ນັກບິນອະວະກາດອະວຸໂສ 2 ຄົນແລະນັກບິນອະວະກາດໃໝ່ຄົນນຶ່ງຈາກຝຣັ່ງພວມເດີນ ທາງໄປຍັງ ສະຖານະອະວະກາດນາໆຊາດ ເພື່ອປະຕິບັດງານ ເປັນເວ ລາ 5 ເດືອນຢູ່ທີ່ນັ້ນ.
ນັກບິນອະວະກາດອາເມຣິກັນ Peggy Whitson ນັກເຫາະຈັກກະວານຣັດເຊຍ Oleg Novitskiy ແລະ ນັກບິນອະວະກາດຝຣັ່ງ ຈາກອົງການອະວະກາດ ຢູໂຣບ Thomas Pesquet ຖືກສົ່ງຂຶ້ນສູ່ວົງໂຄຈອນໂດຍຍານອະວະກາດ Soyuz ຣັດເຊຍ ໃນຕອນເຊົ້າ ວັນສຸກມື້ນີ້ ຕາມເວລາທ້ອງຖິ່ນໃນກາຊັກສະຖານ.
ນີ້ຈະເປັນການປະຕິບັດງານ ສ້າງສະຖິຕິໃໝ່ ຂອງນັກບິນອະວະກາດ Whitson ຊຶ່ງເວ ລານີ້ມີອາຍຸ 56 ປີ ແລະກໍຈະເປັນແມ່ຍິງທີ່ມີອາຍຸສູງທີ່ສຸດ ຂຶ້ນໄປປະຕິບັດງານເທິງອະ ວະກາດ ເວລາການປະຕິບັດໜ້າທີ່ສິ້ນສຸດລົງ ໂດຍທີ່ນາງຈະສ້າງສະຖິຕິໃໝ່ເປັນຜູ້ທີ່ມີ ຊົ່ວໂມງບິນຮວມກັນຫລາຍທີ່ສຸດ ສຳລັບນັກບິນອະວະກາດອາເມຣິກັນ.
ສະຖິຕິໃນປັດຈຸບັນນີ້ແມ່ນ 534 ມື້ ແລະນັກບິນອະວະກາດ Jeff Williams ເປັນຜູ້ຄອບຄອງຢູ່.
ນາງ Whitson ກ່າວກ່ອນຖືກສົ່ງ ຂຶ້ນສູ່ອະວະກາດວ່າ “ສິ່ງສຳຄັນສຸດ ກ່ຽວກັບສະຖານີອະວະກາດນາໆຊາດ ກໍແມ່ນມິດຕະພາບແລະວຽກງານທີ່ພວກເຮົາໄດ້ເຮັດຢ່າງສຳເລັດ ລຸລ່ວງຢູ່ທີ່ນັ້ນ.”
ທ່ານ Novitskiy ແມ່ນເດີນທາງເທື່ອທີ 2 ໄປຍັງສະຖານະອະວະກາດນາໆຊາດ ແລະນີ້ແມ່ນຖ້ຽວບິນອະວະກາດເທື່ອທຳອິດສຳລັບທ່ານ Pesquet. ພວກເຂົາເຈົ້າທັງ 3 ຈະໄປຮ່ວມສົມທົບກັບພະນັກງານອີກ 3 ຄົນ ທີ່ພວມປະຈຳການ ຢູ່ເທິງສະຖານີອະວະກາດດັ່ງ ກ່າວ.
