ໃນລາຍການຊີວິດຊາວລາວ ມື້ນີ້ ເຮົາຈະສະເໜີການສຳພາດ
ທ່ານສິງສົງຄາມ ມະນີລັດ ມີຊື່ຫລິ້ນວ່າ ເກົ້າ ຊາວການາດາ
ເຊື້ອສາຍລາວ ປັດຈຸບັນເປັນເຈົ້າຂອງບໍລິສັດໃຫ້ຄຳແນະນຳ
ກ່ຽວກັບລະບົບທະນາຄານ ທັງຍັງເປັນປະທານສູນສັງຄົມ
ວັດທະນາທຳລາວ ວັດເທບບັນດົນ ທີ່ເຂດນະຄອນ Montreal
ແຂວງ Quebec ປະເທດການາດາ. ເກົ້າ ແລະຄອບຄົວ ເຂົ້າມາຕັ້ງຖິ່ນຖານຢູ່ ປະເທດການາດາ ໃນປີ 1979 ເວລານັ້ນອາຍຸໄດ້ 5 ປີ ແຕ່ສາມາດປາກເວົ້າພາສາລາວໄດ້ຢ່າງຫລ່ຽນໄຫລ. ເກົ້າ ເປັນໂຕຢ່າງຄົນເຊື້ອສາຍລາວທີ່ດີອີກຄົນໜຶ່ງ ທີ່ປະສົບຜົນສຳເລັດດ້ານການສຶກສາ ໃນການປະກອບວິຊາອາຊີບ ແລະປັນຜູ້ນຳຂອງສັງຄົມ ຊຶ່ງ ກິ່ງສະຫວັນ ຈະນຳເອົາມາສະເໜີທ່ານ ໃນອັນດັບຕໍ່ໄປ.
ສະບາຍດີທ່ານຜູ້ຟັງທີ່ເຄົາລົບ ໃນລາຍການຊີວິດຊາວລາວມື້ນີ້ ຂ້າພະເຈົ້າຂໍແນະໃຫ້
ທ່ານຮູ້ຈັກກັບທ່ານສິງສົງຄາມ ມະນີລັດ ຊາວການາດາເຊື້ອສາຍລາວ ມາເຕີບໃຫຍ່ຢູ່
ປະເທດການາດາ ຊຶ່ງບັດນີ້ໄດ້ກາຍມາເປັນ ຜູ້ຊ່ຽວຊານໃຫ້ຄຳແນະນຳກ່ຽວກັບລະບົບ
ການເງິນການທະນາຄານ ທີ່ນະຄອນ Montreal ປະເທດ ການາດາ.
ທ່ານສິງສົງຄາມ ລູກຊາຍຜູ້ທີ່ເກົ້າ ມີຊື່ຫລິ້ນວ່າເກົ້າ ມີອ້າຍເອື້ອຍນ້ອງຮວມກັນທັງໝົດ
11 ຄົນ ທ່ານໄດ້ເລົ່າຊີວິດເບຶ້ອງຕົ້ນສູ່ ວີໂອເອ ຟັງດັ່ງນີ້ :
ນະຄອນ Montreal ປະເທດການາດາ ແຂວງ Quebec ເປັນເມືອງງົດງາມ ມີຊາຍແດນ
ທາງພາກຕາເວັນອອກສຽງໃຕ້ຕິດກັບ ສະຫະລັດ ອາເມຣິກາ ເປັນເມືອງທີ່ໃຊ້ພາສາຝຣັ່ງ
ເປັນພາສາລາດຊະການ ໂດຍສ່ວນໃຫຍ່ ເພາະສະນັ້ນ ຢູ່ໃນສະໄໝການປົກຄອງແຫ່ງ
ອະດີດພະລາຊາອານາຈັກລາວ ເມືອງ Montreal ຈຶ່ງເຄີຍໄດ້ມີອະດີດນັກສຶກສາລາວ
ຖືກສົ່ງມາສຶກສາອົບຮົມຢູ່ເປັນປະຈຳ ແລະຈຳນວນໜຶ່ງໄດ້ຕົກຄ້າງຢູ່ເລີຍ ແລະຕັ້ງຖິ່ນ
ຖານຢູ່ທີ່ນັ້ນຕໍ່ມາຈົນເທົ້າເຖິງປັດຈຸບັນນີ້. ທ່ານເກົ້າ ເກີດຢູ່ໃນຄອບຄົວໃຫຍ່ ເຕີບໃຫຍ່
ຢູ່ໃນເມືອງ Montreal ສະແຫວງຫາການສຶກສາຊັ້ນສູງ ທ່ານໄດ້ເລົ່າເຖິງພື້ນຖານການ
ຮຽນທີ່ນຳມາສູ່ຜົນ ສຳເລັດຂອງການປະກອບວິຊາອາຊີບ ແລະບໍລິຫານວຽກງານສູ່
ວີໂອເອ ຟັງດັ່ງນີ້ :
ທ່ານເກ້ົາ ໄດ້ຖືກລ້ຽງດູເບິ່ງແຍງຢູ່ໃນບັນຍາກາດ ຄອບຄົວທີ່ພໍ່ແມ່ພານັບຖື ສາດສະໜາພຸດ ເພາະສະນັ້ນ ທ່ານເກ້ົາຈຶ່ງມີຄວາມເຫລື້ອມໃສຕໍ່ພຸດທະສາ
ສະໜາຢ່າງໜັກແໜ້ນ. ປັດຈຸບັນນີ້ ທ່ານເປັນປະທານນຳພາ ສູນສັງຄົມ ວັດທະນາທຳລາວ ວັດປ່າເທບບັນດົນ ທີ່ເຂດນະຄອນ Montreal ທ່ານໄດ້ເລົ່າກ່ຽວກັບວຽກງານ ແລະກິດຈະການຂອງ ວັດປ່າເທບບັນດົນ ສູ່ຟັງດັ່ງນີ້ :
ທ່ານສິງສົງຄາມ ມະນີລັດ ຫລືເກົ້າ ເປັນໜຸ່ມນ້ອຍສະມາຊິກສັງຄົມການາລາວ ທີ່ຫ້າວ
ຫັນ ແລະເປັນໂຕຢ່າງທີ່ໜ້າສັນລະເສີນ. ນອກຈາກສຳເລັດການສຶກສາ ພ້ອມດ້ວຍຜົນ
ສຳເລັດດ້ານປະກອບວິຊາອາຊີບແລ້ວ ທ່ານຍັງເປັນຄົນເອື້ອເຟື້ອເພື່ອແຜ່ ແລະເປັນທີ່
ຮັກຫອມຂອງສັງຄົມ. ທ່ານໄດ້ສ້າງຄວບຄົວ ມີລູກນ້ອຍສອງຄົນ ແລະມີຊີວິດຢູ່ຢ່າງ
ເປັນສຸກ.
