ທ່ານຜູ້ຟັງທີ່ເຄົາລົບ ມື້ນີ້ແມ່ນຄໍ່າຄືນກ່ອນວັນປີໃໝ່ ຄ.ສ 2016
ທີ່ກຳລັງເຄື່ອນຍ້າຍເຂົ້າມາໃນບໍ່ເທົ່າໃດຊົ່ວໂມງຂ້າງໜ້ານີ້.
ເພາະສະນັ້ນ ລາຍການ ຊີວິດຊາວລາວຂອງເຮົາຈຶ່ງຈະນຳພາ
ທ່ານໄປຢ້ຽມຢາມຖາມຂ່າວ ຊາວລາວທີ່ ດຳລົງ ຊີວິດຢູ່ຫົນແຫ່ງ
ຕ່າງໆ ໃນໂອກາດວັນປີໃໝ່ນີ້ ວ່າພວກທ່ານເຫລົ່ານັ້ນ ແຕ່ລະຄົນ
ໄດ້ຕັ້ງເປົ້າໝາຍໄວ້ຢ່າງໃດແດ່ສຳລັບປີໃໝ່ ຊຶ່ງ ກິ່ງສະຫວັນ ຈະນໍາມາສະເໜີທ່ານໃນອັນດັບຕໍ່ໄປ.
ສະບາຍດີປີໃໝ່ ທ່ານຜູ້ຟັງທີ່ເຄົາລົບ ທີ່ທ່ານໄດ້ຟັງຜ່ານໄປນັ້ນແມ່ນ ສຽງໂຮ່ຮ້ອງ ແລະ
ນັບຖອຍຫລັງຕ້ອນຮັບປີໃໝ່ສາກົນ ປີ 2016 ທີ່ກຳລັງດຳເນີນຢູ່ໃນແຫ່ງຕ່າງໆທົ່ວທຸກ
ມຸມໂລກໃນຂະນະນີ້.
ມື້ນີ້ແມ່ນຄ່ຳຄືນສຸດທ້າຍເພື່ອສັ່ງລາປີ 2015 ແລະຕ້ອນຮັບປີໃໝ່ ຄ.ສ 2016 ເພາະສະ
ນັ້ນ ລາຍການຊີວິດຊາວລາວ ຂອງ ວີໂອເອ ຈຶ່ງຈະນຳເອົາຮີດຄອງປະເພນີການສະ
ຫລອງບຸນປີໃໝ່ສາກົນມາສະເໜີທ່ານ ທີ່ກຳລັງດຳເນີນກັນຢູ່ທົ່ວໂລກ. ອິດທິພົນຄວາມ
ຍິ່ງໃຫຍ່ຂອງການສະຫລອງບຸນປີໃໝ່ສາກົນ ໄດ້ແຜ່ຂະຫຍາຍອອກໄປທົ່ວທຸກຫົນແຫ່ງ
ເພາະວ່າ ປະຊາຄົມໂລກພາກັນໃຊ້ ປະຕິທິນສາກົນເປັນພື້ນຖານ ເພື່ອປະກອບທຸລະ
ກິດ ແລະການດຳລົງຊີວິດປະຈຳວັນ.
ຊາວໂລກຜູ້ເລີ້ມສະຫລອງຕ້ອນຮັບໃໝ່ປີໃໝ່ສາກົນ ກ່ອນທຸກໆບ່ອນແມ່ນ ຊາວເກາະ
Samoa, Christmas Island and Kiribati ທີ່ຕັ້ງຢູ່ເຂດມະຫາສະມຸດປາຊິຟິກ ຫລັງ
ຈາກນັ້ນກໍຕິດຕາມກັນເປັນລຳດັບ ເຊັນຂົງເຂດເອເຊຍຢູໂຣບ ອາຟຣິກາ ອາເມຣິກາໃຕ້
ແລະ ສະຫະລັດ ອາເມຣິກາ.
ປີໃໝ່ ຄ.ສ 2016 ປີນີ້ ຕົກຖືກວັນສຸກມື້ອຶ່ນ ເປັນວັນພັກປີໃໝ່ ຕໍ່ໃສ່ກັບວັນເສົາ ແລະອາ
ທິດ ເພາະສະນັ້ນ ເປັນໂອກາດອັນດີເລີດ ແກ່ບັນດາຜູູູ້ຄົນທີ່ຈະພາກັນສະຫລອງຢ່າງເຕັມ
ທີ່. ໃນຂະນະນີ້ເປັນເວລາ 7 ໂມງປາຍ ຕອນເຊົ້າ ຕາມເວລາທ້ອງຖິ່ນທີ່ ນະຄອນຫລວງ
ວໍຊິງຕັນ ດີ.ຊີ ແລະເປັນເວລາ 7 ໂມງປາຍ ຕອນແລງຢູ່ເມືອງລາວ ຊຶ່ງຜູ້ຄົນກຳລັງເລີ້ມ
ເຕົ້າໂຮມກັນຢູ່ສະຖານທີ່ຕ່າງໆເພື່ອຕ້ອນຮັບປີໃໝ່ ໃນອີກບໍ່ເທົ່າໃດຊົ່ວໂມງຂ້າງໜ້ານີ້.
ໃນຂະນະດຽວກັນນີ້ ຢູ່ຕາມຈະຕຸລັດ ສະຖານທີ່ອັນສຳຄັນຕ່າງໆທົ່ວໂລກ ໂດຍສະເພາະ
ຢ່າງຍິ່ງ ຢູ່ພາກຕາເວັນອອກຂອງ ສະຫະລັດ ຮວມທັງ ນະຄອນຫລວງ ວໍຊິງຕັນ ດີ.ຊີ
ແລະ Time Square ນະຄອນນິວຢອກ ໃນອີກ 16 ຊົ່ວໂມງຂ້າງໜ້ານີ້ ຈະມີການນັບ
ຖອຍຫລັງ ຢູ່ບ່ອນທີ່ຝູງຊົນຫລາຍແສນ ຄົນ ກຳລັງເຕົ້າໂຮມກັນຢູ່ຢ່າງໜາແໜ້ນ. ຢູ່ຕາມ
ບ້ານເຮືອນ ຮ້ານອາຫານ ແລະໂຮງແຮມ ຜູ້ຄົນກໍແມ່ນພາກັນເຕັ້ນລຳ ກິນ ແລະດື່ມຢ່າງ
ສະໜຸກສະໜານມະໂຫລານ ລໍຖ້າໃຫ້ທ່ຽງຄືນມາເຖິງ ເພື່ອຕ້ອນຮັບວັນຮຸ່ງເຊົ້າປີໃໝ່. ພໍ
ແຕ່ເຂັມໂມງ ຍ້າຍມາເຖິງນຶ່ງວິນາທີຂອງມື້ໃໝ່ ວັນທີ 1 ເດືອນມັງກອນ ສຽງ ລະຄັງຢູ່ຕາມ
ໂບດຕ່າງໆກໍຈະດັງຂື້ນ ຝູງຊົນພາກັນຮ້ອງໂຮ ກອດກັນ ຄູ່ຜົວເມຍ ບ່າວສາວກໍຈະຈູບກັນ
ມີ ການຈູດບັ້ງໄຟດອກຢ່າງຝົດສະໜັ່ນສົ່ງແສງສີໄປທົ່ວທ້ອງຟ້າແລະບໍລິເວນອ້ອມແອ້ມ.
ປີໃໝ່ຟ້າໃໝ່ ເປັນວາລະໂອກາດອັນດີ ແກ່ບັນດາຍາດຕິພີ່ນ້ອງ ແລະເພື່ອນຝູງ ພາກັນ
ໃຫ້ພອນອັນປະເສີດແກ່ກັນ ປະລະສິ່ງທີ່ບໍ່ເປັນມົງຄຸນນັ້ນໄວ້ກັບປີເກົ່າ ແລະຕັ້ງອະທິຖານ
ໄວ້ຕ່າງໆນາໆວ່າ ວ່າຈະເລີ້ມເຮັດຫລາຍສິ່ງຫລາຍຢ່າງໃນສິ່ງທີ່ຕົນລົ້ມແຫລວນັ້ນໃຫ້ໄດ້
ເຊັ່ນວ່າ ລົດຄວາມອ້ວນ ອອກກຳລັງກາຍ ແລະອຶ່ນໆ.
ບັດນີ້ເຮົາມາຟັງບັນດາພີ່ນ້ອງເຊື້ອສາຍລາວຈຳນວນໜຶ່ງ ທີ່ມາໃຫ້ພອນ ແລະ ກ່າວເຖິງ
ຕັ້ງເປົ້າໝາຍໄວ້ກັບປີໃໝ່ ຄ.ສ 2016 ທີ່ກຳລັງກ້າວເຂົ້າມານີ້ຢ່າງໃດ:
ບັດນີ້ ເຮົາຈະນຳພາທ່ານ ໄປຢ້ຽມຢາມຖາມຂ່າວ ທ່ານພອນແກ້ວ ວໍລະຂູນ ທີ່ນະຄອນ
ຫລວງວຽງຈັນ ສປປ ລາວ ວ່າທ່ານກຳລັງຫ້າງຫາຕຽມພ້ອມຢ່າງໃດແດ່:
ນັ້ນແມ່ນການຫ້າງຫາສະຫລອງທີ່ ພາກພື້ນເອເຊຍອາຄະເນ ບັດນີ້ ຂ້າພະເຈົ້າຈະພາ
ທ່ານໄປຖາມຂ່າວ ທ່ານຈັນສົມ ສີຣິວັນ ນັກປະພັນເພງ ທີ່ມີຊື່ສຽງຂອງປະຊາຄົມລາວ ປັດຈຸບັນນີ້ ທ່ານອາພັກພາໄສຢູ່ໃນລັດ Oregon ທາງພາກຕາເວັນຕົກສຽງເໜືອຂອງ
ສະຫະລັດ ທ່ານ ໄດ້ມາກ່າວຕໍ່ບັນດາຍາດຕິພີ່ນ້ອງລາວ ທີ່ຢູ່ໃກ້ ແລະໄກດັ່ງນີ້ :
ຕໍ່ມາກໍແມ່ນ ທ່ານທະນູສັກ ທັມມະຈັກ ຢູ່ທີ່ລັດ Massachusetts ທາງພາກຕາເວັນອອກ
ສຽງເໜືອ ຂອງ ສະຫະລັດ ທ່ານໄດ້ມາກ່່າວຄຳອວຍພອນດັງນີ້ :
ສຸດທ້າຍນີ້ິ ຂ້າພະເຈົ້າ ຂໍແນະນຳໃຫ້ທ່ານຮູ້ຈັກກັບ ທ່ານບຸນຜົງ ພົມມະວົງ ຢູ່ທີ່ເຂດ
ນະຄອນຫລວງ ວໍລິງຕັນ ດີ.ຊີ ຊຶ່ງທ່ານໄດ້ຝາກ ກາບກອນມາໃຫ້ ຂ້າພະເຈົ້າ ອ່ານໃຫ້
ພອນແດ່ບັນດາຍາດຕິພີ່ນ້ອງຊາວລາວ ທີ່ຢູ່ໃກ້ແລະໄກ ດັ່່ງນີ້:
ອວຍພອນປີໃໝ່ 2016
ເນື່ອງໃນ ວັນແລກຕັ້ງ ຄ.ສ.ໃໝ່ວັນໄຊ
ວັນສົດໃສ ລາວັນ ເລີກງາມຍາມເຮົ້າ
ປັກສີ ຊົມແຊວຮ້ອງ ເນືອງນັນກ້ອງສະໜັ່ນ
ນາລີ ບານເບັ່ງຊ້ອນ ຫອມກຸ້ມທົ່ວນະຄອນ.
ຂໍໃຫ້ ປີໃໝ່ນີ້ ຈົ່ງຫາຍໂສກໂລຄາ
ຈິດໃຈ ເຄີຍມົວໝອງ ໂກດເຄືອງຄາແຄ້ນ
ໃຫ້ແລ່ນໜີ ຕາມເຈົ້າ ການເວລາປີເກົ່າ
ປີໃໝ່ ມາຮອດແລ້ວ ໃຫ້ຄາຍຮ້ອນຢູ່ເຢັນ.
ຂໍໃຫ້ ຊົນໂລກກວ້າງ ປະຊາລາດທັງປວງ
ໄຮ້ໂລຄາ ໄພທຸກ ໂຊກໄຊຈເລີນກ້າວ
ສັນຕິໄຊ ຄົງໝັ້ນ ມີເສຣີທຸກຫົນແຫ່ງ
ຫາຍສົງຄາມ ເຂັ່ນຂ້າ ຊາວເຊື້ອຢູ່ກະເສີມ.
ຂໍໃຫ້ ຊຸມຊາດເຊື້ອ ທຸກເຜົ່າປະຊາກອນ
ໂຮມຮັກ ສາມັກຄີ ຊ່ວຍແບ່ງເບົາຄວາມໄຮ້
ຮ່ວມໃຈແປງ ເມືອງບ້ານ ໂລກາໃຫ້ເຮືອງຮຸ່ງ
ສີວິໄລ ເກິ່ງກໍ້າ ສະຫວັນຟ້າເບື້ອງບົນ.
ອວຍພອນ ອາຍຸ ຍືນຢູ່ໝັ້ນ ພົ້ນຜ່ານພັນວັດສາ
ວັນນະ ສີສວຍງາມ ເລີດມະນີຄູນລໍ້າ
ສຸກຂະ ກາຍໃຈພ້ອມ ພັນປີຢ່າເຂີນຂາດ
ພະລະ ແຂງເກັ່ງກ້າ ພະລັງເຂັ້ມຕຼອດການ ທ່ານເນີ!
ວິທະຍຸ ວີໂອເອ ພາກພາສາລາວ ໄດ້ຮັບໃຊ້ບັນດາທ່ານຜູ້ຟັງມາແຕ່ປີ 1962 ແລະໄດ້
ນຳເອົາຂ່າວໂລກ ນະໂຍບາຍລັດຖະບານສະຫະລັດ ການຊ່ວຍເຫລືອ ແລະຮ່ວມມື
ຕ່າງໆ ຈົນຕົກທອດມາເຖິງປັດຈຸບັນ. ຈາກລະບົບວິທະຍຸຄື້ນສັ້ນ ມາສູ່ລະບົບອິນເຕີ
ແນັດຂອງສະໄໝໃໝ່. ປັດຈຸບັນນີ້ ວິທະຍຸ ວີໂອເອ ປະກອບດ້ວຍ 43 ພາສາຂອງໂລກ
ທີ່ອອກອາກາດສົດຕະຫລອດ 24 ຊົ່ວໂມງ 365 ມື້ຕໍ່ປີ ໂດຍທີ່ບໍ່ມີວັນຢຸດພັກເຊົາ ແລະ
ຍັງຈະດຳເນີນຢູ່ອີກຕໍ່ໄປ. ຂອບໃຈທີທ່ານຕິດຕາມຟັງ ວີໂອເອ ໂຊກດີປີໃໝ່.
