ເຮືອບິນລັດຖະບານຊີເຣຍ ແລະປືນໃຫຍ່ ທີ່ສະໜັບສະໜູນໂດຍພັນທະມິດຣັດເຊຍ ໄດ້ທຳການໂຈມຕີຢ່າງໜັກໜ່ວງ ຕໍ່ເຂດຄວບຄຸມ ຂອງພວກຕໍ່ຕ້ານລັດຖະບານ ຢູ່ໃນເມືອງ Aleppo ໃນຕອນເຊົ້າວັນສຸກມື້ນີ້ ເຮັດໃຫ້ມີຜູ້ເສຍຊີວິດຫຼາຍຄົນຮວມທັງພວກເດັກນ້ອຍ.
ນີ້ເປັນມື້ທີສີ່ຕິດຕໍ່ກັນ ໃນການໂຈມຕີທາງອາກາດຄືນໃໝ່ ໂດຍເຮືອບິນລົບຂອງ ລັດຖະ ບານ ນັບແຕ່ມົສກູໄດ້ປະກາດສິ້ນສຸດ ການຢຸດຍິງເພື່ອເຫັນແກ່ມະນຸດສະທຳເປັນເວລາດົນນຶ່ງເດືອນ ໃນວັນອັງຄານຜ່ານມານີ້.
ຫ້ອງການສີ້ງຊອມສິດທິມະນຸດໃນຊີເຣຍ ທີ່ມີຫ້ອງການຢູ່ອັງກິດກ່າວວ່າ ພົນລະເຮືອນຢ່າງໜ້ອຍ 65 ຄົນໄດ້ເສຍຊີວິດນັບແຕ່ການໂຈມຕີໄດ້ເລີ້ມຂຶ້ນ ແລະກ່າວ ຕື່ມວ່າ ພວກຕໍ່ຕ້ານລັດຖະບານໄດ້ຍິງຈະຫຼວດຫລາຍສິບລູກ ເຂົ້າໃສ່ເຂດຄວບຄຸມຂອງລັດຖະບານ.
ການໂຈມຕີໃນອາທິດນີ້ ຕໍ່ເຂດຄວບຄຸມຂອງພວກຕໍ່ຕ້ານລັດຖະບານທີ່ມີປະຊາຊົນອາໄສຢູ່ຫລາຍກວ່າ 250,000 ຄົນ ໄດ້ເລີ້ມໂດຍການປະກາດຂອງຣັດເຊຍ ທີ່ວ່າ ຕົນໄດ້ໂຈມຕີແຂວງ Idlib ໃນພາກເໜືອບ່ອນທີ່ພວກຕໍ່ຕ້ານລັດຖະບານຄວບຄຸມ ແລະແຂວງ Homs ໃນພາກກາງຂອງປະເທດ.
ພວກຕໍ່ຕ້ານລັດຖະບານໄດ້ຖືກປິດລ້ອມຢູ່ໃນພາກຕາເວັນອອກຂອງເມືອງ Aleppo ໂດຍທະຫານ ນັບແຕ່ເດືອນກໍລະກົດທີ່ຜ່ານມາ. ບັນດາອົງການບັນເທົາທຸກກ່າວວ່າສະບຽງອາ ຫານໄດ້ໝົດໄປແລ້ວ.
ເມືອງ Aleppo ຄັ້ງນຶ່ງເຄີຍເປັນສູນການຄ້າທີ່ສຳຄັນ ແລະແຫລ່ງອຸດສາຫະກຳ ຊຶ່ງເມືອງໄດ້ຖືກເພພັງຍ້ອນການສູ້ລົບນັບແຕ່ປີ 2012 ເວລາພວກຕໍ່ຕ້ານລັດຖະ ບານໄດ້ເຂົ້າຄວບ ຄຸມບາງສ່ວນທາງຕາເວັນອອກ.
ພົນລະເຮືອນ 1 ລ້ານ 2 ແສນຄົນທີ່ກຳລັງຢູ່ເຂດຄວບຄຸມຂອງລັດຖະບານ ໄດ້ຕົກຢູ່ພາຍໃຕ້ການໂຈມຕີຈາກການຍິງລູກຈະຫລວດຂອງພວກຕໍ່ຕ້ານ.