ສະບາຍດີ ທ່ານຜູ້ຟັງທີ່ເຄົາລົບ ວັນແມ່ ທີ່ຊາວອາເມຣິກັນ
ສະຫລອງກັນມາທຸກໆປີ ໃນວັນອາທິດ ທຳອິດຂອງ ຕົ້ນເດືອນ
ພຶດສະພາ. ສຳລັບປີນີ້ ກໍແມ່ນໄດ້ຜ່ານພົນໄປແລ້ວ ແຕ່ມັນກໍບໍ່
ຫລ້າສວຍທີ່ເຮົາຈະໃຫ້ກຽດແກ່ ມານດາຜູ້ມີບຸນຄຸນລົ້ນເຫລືອ
ເພາະສະນັ້ນ ເຮົາຈຶ່ງຈະນຳເອົາລາຍງານ ແລະການສຳພາດ
ກັບບັນດາລູກຫລານ ເດັກນ້ອຍນັກຮຽນລາວ-ອາເມຣິກັນ ທີ່
ກຳລັງພາກັນຮຽນພາສາລາວ ແລະວັດທະນາທຳລາວ ໃຫ້ຮູ້
ຈັກເຖິງ ບຸນຄຸນຂອງແມ່ ມາສູ່ທ່ານຟັງ. ການສະຫລອງ ວັນແມ່
ດັ່ງກ່າວນີ້ ໄດ້ຈັດຂື້ນໂດຍ ສະມາຄົມ ສະຕີລາວ-ອາເມຣິກັນ
ປະຈຳນະຄອນຫລວງ ວໍຊິງຕັນ ດີ.ຊີ ຊຶ່ງ ກິ່ງສະຫວັນ ຈະນຳ
ເລື້ອງນີ້ມາສະເໜີທ່ານ.
ສະບາຍດີ ທ່ານຜູ້ຟັງທີ່ເຄົາລົບ ວັນອາທິດທຳອິດ ຂອງຕົ້ນເດືອນ ແມ່ນບຸນສະຫລອງວັນ
ແມ່ ຢູ່ໃນ ສະຫະລັດ ອາເມຣິກາ ເພາະສະນັ້ນ ເຮົາຈະສັງເກດເຫັນ ບັນຍາກາດທີ່ເຕັມໄດ້
ດ້ວຍ ພວງດອກໄມ້ ເຕົ້າດອກໄມ້ ທີ່ຖືກຕົກແຕ່ງໄວ້ຢ່າງງົດງາມ ເພື່ອໃຫ້ບັນດາລູກເຕົ້າ
ພາກັນຊື້ໄປມອບໃຫ້ແມ່. ນອກຈາກນັ້ນອີກແລ້ວ ບັນດາລູກເຕົ້າຕ່າງກໍພາແມ່ ແລະພໍ່
ອອກໄປຮັບປະທານອາຫານ ຊື້ຂອງຂວັນໃຫ້ ຫລືບໍ່ດັ່ງນັ້ນກໍມອບເງິນໃຫ້ ເພື່ອສະແດງ
ໃຫ້ເຫັນເຖິງຄວາມຮູ້ບຸນຄຸນ ກະຕັນຍູ ຕໍ່ບັນດາແມ່ ຜູ້ບັງເກີດເກົ້າຂອງພວກລູກໆ.
ໃນຕອນແລງວັນສຸກ ທີ່ 8 ພຶດສະພາ ທີ່ຜ່ານມານີ້ ສະມາຄົມສະຕີ ລາວ-ອາເມຣິກັນ
ປະຈຳເຂດ ນະຄອນຫລວງ ວໍຊິງຕັນ ດີ.ຊີ ໄດ້ຈັດງານສະຫລອງ ວັນແມ່ ໂດຍການນຳ
ພາຂອງ ສະມາຄົມສະຕີລາວ-ອາເມຣິກັນ ໂດຍມີ ທ່ານນາງ ແກ້ວມະນີວັນ ສີຫາລາດ
ເປັນປະທານ. ໃນຄຳ່ຄືນມື້ນີ້ ມີບັນດາສະມາຊິກ ປະຊາຄົມລາວ-ອາເມຣິກັນ ແລະແຂກຜູ້
ມີກຽດເຂົ້າຮ່ວມຢ່າງໜາແໜ້ນ. ການສະຫລອງ ວັນແມ່ຄັ້ງນີ້ໄດ້ເນັ້ນໜັກໃສ່ ການສິດສອນ
ບັນດາເຍົາວະຊົນ ລາວ-ອາເມຣິກັນ ທີ່ເກີດໃຫຍ່່ຢູ່ໃນ ສະຫະລັດ ໃຫ້ຮູ້ຈັກປາກເວົ້າພາສາ
ລາວ ຮັກສາຮິດຄອງ ຂະນົບທຳນຽມ ປະເພນີລາວ ແລະຮູ້ບຸນຄຸນຂອງ ບິດາມານດາ.
ບັນດາເຍົາວະຊົນລາວ-ອາເມຣິກັນ ພາກັນສະແດງການຫລີ້ນດົນຕີ ພື້ນເມືອງລາວ ຟ້ອນ
ພື້ນເມືອງລາວ ແລະສະແດງເຖິງຄວາມສາມາດໃນການປາກເວົ້າ ພາສາລາວ ແລະກ່າວ
ກາບກອນ ໃຫ້ບັນດາແມ່ທັງຫລາຍ ແລະແຂກທີ່ເຂົ້າຮ່ວມໄດ້ຟັງ ແລະຊົມດັ່ງຕໍ່ລົງໄປນີ້ :
ນັກຮຽນຜູ້ທຳອິດໄດ້ແກ່ ທ້າວ Noland Keokhamphanh Alexander ເປັນເດັກນ້ອຍ
ລາວ-ອາເມຣິກັນ ທີ່ມີພອນສະຫວັນ ໃນການປາກເວົ້າ ແລະເປັນນັກ ຮຽນທີ່ດີເດັ່ນຢູ່ໃນ
ໂຮງຮຽນ Noland ໄດ້ມາຮຽນພາສາລາວບໍ່ໄດ້ຂາດ ແລະກໍມີຄວາມມັກຮັກພາສາລາວ
ທີ່ເປັນພາສາຂອງແມ່ ທ້າວ Noland ໄດ້ກ່າວຕໍ່ ວີໂອເອ ວ່າ :
ເດັກຊາຍອີກຄົນນຶ່ງກໍຄື ທ້າວ ພູແກ້ວ Ryan ພົມມະຈັນ ບັດນີ້ເຮົາມາລອງຟັງ ການເວົ້າ
ພາສາລາວ ເວົ້າກາບກອນລາວ ຂອງ Ryan ເບິ່ງດຸວ່າລາວເວົ້າໄດ້ໜ້ອຍຫລາຍປານໃດ.
ທ່ານພູສຸດທີ່ຮັກ ພົມມະຈັນ ພໍ່ຂອງທ້າວ Ryan ແມ່ນຜູ້ປົກຄອງຄົນນຶ່ງທີ່ໄດ້ເອົາໃຈໃສ່
ອາສາສະມັກ ພາລູກເຕົ້າມາຮຽນທຸກໆວັນອາທິດ ນອກຈາກນັ້ນ ທ່ານຍັງເປັນນາຍຄູ
ອອກແບບການສິດສອນໃຫ້ແກ່ພວກເດັກນັກຮຽນ
ຍານາງ Sunny Mann ສະຕີລາວ-ອາເມຣິກັນ ຄົນນຶ່ງທີ່ໄດ້ເດີນທາງມາຈາກລັດ
Michigan ຢູ່ທາງພາກເໜືອທາງທິດຕາເວັນອອກຂອງ ສະຫະລັດ ກໍໄດ້ມາໃຫ້ກຳລັງໃຈ
ແກ່ລູກຫລານ ວີໂອເອ ໄດ້ຖືໂອກາດນີ້ຖາມຂ່າວ ຊຶຶ່ງ Sunny ໄດ້ກ່າວວ່າ :
ບຸນສະຫລອງວັນແມ່ ໄດ້ສີ້ນສຸດລົງດ້ວຍຄວາມມ່ວນຊື່ນລື່ນເລິງ ທີ່ໄດ້ເຫັນບັນດາເຍົາວະ
ຊົນລາວ-ອາເມຣິກັນ ຜູ້ເກີດໃໝ່ໃຫຍ່ລຸ່ນ ພາກັນຕັ້ງອົກຕັ້ງໃຈຮຳຮຽນ ພາສາລາວ ໂດຍ
ການເອົາໃຈໃສ່ຢ່າງໃກ້ຊິດຈາກພໍ່ແມ່ ຜູ້ປົກຄອງ. ແຕ່ກ່ອນຈະຈາກໄປ ໃນຄຳ່ຄືນວັນນີ້ ຂ້າພະເຈົ້າ ຂໍຝາກກາບກອນ ທີ່ຂຽນໂດຍ ທ່ານບຸນຜົງ ພົມທະວົງສ ເພື່ອເປັນກຽດວັນ
ແມ່ ແລະຂໍມອບໃຫ້ບັນດາຜູ້ເປັນແມ່ທັງຫລາຍ.
ຄວາມຮັກຂອງແມ່
ແມ່ນີ້ ຮັກລູກເຕົ້າ ທຽບເທົ່າດວງຊີວາ
ຮັກບຸດຕີ ບຸດຕາ ແມ່ນຊີວາກໍຍອມໃຫ້
ຕັ້ງແຕ່ ຖືພາທ້ອງ ເກົ້າເດືອນຈົນວັນເກີດ
ແມ່ເຊີດຊູ ຫໍ່ຕູ້ມ ບຸດຕາແກ້ວເກິ່ງໃຈ
ນັບແຕ່ ວັນແມ່ຮູ້ ວ່າມີລູກໃນຄັນ
ແມ່ກໍພລັນ ດີໃຈ ທີ່ຈະມີຄົນນ້ອຍ
ແມ່ພອຍ ວານວອນໄຫວ້ ໂພຍໄພຢ່າມາບຽດ ລູກເດີ
ໃຫ້ລູກ ແຂງເກັ່ງກ້າ ເກີດມາທ້ອນ ໃຫ້ແມ່ແພງ.
ຝາຕີນແດງ ແມ່ອູ້ມ ອົບອຸ່ນທັງກາຍໃຈ
ໃຫ້ນົມ ພຽນອາຫານ ຈຶ່ງໃຫຍ່ມາເປັນເຈົ້າ
ຍາມນອນ ແມ່ຍອມເຝົ້າ ເກົາຫົວລູບຂະໝ່ອມ
ຍາມເມື່ອ ໂຕໝົ່ນເປື້ອນ ແມ່ສົງລ້າງແຕ່ງກາຍ
ເຍົາໄວ ແມ່ສົ່ງນ້ອຍ ຮັບສົ່ງໄປໂຮງຮຽນ ຈິງແລ້ວ
ແມ່ພຽນ ສອນວາຈາ ເລືອກພາສາຄຳເວົ້າ
ຍາມລົມລຸງ ລົມປ້າ ຂານຄຳນຳຜູ້ໃຫຍ່
ຮູ້ຈັກຈາ ອ່ອນນ້ອມ ຕາມຄອງເຄົ້າເຫລົ່າກໍ ແມ່ເອີຍ
ແມ່ພ່ຳເຕືອນ ລູກນ້ອຍ ຈິດຈົດຕໍ່ການຮຽນ
ຮຽນເກັ່ງ ເກີນວິຊາ ເພີ່ມພະຫຍາຄວາມຮູ້
ສອນ ມີໃຈແພງເຊື້ອ ພົງພັນທີ່ເກີດຮ່ວມ
ຊ່່ວຍເຫລືອ ຍາມຍາກຮ້າຍ ແນວນັ້ນຊິຈຶ່ງຄວນ ລູກເນີ
ແມ່ຫວັງ ໃຫ້ລູກແກ້ວ ແຜ່ວເພິ່ງໃນຄອງທັມ
ໃຫ້ບຳເພັນ ຄວາມດີ ຈົ່ງມັ່ງມີເງິນລ້ານ
ແມ່ບໍ່ ຫວັງຫຍັງແທ້ ແທນພະຄຸນການເກີດ ແມ່ແລ້ວ
ຂໍແຕ່ລູກ ແກ່ນແກ້ວ ຈະເລີນແລ້ວ ແມ່ອິ່ມໃຈ ແທ້ນາ
