບາດເຈັບຕື່ມອີກ 65 ຄົນຢູ່ໃກ້ໆກັບຄ້າຍອົບພະຍົບແຫ່ງໜຶ່ງ
ໃນພາກເໜືອຂອງເຢເມັນ.
