ກຸ່ມປົກປ້ອງສິດທິມະນຸດລະດັບນໍາໜ້າກຸ່ມນຶ່ງກ່າວວ່າ ຮ່າງກົດໝາຍສະ ບັບນຶ່ງຂອງອີຣັກຈະວາງຂໍ້ຈໍາກັດຮັດແຄບເສລີພາບໃນການປາກເວົ້າ ຊຶ່ງເປັນການລະເມີດຕໍ່ກົດໝາຍສາກົນ ແລະເປັນໄພຂົ່ມຂູ່ຕໍ່ພວກນັກຂ່າວ ພວກລາຍງານຂ່າວກ່ຽວກັບການກະທຳທີ່ບໍ່ຖືກຕ້ອງຊອບທໍາຂອງເຈົ້າໜ້າທີ່ລັດຖະບານ ແລະພວກນັກເຄຶ່ອນໄຫວຢ່າງສັນຕິ.
ໃນລາຍງານໃໝ່ສະບັບນຶ່ງນັ້ນກຸ່ມປົກປ້ອງສິດທິມະນຸດ Human Rights Watch ເວົ້າວ່າ ກົດໝາຍອາຍາຄວບຄຸມອິນເທີເນັດ ໂຮມທັງກົດໝາຍທີ່ຍັງມີຄໍາເວົ້າຄຸມເຄືອບໍ່ແຈ້ງຂາວ ທີ່ປ່ອຍໃຫ້ບັນດາເຈົ້າໜ້າທີ່ອີຣັກລົງໂທດ ຕໍ່ການປາກເວົ້າຂີດຂຽນທີ່ພວກເຂົາເຈົ້າເຊື່ອວ່າ ເປັນໄພຂົ່ມຂູ່ຕໍ່ລັດຖະບານ ສັງຄົມ ຫຼືຜົນປະໂຍດທາງສາສະໜານັ້ນ.
ກຸ່ມປົກປ້ອງສິດທິມະນຸດດັ່ງກ່າວ ໄດ້ຮຽກຮ້ອງໃຫ້ສະພາອີຣັກ ຈົ່ງຢ່າໄດ້ອະນຸມັດຮ່າງກົດໝາຍດັ່ງກ່າວ ໂດຍປາດສະຈາກການສຶກສາທົບທວນຄືນໃໝ່ໃຫ້ເໝາະສົມ ເພື່ອຈະຖອດຖອນຂໍ້ຈໍາກັດຮັດແຄບຕ່າງໆນັ້ນອອກໄປ.
ທ່ານ Joe Stork ຜູ້ຊ່ຽວຊານເຂດຕາເວັນອອກກາງປະຈໍາກຸ່ມປົກປ້ອງສິດທິມະນຸດ Human Rights Watch ເວົ້າວ່າ ຮ່າງກົດໝາຍດັ່ງກ່າວ ຈະເປັນການເອື້ອອໍານວຍໃຫ້ບັນດາເຈົ້າໜ້າທີ່ອີຣັກໃຊ້ເປັນເຄຶ່ອງມືຢ່າງ ນຶ່ງເພື່ອປາບປາມກົດຂີ່ການຄັດຄ້ານລັດຖະບານ ໂດຍສະເພາະທາງອິນເທີເນັດ. ທ່ານ Joe Stork ເວົ້າອີກວ່າ ບັນດານັກຂ່າວ ແລະນັກ ເຄຶ່ອນໄຫວຊາວອີຣັກ ແມ່ນກໍາລັງພາກັນຊົມໃຊ້ອິນເທີເນັດຫຼາຍຂຶ້ນນັບມື້ ເພື່ອຂໍ້ມູນຂ່າວສານ ແລະການອະພິປາຍກັນຢ່າງເປີດເຜີຍ.
ທ່ານ Stork ຍັງເວົ້າອີກວ່າ ວິທີການທີ່ບັນດາສະມາຊິກສະພາອີຣັກດໍາ ເນີນການກັບຍັດຕິດັ່ງກ່າວແມ່ນຈະສົ່ງສັນຍານໄປສູ່ໂລກພາຍນອກໃຫ້ຮູ້ວ່າ ນີ້ຄືພວກເຂົາເຈົ້າຢາກໃຫ້ອີຣັກເປັນປະເທດແບບນີ້. ທ່ານເວົ້າຕື່ມວ່າ ພວກເຂົາເຈົ້າສາມາດປັບໂຕໃຫ້ຢູ່ຝ່າຍທຳການປາບປາມກົດຂີ່ ຫຼືຢືນຢັດ ເພື່ອສັງຄົມທີ່ເຄົາລົບນັບຖືສິດທິມະນຸດຕ່າງໆນັ້ນ.
