ມື້ນຶ່ງຫຼັງຈາກພວກນັກຄົ້ນຫາ ໄດ້ຍົກເອົາສ່ວນຫາງຂອງເຮືອບິນ
ໂດຍສານ ສາຍການບິນ AirAsia ທີ່ຕົກລົງຢູ່ທະເລຈາວາ ຂຶ້ນມາ
ໄດ້ແລ້ວ ພວກນັກຄົ້ນຫາ ໄດ້ຍິນສຽງສັນຍານເພີ້ມຂຶ້ນ ໃນວັນ
ອາທິດມື້ນີ້ ຈາກເຄື່ອງບັນທຶກສຽງ ແລະຂໍ້ມູນເຮືອບິນ ທີ່ຍັງຫາຍ
ສາບສູນຢູ່ນັ້ນ.
ທ່ານ Muhammad Ilyas ຫົວໜ້າໜ່ວຍສຳຫລວດທາງເທັກໂນ
ໂລຈີ ກ່ຽວກັບພື້ນທະເລ ຂອງອົງການເທັກໂນໂລຈີອິນໂດເນເຊຍ
ເວົ້າວ່າ “ພວກເຮົາຈັບໄດ້ສັນຍານ ຢູ່ສະຖາທີ່ແຫ່ງນຶ່ງ ບ່ອນ
ທີ່ພວກເຮົາເຊື່ອວ່າ ມັນແມ່ນສັນຍານມາຈາກຫີບດຳ. ພວກ
ເຮົາ ໄດ້ກວດເບິ່ງສະຖານທີ່ດັ່ງກ່າວ 2 ຄັ້ງແລ້ວ ໂດຍໃຊ້
ເຄື່ອງບອກສະຖານທີ່ ຂອງສຽງສັນຍານ ທີ່ພວກເຮົາມີຢູ່ເທິງເຮືອ Baruna Jaya. ໃນຂັ້ນຕົ້ນ ພວກເຮົາຢາກຢ່ອນລົງ ເຄື່ອງສຳຫຼວດໃຕ້ນ້ຳ ຫຼື ROV ແຕ່ວ່າບໍ່ໄດ້ຮັບອະນຸຍາດ ຈາກອົງການຄົ້ນຫາ ແລະກູ້ໄພ ຍ້ອນຢ້ານກົວວ່າ ມັນຈະສ້າງຄວາມເສຍຫາຍ ໃນບໍລິເວນດັ່ງກ່າວ ສະນັ້ນຄະນະຄົ້ນຫາ ຈຶ່ງຕັດສິນໃຈ ສົ່ງບັນດານັກດຳນ້ຳ ລົງໄປຊອກຫາຫີບດຳ.”
ສ່ວນຫາງຂອງເຮືອບິນໄດ້ຖືກນຳຂຶ້ນມາສູ່ໜ້ານ້ຳທະເລໃນວັນເສົາວານນີ້ ໂດຍນຳໃຊ້
ອຸປະກອນຕ່າງໆ ທີ່ເຮັດໃຫ້ຟູຂຶ້ນມາໄດ້ ແຕ່ບັນດານັກສືບສວນສອບສວນ ບໍ່ສາມາດ
ກວດພົບເຫັນຫີບດຳຢູ່ໃນຫາງເລີຍ. ການເກັບກູ້ຫີບດຳຂຶ້ນມາໄດ້ນັ້ນ ແມ່ນມີຄວາມ
ສຳຄັນ ເພື່ອຮຽນຮູ້ໄດ້ເຖິງສາເຫດ ຂອງອຸບັດເຫດຍົນຕົກ ໃນວັນທີ 28 ທັນວາ ທີ່ເຮັດ
ໃຫ້ຜູ້ໂດຍສານ ພ້ອມດ້ວຍພະນັກງານການບິນທັງໝົດ 162 ຄົນຢູ່ໃນເຮືອບິນ ເສຍຊີວິດ.
ບັນດານັກຄົ້ນຫາ ຈັບໄດ້ສຽງສັນຍານຈາກຫີບດຳຂອງຖ້ຽວບິນ 8501ຄັ້ງທຳອິດ ເມື່ອ
ວັນສຸກຜ່ານມາ ແຕ່ບັນດາເຈົ້າໜ້າທີ່ກ່າວວ່າ ຫີບດຳນັ້ນ ປາກົດວ່າ ໄດ້ແຍກອອກຈາກ
ສ່ວນຫາງຂອງເຮືອບິນ.
