ອິຣ່ານຂູ່ຈະປິດກັ້ນການຂົນສົ່ງນໍ້າມັນຜ່ານແຫລມ Hormuz ຖ້າຫາກພວກລັດຖະບານປະເທດຕາເວັນຕົກພະຍາຍາມລົງໂທດອິຣ່ານໃນການສົ່ງ ອອກນໍ້າມັນຂອງຕົນ ເພື່ອຕອບໂຕ້ຕໍ່ໂຄງການນີວເຄລຍຂອງອິຣ່່ານນັ້ນ.
ຜູ້ບັນຊາການກອງທັບເຮືອອິຣ່ານກ່າວຕໍ່ໂທລະພາບຂອງລັດເມື່ອວັນພຸດມື້ນີ້ວ່າ ຕົນຈະປິດແຫລມ Hormuz ຍາມໃດກໍໄດ້ ແຕ່ການປະຕິບັດການດັ່ງນັ້ນຍັງບໍ່ຈໍາເປັນເທື່ອໃນເວລານີ້.
ຄວາມເຫັນຂອງທ່ານມີຂຶ້ນມື້ນຶ່ງຫລັງຈາກຮອງປະທານາທິບໍດີ Mohammad Reza Rahimi ເວົ້າວ່າ ຖ້າຫາກວ່າອິຣ່ານຖືກຫ້າມ ບໍ່ໃຫ້ສົ່ງອອກນໍ້າມັນຂອງຕົນແລ້ວ ກໍຈົ່ງຮູ້ໄວ້ດ້ວຍວ່າ ອິຣ່ານຈະຢຸດບໍ່ໃຫ້ ມີການຂົນສົ່ງນໍ້າມັນຜ່ານແຫລມ Hormuz ໄປໄດ້ແມ່ນແຕ່ຢົດດຽວ.
ໄດ້ມີການການອ້າງຄຳເວົ້າຂອງທ່ານ Rahimi ໂດຍອົງການຂ່າວ IRNA ຂອງທາງການອິຣ່ານ ທີ່ເວົ້າວ່າ ອິຣ່ານບໍ່ຕ້ອງການເປັນປໍລະປັກກັບໃຜ ມີແຕ່ພວກຕາເວັນຕົກນັ້ນຫລະທີ່ບໍ່ຍອມປະລະແຜນການຂອງພວກເຂົາເຈົ້າ.
ການຕຸກເຕືອນນີ້ແມ່ນມີຂຶ້ນໃນຂະນະທີ່ກອງທັບເຮືອຂອງອິຣ່ານ ສືບຕໍ່ ຊ້ອມລົບເປັນເວລາສິບມື້ ໃນບໍລິເວນແຫລມດັ່ງກ່າວ ແລະເຂດນ່ານນໍ້າ ໄກ້ຄຽງທີ່ໄດ້ເລີ່ມຕົ້ນມາເມື່ອວັນເສົາຜ່ານມາ.
ທີ່ນະຄອນຫລວງວໍຊິງຕັນ ທ່ານ Mark Toner ໂຄສົກກະຊວງຕ່າງປະ ເທດສະຫະລັດບໍ່ຮັບຮູ້ຄໍາຂູ່ນັ້ນ ແລະວ່າເປັນເລຶ່ອງຂີ້ໂມ້ ຫລາຍກວ່າ ຊຶ່ງໂຄສົກໂທນເນີ ເອີ້ນຄໍາເຫັນນັ້ນວ່າເປັນ ຄວາມພະຍາຍາມຂອງອິຣ່ານອີກ ຢ່າງນຶ່ງເພື່ອດຶງຄວາມສົນໃຈອອກຈາກການສືບຕໍ່ບໍ່ປະຕິບັດຕາມພັນທະນີວເຄລຍສາກົນຂອງຕົນນັ້ນ.
ອິຣ່ານຢືນຢັນວ່າໂຄງການເສີມສະມັດຖະພາບທາດຢູເຣນຽມຂອງຕົນນັ້ນແມ່ນເພື່ອວັດຖຸປະສົງດ້ານພົນລະເຮືອນ ແຕ່ລາຍງານສະບັບນຶ່ງຂອງອົງການສະຫະປະຊາຊາດທີ່ອອກເມື່ອເດືອນຜ່ານມານັ້ນ ພົບວ່າອິຣ່ານປະຕິບັດການຢ່າງລັບໆເພື່ອອອກແບບອາວຸດປະລະມະນູ ແລະລະບົບລູກສອນໄຟເພື່ອບັນທຸກອາວຸດດັ່ງກ່າວ.
