ທ່ານຜູ້ຟັງທີ່ເຄົາລົບ ລາຍການຊີວິດຊາວລາວແລງວັນພະຫັດ
ມື້ນີ້ຈະແມ່ນການສຳພາດ ຍານາງ ສຸກມານີ ແລະທ່ານພອນ
ໄຊ ຣາດຊະມຸນຕຣີຄູ່ຜົວເມຍນັກທຸກລະກິດ. ສຸກມະນີ ມີວຽກ
ການເຮັດເຕັມເວລາ ຢູ່ບໍລິສັດສົ່ງເຄື່ອງ ແຕ່ນອກຈາກນັ້ນແລ້ວ
ຍັງເປັນຜູ້ຕາງໜ້າບໍລິສັດຂາຍເຄຶ່ອງເຮືອນ ແລະເຄື່ອງໃຊ້ຕ່າງໆ
ທີ່ນຳລາຍໄດ້ພິເສດເຂົ້າມາສູ່ຄອບຄົວຫລາຍພັນໂດລາຕໍ່ເດືອນ
ທ່ານພອນໄຊ ມີທຸລະກິດຂາຍປີ້ເຮືອບິນຂອງຕົນເອງທີ່ເຮັດວຽກ
ຢູ່ເຮືອນ ແລະມີໂອກາດໄດ້ເດີນທາງໄປທ່ອງທ່ຽວຢູ່ເລື້ອຍໆ ຊຶ່ງ
ກິ່ງສະຫວັນ ຈະນຳເລື່ອງ ນີ້ມາສະເໜີທ່ານ ໃນອັນດັບຕໍ່ໄປ.
ສະບາຍດີ ທ່ານຜູ້ຟັງທີ່ເຄົາລົບ ມື້ນີ້ ຂ້າພະເຈົ້າຈະແນະນຳໃຫ້ທ່ານຮູ້ຈັກກັບ ຍານາງ ສຸກ
ມະນີ ວັນນະພອນ ແລະທ່ານພອນໄຊ ຣາດຊະມຸມຕຣີ ທີ່ລັດໂອຮາຍໂອ ທາງພາກກາງ
ຂ້ອນໄປທາງຕາເວັນຕົກຂອງ ສະຫະລັດ. ທັງສອງເປັນຄູ່ຜົວເມຍ ທີ່ໄດ້ປະສົບຜົນສຳເລັດ
ສູງໃນການປະກອບອາຊີບ. ປັດຈຸບັນນີ້ ສຸກມະນີ ເຮັດວຽກໃຫ້ແກ່ ບໍລິສັດສົ່ງເອກະສານ
ແຫ່ງນຶ່ງໃນ ເມືອງໂຄລົມບັສ ແລະ ທ່ານພອນໄຊ ມີບໍລິສັດຂາຍປີ້ເຮືອບິນ ຂອງຕົນເອງ
ຊື່ວ່າ Asia Around the World.
ນອກຈາການເຮັດວຽກເຕັມເວລາດັ່ງກ່າວນີ້ແລ້ວ ສຸກມະນີ
ຍັງເປັນຜູ້ຕາງໜ້າ ຂາຍເຄື່ອງໃຫ້ແກ່ ບໍລິສັດຜະລິດເຄື່ອງໃຊ້
ຕ່າງໆ ທີ່ຂາຍທາງໂທລະສັບ ແລະອິນເຕີແນັດ ຊຶ່ງລາວຕ້ອງ
ໄດ້ອະທິບາຍສິນຄ້າໃຫ້ແກ່ພວກລູກຄ້າຟັງ ເຊັ່ນວ່າ ເຄື່ອງໃຊ້
ພາຍໃນເຮືອນ ຢາປົວພະຍາດ ຢາປັບປຸງສຸຂະພາບຕ່າງໆ ອາ
ຫານການກິນ ແລະເຄື່ອງສຳອາງເຫລົ່ານີ້ເປັນຕົ້ນ. ຍ້ອນຄວາມ
ດຸໝັ່ນ ຂະຫຍັນຂັນແຂງ ມີພອນສະຫວັນໃນການປາກເວົ້າ
ສຸກມະນີ ຈຶ່ງສາມາດດຶງດູດລູກຄ້າ ທີ່ເປັນຄົນລາວ-ອາເມຣິກັນ ແລະຄົນມາຈາກປະເທດ
ອຶ່ນໆ ແລະໄດ້ສ້າງລາຍໄດ້ພິເສດເຂົ້າມາສູ່ຄອບຄົວ ຫລາຍພັນໂດລາຕໍ່ເດືອນ ຈົນໄດ້ຮັບ
ກຽດໃນລະດັບກາງ ທີ່ເຫັນວ່າເປັນລະດັບທີ່ກ້າວຂື້ນມາໄດ້ຍາກສົມຄວນ ໃນວົງການຊື້ຂາຍທາງອອນລາຍ.
ຊີວິດຄວາມຮັກຂອງນັກທຸລະກິດຄູ່ນີ້ ເກີດຂື້ນເມື່ອສິບປີກ່ອນ ເວ
ລານັ້ນ ຊາຍໜຸ່ມລາວ- ອາເມຣິກັນ ທ່ານພອນໄຊ ຣາດຊະມຸນຕີ
ໄດ້ເດີນທາງໄປຢ້ຽມຢາມ ຫລີ້ນບຸນປີໃໝ່ທີ່ ນະຄອນຫລວງພະ
ບາງ ແລະໄດ້ຖ່າຍຮູບ ບັນດານາງສັງຂານ ຊຶ່ງຢູ່ໃນນັ້ນມີຮູບຂອງ
ສຸກມະນີ ວັນນະພອນ ຮ່ວມຢູ່ນຳ. ຮູບພາບອັນງົດງາມຂອງນາງ
ໄດ້ເຮັດໃຫ້ ທ່ານພອນໃຊ ຕ້ອງໄດ້ປ່ອຍຫົວໃຈໄວ້ທີ່ ນະຄອນ
ຫລວງພະບາງ ແລະໃນທີ່ສຸດກໍຕ້ອງໄດ້ກັບຄືນໄປຮັບເອົາຫົວໃຈ
ຂອງຕົນນັ້ນກັບຄືນມາ ສະຫະລັດ ໃນປີ 2004 ພ້ອມດ້ວຍສຸດທີ່
ຮັກ ຍານາງ ສຸກມະນີ. ທັງສອງໄດ້ສ້າງເຮືອນຫໍ ຄອບຄົວນຳກັນ
ຢູ່ທີ່ ເມືອງໂຄລົມບັສ ລັດໂອຮາຍໂອ.
ສຸກມານີ ວັນນະພອນ ເກີດທີ່ເມືອງຫລວງມີໄຊ ແຂວງໄຊຍະບຸລີ ອະດີດນັກສຶກສາ ມະຫາ
ວິທະຍາໄລຫລວງພະບາງ ຮຽນສຳເລັດປະລິນຍາຕີ ຝ່າຍພາສາອັງກິດ ນາງໄດ້ເລົ່າຊີວິດ
ເບື້ອງຕົ້ນກ່ຽວກັບການມາຮອດ ສະຫະລັດ ໃໝ່ໆ ແລະ ປະສົບການໃນການເລີ້ມໃຊ້ພາສາ
ອັງກິດ ສູ່ ວີໂອເອ ຟັງວ່າ
ນັບແຕ່ ສຸກມານີ ໄດ້ເຂົ້າມາຕັ້ງຄອບຄົວຢູ່ໃນ ສະຫະລັດ ນາງໄດ້ປ່ຽນວຽກເຮັດຫລາຍ
ຢ່າງ ແລະປັດຈຸບັນນີ້ເຮັດຢູ່ບໍລິສັດ ສົ່ງເອກກະສານ ແຕ່ວ່າຄວາມ ບໍ່ເພິ່ງພໍໃຈນັ້ນໄດ້ເຮັດ
ໃຫ້ ສຸກມະນີ ສະແຫວງຫາວຽກໃໝ່ໄປເລື້ອຍໆ ແລະບັດນີ້ ນາງໄດ້ພົບພໍ້ທຸລະກິດທີ່ນາງ
ມັກເຮັດຄື ເປັນຜູ້ຕາງໜ້າຂາຍສິນຄ້າ ທີ່ນຳລາຍໄດ້ມາສູ່ຄອບຄົວຫລາຍພັນໂດລາຕໍ່
ເດືອນ ທີ່ບໍ່ໄດ້ຄິດຝັນມາກ່ອນ ສຸກມານີ ໄດ້ເລົ່າຕໍ່ໄປວ່າ :
ສຸກມະນີ ບອກໄດ້ແຕ່ວ່າ ບັນດາລູກຄ້າທີ່ມີຄວາມສົນໃຈ ຕ້ອງຜ່ານການໂອ້ລົມ ອະທິບາຍ
ຈາກນາງເສຍກ່ອນ ໂດຍທາງໂທລະສັບ ຫລັງຈາກນັ້ນ ສຸກມະນີ ຈະເປັນຜູ້ແນະນຳກ່ຽວ
ກັບຄຸນນະພາບຂອງສິນຄ້າຕ່າງໆ ນາງເລົ່າຕໍ່ ວີໂອເອ ອີກວ່າ :
ການຫາຢູ່ຫາກິນ ຢູ່ໃນສະຫະລັດ ແມ່ນມີໂອກາດເປີດກວ້າງໃຫ້ແກ່ທຸກຄົນ ທີ່ຂະຫຍັນ
ໝັ່ນພຽນ ເຖິງຢ່າງໃດກໍດີ ບໍ່ໄດ້ໝາຍຄວາມວ່າ ທຸກຄົນຈະມີຄວາມສາມາດປະຕິບັດໄດ້ຄື
ກັນໝົດ. ສຸກມະນີ ຮັບຮູ້ດ້ວຍຕົນເອງວ່າ ບໍ່ມັກການຄ້າການຂາຍ ແຕ່ວ່າ ບັດນີ້ໄດ້ປະສົບ
ຜົນສຳເລັດ ເປັນຜູ້ຂາຍສິນຄ້າໄດ້ຫລາຍໃນແຕ່ລະເດືອນ ແລະຕົກຢູ່ໃນຕຳແໜ່ງລະດັບ
ກາງ ຂອງຈຳນວນສິບກວ່າລະດັບ ຊັ້ນ ຂອງຜູ້ມີຄວາມສາມາດຂາຍໄດ້ຫລາຍ ສຸກມະນີ
ກ່າວມ້ວຍທ້າຍວ່າ :
ທ່ານພອນໄຊ ຣາດຊະມຸນຕີ ອ້າຍກົກຂອງອ້າຍນ້ອງສີ່ຄົນ ພໍ່ເປັນອະດີດ ສາລະວັດທະ
ຫານ ໃນກອງທັບແຫ່ງພະລາດຊາອານາຈັກລາວ. ໃນປີ 1975 ຄອບຄົວ ຣາດຊະມຸນຕີ
ທັງໝົດຫົກຄົນໄດ້ຖືກສົ່ງໄປຢູ່ສູນສຳມະນາ ທີ່ຊຽງຂວາງ ພາກເໜືອຂອງປະເທດລາວ
ເປັນເວລາແປດປີ ບ່ອນທີ່ ພອນໄຊ ເຕີບໃຫຍ່ຂື້ນມາ. ພອນໃຊ ເລົ່າເຖິງເບື້ອງຫລັງ
ທີ່ນຳໄປສູ່ຜົນສຳເລັດ ຂອງການສ້າງຕັ້ງຊີວິດ ຢູ່ໃນສະຫະລັດ ວ່າ :
ສະຫະລັດ ອາເມຣິກາ ເປັນປະເທດທີ່ເປີດກວ້າງ ໃຫ້ໂອກາດ
ແກ່ທຸກໆຄົນທີ່ເຂົ້າມາເພີ່ງພາອາໄສ ນັບຕັ້ງແຕ່ການສຶກສາ ຈົນເຖິງການທຳມາຫາກິນ ຫລື ຫລີ້ນການເມືອງ. ເພາະສະນັ້ນ ສະຫະລັດ ຈຶ່ງເກືອບວ່າ ເປັນປະເທດດຽວໃນໂລກ ທີ່ໃຫ້ໂອກາດທຽບເທົ່າແກ່ທຸກໆຄົນຢ່າງສະເມີພາບ ໂດຍບໍ່ກ່ຽວຂ້ອງກັບຜີວພັນ ເຊື້ອຊາດ ເພດ
ແລະແນວຄິດທາງ
ການເມືອງ.
