ລິ້ງ ສຳຫລັບເຂົ້າຫາ

ວັນຈັນ, ໑໕ ເມສາ ໒໐໒໔

ອີຣ່ານ ຮຽກຮ້ອງໃຫ້ສະພາຄວາມໝັ້ນຄົງ ສປຊ ຈັດການປະຊຸມ ລຸນຫຼັງການໂຈມຕີຂອງອິສຣາແອລ ໃນ ຊີເຣຍ


ປະຊາຊົນເຕົ້າໂຮມກັນຢູ່ໃກ້ສະຖານທີ່ທີ່ໄດ້ຮັບຄວາມເສຍຫາຍ, ດ້ວຍການລາກລົດທີ່ຖືກທໍາລາຍນັ້ນອອກຈາກທາງ, ລຸນຫຼັງສິ່ງທີ່ອັງການຂ່າວຊີເຣຍ ແລະ ອີຣ່ານ ອະທິບາຍວ່າ ມີການໂຈມຕີທາງອາກາດຂອງອິສຣາແອລໃສ່ສະຖານກົງສຸນຂອງອີຣ່ານ ຢູ່ໃນນະຄອນຫຼວງດາມາສກັສຂອງຊີເຣຍ, ວັນທີ 1 ເມສາ 2024.
ປະຊາຊົນເຕົ້າໂຮມກັນຢູ່ໃກ້ສະຖານທີ່ທີ່ໄດ້ຮັບຄວາມເສຍຫາຍ, ດ້ວຍການລາກລົດທີ່ຖືກທໍາລາຍນັ້ນອອກຈາກທາງ, ລຸນຫຼັງສິ່ງທີ່ອັງການຂ່າວຊີເຣຍ ແລະ ອີຣ່ານ ອະທິບາຍວ່າ ມີການໂຈມຕີທາງອາກາດຂອງອິສຣາແອລໃສ່ສະຖານກົງສຸນຂອງອີຣ່ານ ຢູ່ໃນນະຄອນຫຼວງດາມາສກັສຂອງຊີເຣຍ, ວັນທີ 1 ເມສາ 2024.

ອີຣ່ານ ​ໄດ້​ຮຽກຮ້ອງ​ໃຫ້​ສະພາ​ຄວາມ​ໝັ້ນຄົງ​ສະຫະ​ປະຊາ​ຊາດຈັດ​ກອງ​ປະຊຸມ​ສຸກ​ເສີນ ​ເພື່ອຫາລື​ກ່ຽວ​ກັບ​ການ​ໂຈມ​ຕີ​ທາງ​ອາກາດ​ຂອງ​ອິສຣາ​ແອ​ລ ທີ່ໄດ້​ທຳລາຍ​ສະຖານ​ກົງສຸນ​ຂອງ​ອີຣ່ານ ​ໃນ​ນະຄອນຫຼວງ​ຂອງ​ຊີ​ເຣຍ.

ກອງ​ກຳລັງ​ປ້ອງ​ກັນ​ປະ​ຕິ​ວັດ​ອິສ​ລາມ​ຂອງ​ອີ​ຣ່ານ ກ່າວ​ວ່າ ການ​ໂຈມ​ຕີ ​ໃນ​ວັນ​ຈັນ​ວານນີ້ ໄດ້​ສັງຫານ​ຢ່າງ​ໜ້ອຍ 7 ຄົນ ລວມທັງ​ທີ່​ປຶກສາອາວຸໂສ​ດ້ານ​ການ​ທະຫານ​.

ໃນ​ຈົດໝາຍ​ສະບັບນຶ່ງ ທີ່ເຜີຍແຜ່ອອກມາ​ ໃນ​ວັນ​ຈັນ​ວານ​ນີ້, ​ເອກ​ອັກຄະ​ລັດຖະທູດ​ອີຣ່ານປະຈຳ​ສະຫະ​ປະຊາ​ຊາດ ທ່ານຊາຣາ ເອີຊາດີ (Zahra Ershadi) ​ໄດ້​ຮຽກຮ້ອງ​ຕໍ່​ສະພາ​ຄວາມ​ໝັ້ນຄົງເພື່ອອະທິບາຍກ່ຽວກັບ “ການ​ລະ​ເມີດ​ຢ່າງ​ຮ້າຍ​ແຮງ​ນີ້” ​ແລະ​ຂັດຂວາງ​ການ​ກະທຳ​ຕ່າງໆ ທີ່​ຈະ​ເປັນ​ອັນຕະລາຍ​ຕໍ່​ພາລະກິດທາງ​ການ​ທູດ​ໃນ​ອະນາຄົດ.

ທ່ານ ເອີຊາດີ ຂຽນວ່າ “ໂດຍພິຈາລະນາເຖິງຜົນສະທ້ອນໄລຍະຍາວຂອງສາກົນ ກ່ຽວກັບການກະທໍາທີ່ຄວນຖືກປະນາມ ເຊິ່ງສາມາດເຮັດໃຫ້ຄວາມເຄັ່ງຕຶງເພີ້ມຂຶ້ນຢູ່ໃນພາກພື້ນ ແລະອາດຈະເຮັດໃຫ້ເກີດຄວາມຂັດແຍ້ງແຜ່ລາມຫາປະເທດຕ່າງໆເພີ້ມຂຶ້ນ, ອີຣ່ານ ໄດ້ຮຽກຮ້ອງໃຫ້ສະພາຄວາມຫມັ້ນຄົງ ຈົ່ງປະນາມຕໍ່ການກະທໍາຜິດທາງອາຍາທີ່ບໍ່ຍຸຕິທໍາ ແລະການກະທໍາກໍ່ການຮ້າຍທີ່ບໍ່ຖືກຕ້ອງໂດຍລະບອບຜະເດັດການອິສຣາແອລ ໃນເງື່ອນໄຂທີ່ເຂັ້ມແຂງທີ່ສຸດເທົ່າທີ່ເປັນໄປໄດ້.”

ອິສຣາແອລ ໄດ້ປະຕິເສດທີ່ຈະໃຫ້ຄວາມເຫັນກ່ຽວກັບການໂຈມຕີດັ່ງກ່າວມານັ້ນ.

ເອກ​ອັກ​ຄະ​ລັດ​ຖະ​ທູດ​ອີ​ຣ່ານ ທ່ານຮຸສເຊນ ອັກຣາບີ (Hossein Akbari) ກ່າວ​ປະ​ນາມຕໍ່ການໂຈມຕີຂອງ ອິ​ສ​ຣາ​ແອລ.
ທ່ານ ອັກຣາບີ ໄດ້ປະຕິຍານທີ່ຈະດໍາເນີນການແກ້ແຄ້ນ "ໃນຂະຫນາດດຽວກັນ ແລະມີຄວາມຮຸນແຮງເທົ່າກັນ."

ອິສຣາແອລໄດ້ທຳການໂຈມຕີຫຼາຍລ້ອຍຄັ້ງ ໃສ່ເປົ້າໝາຍຢູ່ໃນເຂດທີ່ຄວບຄຸມໂດຍລັດຖະບານຂອງຊີເຣຍ ໃນບໍ່ເທົ່າໃດປີມານີ້. ​ແຕ່​ຈຳນວນ​ດັ່ງກ່າວ​ໄດ້​ເພີ້ມ​ຂຶ້ນ​ນັບ​ຕັ້ງ​ແຕ່ການເລີ້ມ​ຕົ້ນ​ສົງຄາມລະຫວ່າງ ​ອິສຣາ​ແອລ ແລະ ກຸ່ມຮາມາສ ​ມາເປັນ​ເວລາ​ເກືອບ 6 ​ເດືອນ ​ຢູ່ໃນຂົງ​ເຂດ​ກາຊາ ​ພ້ອມທັງການ​ປະ​ທະ​ກັນ​ເປັນ​ໄລຍະ​ໆ ລະຫວ່າງ​ທະຫານ​ຂອງອິສຣາ​ແອລ ​ແລະກຸ່ມນັກ​ສູ້ເຮັສໂບລລາ ຢູ່​ຕາມບໍລິເວນ​ຊາຍ​ແດນຂອງ​ເລ​ບາ​ນອນ ແລະ ອິ​ສ​ຣາ​ແອລ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG