ທ່ານຜູ້ຟັງທີ່ເຄົາລົບ ໃນລາຍການຊີວິດຊາວລາວມື້ນີ້ ເຮົາຂໍແນະນຳໃຫ້ທ່ານຮູ້ຈັກກັບສະຕີອາເມຣິກັນເຊື້ອສາຍລາວ ທີ່ໜ້າຮັກ ເກີດທີ່ສູນອົບພະຍົບນະຄອນພະນົມ ປະເທດໄທ ມາເຕີບໃຫຍ່ຢູ່ໃນສະຫະລັດ ແລະຫາກໍສຳເລັດປະລິນຍາເອກຝ່າຍວິທະສາດໃນຕົ້ນປີ 2016. ດຣ. ສຸສະດາ ຈິດທະຈັກ ປັດຈຸບັນນີ້ເປັນຄູສອນຄະນິດສາດຢູ່ມະຫາວິທະຍາໄລ San Francisco ລັດ California. ຄວາມຍາກລຳບາກຂອງຄອບຄົວ ທີ່ໄດ້ນຳພາ ດຣ. ສຸສະດາ ມາປະສົບຜົນສຳເລັດໄດ້ຢ່າງໃດນັ້ນ ກິ່ງສະຫວັນ ຈະນຳເລື້ອງນີ້ມາສະເໜີທ່ານໃນອັນດັບຕໍ່ໄປ.
ສະບາຍດີທ່ານຜູ້ຟັງທີ່ເຄົາລົບ ໃນລາຍການຊີວິດຊາວລາວຂອງວິທະຍຸວີໂອເອ ແລງວັນພະຫັດມື້ນີ້ ເຮົາຈະນຳເອົາການສຳພາດ ດຣ. ສຸສະດາ ຈິດທະຈັກ ຍິງສາວອາເມຣິກັນ ເຊື້ອສາຍລາວ ທີ່ໜ້າຮັກ ຫາກໍ່ສຳເລັດປະລິນຍາເອກຝ່າຍວິທະຍາສາດ ເທັກໂນໂລຈີ ວິສະວະກອນ ຄະນິດສາດ ແລະການສຶກສາ.
ຄວາມເປັນມາຂອງຄອບຄົວ ດຣ. ສຸສະດາ ກ່ອນທີ່ໄດ້ເກີດຢູ່ໃນສູນອົບພະຍົບ ທີ່ນະຄອນພະນົມນັ້ນ ເຕັມໄປດ້ວຍການຜະຈົນໄພ ພົບກັບຄວາມທຸກຍາກລຳບາກ ພາຍໃຕ້ການ ປ່ຽນແປງລະບອບການປົກຄອງຢູ່ໃນ ສປປ ລາວ ແລະໃນທີ່ສຸດກໍໄດ້ປະສົບກັບຜົນສຳເລັດ ຂອງການຕັ້ງຊີວິດໃໝ່ຢູ່ໃນສະຫະລັດອາເມຣິກາ ປະເທດທີ່ເປີດອ້ອມແຂນ ໃຫ້ໂອ ກາດແກ່ທຸກໆຄົນ ທີ່ສະແຫວງຫາອິດສະຫລະພາບຂອງການຕັ້ງຊີວິດໃໝ່ ໂດຍສະເພາະຢ່າງຍິ່ງການສຶກສາ.
ການສຶກສາຢູ່ໃນສະຫະລັດອາເມຣິກາ ຈາກຊັ້ນປະຖົມຫາມັດທະຍົມ ແມ່ນຮຽນບໍ່ໄດ້ເສຍເງິນ ແຕ່ຢູ່ໃນຂັ້ນມະຫາວິທະຍາໄລແລ້ວຕ້ອງເສຍເງິນຄ່າຮຽນ ຊຶ່ງມີລາຄາແພງເຖິງ 50 ກວ່າພັນໂດລາຕໍ່ປີຂຶ້ນໄປ ຊຶ່ງແລ້ວແຕ່ສະຖາບັນ. ແຕ່ເຖິງຢ່າງໃດກໍດີ ບັນດານັກສຶກສາຜູ້ຮຽນເກັ່ງ ຂະຫຍັນຂັນແຂງ ໂດຍສະເພາະເປັນນັກຮຽນທີ່ມາຈາກຄອບຄົວມີລາຍໄດ້ຕໍ່າ ເຂົາເຈົ້າມັກຈະໄດ້ຮັບທຶນຮຽນພິເສດ.
ດຣ. ສຸສະດາ ສຳເລັດການສຶກສາຈາກມັດທະຍົມ South High ໃນປີ 2002 ໄປຮຽນຕໍ່ທີ່ມະຫາວິທະຍາໄລ St. Thomas ບ່ອນທີ່ນາງສຳເລັດປະລິນຍາຕີຝ່າຍຄະນິດສາດ ຫລັງຈາກນັ້ນໄດ້ຮຽນຕໍ່ເອົາ ປະລິນຍາໂທ. ໃນຂະນະທີ່ນາງເປັນຄູສອນຢູ່ໂຮງຮຽນໃນນະຄອນ Minneapolis ຍານາງກໍໄດ້ຝຶກຝົນຕົນເອງໄປ ພ້ອມ ແລະສຳເລັດປະລິນຍາເອກຈາກ ມະຫາວິທະຍາໄລ Minnesota ຝ່າຍວິທະຍາສາດ ເທັກໂນໂລຈີ ວິສະວະກອນ ຄະນິດ ສາດ ແລະການສຶກສາ. ດຣ. ສຸສະດາ ແມ່ນຄົນອາເມຣິກັນເຊື້ອສາຍລາວ ທີ່ໄດ້ວາງບົດ ບາດໄວ້ ເປັນແບບ ຢ່າງ ແລະໄດ້ນຳເອົາປະສົບການມາໃຊ້ຊ່ວຍສັງຄົມ ຊຶ່ງຍານາງໄດ້ກ່າວວ່າ:
ໃນນາມເປັນອາຈານສອນບັນດານັກຮຽນທີ່ທຸກຈົນ ມີພອນສະຫວັນ ດຣ. ສຸສະດາ ແມ່ນກໍຜູ້ນຶ່ງຢູ່ໃນຄະນະກຳມະການດູແລຕິດຕາມ ແລະມີສິດສະເໜີໃຫ້ນັກຮຽນຄົນໃດຄົນນຶ່ງທີ່ຈະກ້າວໄປໄກໄດ້ຮັບທຶນສຶກສາພິເສດ ດັ່ງຍານາງໄດ້ກ່າວຕໍ່ໄປອີກວ່າ :
ດຣ. ສຸສະດາ ຈິດຕະຈັກ ປັດຈຸບັນນີ້ອາຍຸໄດ້ 32 ປີ ເປັນລູກສາວຫລ້າຂອງ ທ່ານຄຳສານ ອະດີດທະຫານຝ່າຍເປັນກາງ ແລະຍານາງບຸນມີ. ໃນປີ 1976 ຫາປີ 1983 ຄອບຄົວຈິດທະຈັກ ພ້ອມດ້ວຍລູກຫົກຄົນ ໄດ້ຖືກສົ່ງໄປຢູ່ສູນສຳມະນາ ທີ່ໂພນສະຫວັນເປັນເວລາແປດປີ. ຫລັງຈາກນັ້ນ ຄອບຄົວໄດ້ຖືກປົດປ່ອຍອອກມາ ແລະພຽງແຕ່ສາມອາທິດ ທ່ານຄຳສານຫົວໜ້າຄອບຄົວໄດ້ຕັດ ສິນໃຈນຳພາຄອບຄົວໂຕນມາຢູ່ສູນອົບພະຍົບ ທີ່ນະຄອນພະນົມ ປະເທດໄທ ບ່ອນທີ່ ດຣ. ສຸສະດາ ໄດ້ເກີດ ຊຶ່ງຍານາງໄດ້ກ່າວກ່ຽວກັບເລື້ອງນີ້ວ່າ:
ດຣ. ສຸສະດາ ເກີດຢູ່ສູນອົບພະຍົບ ເຕີບໃຫຍ່ຢູ່ໃນສະຫະລັດ ພໍ່ແມ່ເຮັດວຽກອອກແຮງງານລ້ຽງດູ ແລະສົ່ງເສີມການຮຽນຢ່າງສຸດຂີດ. ດຣ. ສຸສະດາ ສາມາດປາກພາສາລາວໄດ້ເປັນຢ່າງດີ ແລະກໍບໍ່ໄດ້ຫລົງລືມ ຮາກເຫງົ້າທີ່ມາຂອງຄອບຄົວ ແລະໄດ້ເດີນທາງໄປຢ້ຽມຢາມປະເທດລາວຫລາຍໆຄັ້ງ. ດຣ. ສຸສະດາ ໄດ້ເລົ່າຄວາມຮູ້ສຶກຕໍ່ວີໂອເອ ກ່ຽວກັບສະພາບການເປັນຢູ່ທີ່ຍານາງໄດ້ໄປເຫັນ ໃນປະເທດລາວ ສູ່ຟັງດັ່ງນີ້
ດຣ. ສຸສະດາ ຈິດທະຈັກ ເປັນຍິງສາວອາເມຣິກັນເຊື້ອສາຍລາວ ທີ່ໜ້າຮັກ ວ່ອງໄວ ມີຄວາມຮັບຜິດຊອບສູງຕໍ່ໜ້າທີ່ການ ແລະຫຸ້ມລ້ອມໄປດ້ວຍເພື່ີອນຝູງທີ່ຮັກແພງຢ່າງຫລວງຫລາຍ. ພວກເຮົາຄະນະຈັດທຳລາຍການ ວິທະຍຸວີໂອເອຂໍສະແດງຄວາມປື້ມປິຕິຍິນດີກັບຜົນສຳເລັດຂອງຍານາງໃນຄັ້ງນີ້ດ້ວຍ.
