ລິ້ງ ສຳຫລັບເຂົ້າຫາ

ຄາດກັນວ່າ ພາຍຸໄອໂອຕາ ຈະອ່ອນກຳລັງລົງ ເປັນພາຍຸເຂດຮ້ອນຄວາມກົດດັນຕ່ຳ ໃນຕອນຂ້າມຄືນ


ແມ່ຍິງຄົນນຶ່ງຍ່າງເຂົ້າໄປໃນເຮືອນຂອງລາວ ທີ່ຖືກນ້ຳຖ້ວມ ໃນລະຫວ່າງ ພາຍຸເຮີເຄນໄອໂອຕາ ພັດຜ່ານໄປໃນເມືອງຊີຢູນາ ຂອງນະກາຣາກົວ, ວັນອັງຄານ ທີ 17 ພະຈິກ 2020.

ພາຍຸໄອໂອຕາ (Iota) ສືບຕໍ່ພັດຖະຫຼົ່ມປະເທດນິກາຣາກົວ ດ້ວຍລົມແຮງແລະ ນຳເອົາຝົນຕົກລົງມາຢ່າງໜັກ ແມ່ນກະທັງຫຼັງຈາກທີ່ມັນໄດ້ອ່ອນກຳລັງລົງຈາກ ເຮີຣິເຄນ ມາເປັນພາຍຸເຂດຮ້ອນແລ້ວກໍຕາມ.

ມາຮອດຕອນເດິກວັນອັງຄານວານນີ້ ສູນກາງເຮີຣິເຄນແຫ່ງຊາດຂອງສະຫະລັດ ໃນນະຄອນໄມອາມີ ໄດ້ກ່າວວ່າ ພາຍຸໄອໂອຕາ ນຳເອົາລົມ ທີ່ຄວາມແຮງສູງສຸດເຖິງ 65 ກິໂລແມັດຕໍ່ຊົ່ວໂມງ ພວມເຄື່ອນຕົວໄປ ໃນທິດທາງ ຫານະຄອນ ຫຼວງເຕກູຊີກາລປາ ຂອງຮອນດູຣາສ.

ບັນດານັກພະຍາກອນອາກາດ ກ່າວວ່າ ພາຍຸເຂດຮ້ອນໄອໂອຕາໄດ້ນຳເອົາຝົນຕົກລົງໃສ່ທົ່ວພື້ນທີ່ທາງພາກໃຕ້ຂອງນິກາຣາກົວໃນເຂດອາເມຣິກາກາງ ໄປຫາພາກໃຕ້ສຸດຂອງເບລີຊ ໃນຕອນຂ້າມຄືນ ໃນໄລຍະ 7 ຫາ 20 ກິໂລແມັດຂອງ ເຂດດັ່ງກ່າວ ຊຶ່ງພາໃຫ້ເກີດ “ໄພນ້ຳຖ້ວມກະທັນຫັນ ແລະແມ່ນ້ຳລົ້ນຝັ່ງທີ່ເປັນ ອັນຕະລາຍຕໍ່ຊີວິດ” ພ້ອມກັນກັບຕົມເຈື່ອນ ຢູ່ໃນພື້ນທີ່ສູງ. ພາຍຸດັ່ງກ່າວແມ່ນຄາດກັນວ່າ ຈະອ່ອນກຳລັງລົງເປັນພາຍຸເຂດຮ້ອນດີແພຣັດສັນໃນຕອນກາງຄືນກ່ອນທີ່ມັນຈະສະຫຼາຍຕົວຕອນໃດຕອນນຶ່ງໃນວັນພຸດມື້ນີ້.

ພາຍຸໄອໂອຕາໄດ້ພັດຂຶ້ນຝັ່ງໃນວັນຈັນຜ່ານມາ ຢູ່ແຄມຝັ່ງທະເລທາງພາກຕາ ເວັນອອກສຽງເໜືອຂອງນິກາຣາກົວ ໂດຍນຳເອົາລົມແຮງສູງສຸດເຖິງ 210 ກິ ໂລແມັດຕໍ່ຊົ່ວໂມງ ຊຶ່ງຕໍ່ມາໄດ້ພັດແຮງຂຶ້ນເຖິງ 250 ກິໂລແມັດຕໍ່ຊົ່ວໂມງແລະກາຍເປັນພາຍຸລະດັບ 5 ຊຶ່ງເປັນລະດັບທີ່ສູງສຸດຂອງການວັດແທກພະລັງການ ທຳລາຍຂອງພາຍຸ ທີ່ມີ 5 ລະດັບນັ້ນ.

ອ່ານຂ່າວນີ້ຕື່ມ ເປັນພາສາອັງກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG