ລິ້ງ ສຳຫລັບເຂົ້າຫາ

ອິຣ່ານເຈລະຈາ ກັບຝ່າຍຕາເວັນຕົກ ເລື້ອງນິວເຄລຍ

  • ວັນນະສອນ ແກ້ວດາຣາ

ທ່ານນາງ Catherine Ashton ຫົວໜ້າຝ່າຍນະໂຍບາຍຕ່າງປະເທດຂອງສະຫະພາບຢູໂຣບ ຕ້ອນຮັບທ່ານ Saeed Jalili ຫົວໜ້າຝ່າຍເຈລະຈາເລື້ອງນິວເຄລຍຂອງອິຣ່ານ, ວັນທີ 6 ທັນວາ 2010.

ຫົວໜ້າ​ເຈລະຈາ​ດ້ານ​ນີວ​ເຄລຍຂອງ​ອິຣ່ານ​ ໄດ້​ເລີ່​ມທໍາ​ການເຈ​ລະຈາກັບຫົວໜ້າ​ຝ່າຍກິດຈະການ​ຕ່າງປະ​ເທດ​ຂອງ​ສະຫະພາບ​ຢູ​ໂຣບ ທີ່​ນະຄອນເຈນີວາ​ແລ້ວ ເພື່ອໂອ້​ລົມ​ສົນທະນາ​ກັນ ​ເລື່ອງ​ໂຄງການ​ນີວ​ເຄລຍຂອງ​ກຸງ​ເຕຮະຣ່ານ ທີ່​ເປັນບັນຫາ​ໂຕ້​ແຍ້​ງກັນ​ນັ້ນ.

ທ່ານ​ນາງ Catherine Ashton ​ເປັນ​ຜູ້​ນໍາພາ​ໃນ​ການ​ພົບ​ປະ​ສົນທະນາ​ ໃນ​ວັນ​ຈັນ​ມື້​ນີ້​ ກັບ​ທ່ານ Saeed Jalili ​ແລະ​ບັນດາ​ນັກ​ການ​ທູດ​ຂັ້ນ​ອາວຸ​ໂສ​ຈາກ​ສະຫະລັດ ຣັດ​ເຊຍ ຈີນ ອັງກິດ ຝຣັ່ງ​ ແລະ​ເຢຍຣະມັນ.

ການ​ພົບ​ປະ​ຫາລື​ກັນ​ເປັນ​ເວລາ 2 ມື້​ນີ້ ນັບ​ວ່າ​ເປັນເທື່ອ​ທໍາ​ອິດ​ທີ່​ພວກ​ເຈລະຈາ​ໄດ້​ພົບປະກັນ​ກ່ຽວ​ກັບ​ເລື້ອງນີ້​ໃນ​ຮອບ​ນຶ່ງ​ປີ​ປາຍ​ຜ່ານ​ມາ. ຄວາມ​ຄາດຫວັງ​ກ່ຽວ​ກັບ​ຜົນຂອງ​ການ​ພົບ​ປະ ກັນ​ນີ້​ ແມ່ນ​ມີ​ຢູ່​ໃນ​ລະດັບ​ຕໍ່າ ​ໂດຍ​ພວກ​ນັກ​ຊ່ຽວຊານ​ກ່າວ​ວ່າ ຄວາມຫວັງ​ໃຫຍ່​ທີ່ສຸດ​ກໍ​ແມ່ນ​ວ່າ ​ມັນ​ຈະ​ພາ​ໃຫ້​ມີ​ການ​ພົບ​ປະ​ຫາລື​ກັນ​ອີກ​ຕື່ມ.

ການ​ພົບ​ປະ​ເຈລະຈາ​ກັນ​ນີ້ ມີ​ຂຶ້ນ​ນຶ່ງ​ມື້ ຫລັງ​ຈາກ​ທ່ານ Ali Akbar Salehi ຫົວໜ້າ​ຝ່າຍ​
ພະລັງ​ງານນີວ​ເຄລຍຂອງ​ອິຣ່ານ ກ່າວ​ວ່າ ປະ​ເທດ​ຂອງ​ທ່ານ​ແມ່ນ​ກຸ້ມ​ຕົນ​ເອງ​ແລ້ວ ​ໃນ
ເລື້ອງການ​ຜະລິດ​ເຊື້ອ​ໄຟ​ນີວ​ເຄລຍຄົບທັງວົງ​ຈອນ ​ຫລັງ​ຈາກ​ທີ່​ສາມາດ​ກັ່ນ​ທາດຢູ​ເຣນຽມ
ເປັນ​ຜົງ​ໄດ້ສໍາເລັດຊຸດ​ທໍາ​ອິດ ທີ່​ເອີ້ນ​ກັນ​ວ່າ Yellowcake ຫລືແປ້ງ​ເຂົ້າ​ໜົມສີ​ເຫ​ລື​ອງນັ້ນ.

ທ່ານ Salehi ປະກາດ​ເລື່ອງ​ນີ້​ໃຫ້​ຮູ້​ທາງ​ໂທລະພາບ​ແຫ່ງ​ຊາດ​ຂອງ​ອິຣ່ານ​ ໃນວັນ​ອາທິດ​
ວານ​ນີ້ ​ແຕ່​ບໍ່​ໄດ້​ບອກ​ໃຫ້​ຮູ້​ວ່າ ໄດ້​ມີ​ການ​ຜະລິດ yellowcake ​ໄດ້ໜ້ອຍ ​ຫລາຍ​ສໍ່າ​ໃດ​ ມາ​ຮອດ​ປັດຈຸບັນ​ນີ້.

XS
SM
MD
LG