ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ກ່າວວ່າ ອາເມຣິກາ
ມີຄວາມໝາຍໝັ້ນທີ່ຈະສ້າງ “ຍຸກສະໄໝຫລືລຸ້ນຄົນ ທີ່ປາດສະຈາກໂຣກ AIDS.”
ໃນຄໍາປາໄສຕໍ່ກອງປະຊຸມໂຣກ AIDS ນາໆຊາດ ທີ່ນະຄອນຫລວງວໍຊິງຕັນ ໃນມື້ທີ່ສອງ
ວັນຈັນວານນີ້ ທ່ານນາງ Clinton ກ່າວວ່າ ສະຫະລັດອາເມຣິກາ ກໍາລັງປະຕິບັດງານເພື່ອ
ສ້າງລະບົບສຸຂະພາບທີ່ຍືນຍົງ ແບບທີ່ຈະຊ່ວຍໃຫ້ໂລກ ໄດ້ຮັບໄຊຊະນະໃນທີ່ສຸດ ໃນການ
ຕໍ່ສູ້ກັບພະຍາດນີ້.”
ທ່ານນາງກ່າວວ່າ ພາຍໃຕ້ເປົ້າໝາຍດັ່ງກ່າວນີ້ ສະຫະລັດແມ່ນພ້ອມແລ້ວທີ່ຈະລົງທືນ ໃນ
ອາຟຣິກາ ແລະແຫ່ງອື່ນໆ ເຂົ້າໃສ່ພວກຄລີນິກທັງຫລາຍ ທີ່ຊ່ວຍເຮັດໃຫ້ການແຜ່ຜາຍ
ພະຍາດນີ້ ຈາກແມ່ໄປຫາລູກ ຊ້າລົງນັ້ນ. ທ່ານນາງໄດ້ຍ້ອງຍໍໂຄງການ ຕັດໜັງຫູ້ມປາຍ
ອະໄວຍະວະເພດຊາຍ ທີ່ອາຟຣິກາ ທີ່ໄດ້ຮັບຜົນສໍາເລັດສູງ ໃນການເຮັດໃຫ້ການແຜ່ຜາຍ
ເຊື້ອພະຍາດ HIV/AIDS ຊັກຊ້າລົງນັ້ນ.
ດາຣານັກຮ້ອງເພງ Rock ຊື່ດັງຂອງອັງກິດ Elton John ກໍໄດ້ກ່າວຕໍ່ຕ້ານ ມົນທິນ ຄວາມ
ກຽດຊັງ ແລະຄວາມບໍ່ຫົວຊາ ຊຶ່ງລາວກ່າວວ່າ ເປັນສິ່ງທີ່ຂັດຂວາງແລະຖ່ວງດຶງການຕໍ່ສູ້ກັບ
ການແຜ່ຜາຍຂອງພະຍາດ AIDS.
ອົງການສະຫະປະຊາຊາດ ກ່າວວ່າ ມີ 34 ລ້ານຄົນຕິດເຊື້ອພະຍາດ HIV/ AIDS ແລະໃນນັ້ນ
1.7 ລ້ານຄົນ ຕາຍຍ້ອນພະຍາດດັ່ງກ່າວ ໃນປີ 2011.
ຄາດວ່າ ຈະມີຜູ້ເຂົ້າຮ່ວມກອງປະຊຸມນີ້ ຫລາຍກວ່າ 20.000 ຄົນ.
ລາຍງານທີ່ກ່ຽວຂ້ອງ: