ບັນດາເຈົ້າໜ້າທີ່ ອິນໂດເນເຊຍ ກ່າວໃນວັນອັງຄານມື້ນີ້ວ່າ ບໍ່
ມີຜູ້ລອດຊີວິດຈາກ ເຮືອບິນຕົກໃນວັນອາທິດທີ່ຜ່ານມາ ຢູ່ທາງ
ພາກຕາເວັນອອກຂອງປະເທດ
ບັນດາໜ່ວຍຊອກຄົ້ນຫາ ໄດ້ໄປເຖິງບ່ອນເຮືອບິນຕົກ ໃນແຂວງ
Papua ເປັນເທຶ່ອທຳອິດໃນວັນອງຄານມື້ນີ້ ຫລັງຈາກໄດ້ມີການ
ລ້າຊ້າ ຍ້ອນເນື້ອທີ່ອັນລຳບາກ ແລະມີລາຍງານວ່າ “ເຮືອບິນໄດ້
ຖືກທຳລາຍຢ່າງສິ້ນເຊີງ.”
ບັນດາເຈົ້າໜ້າທີ່ກ່າວວ່າ ພວກກູ້ໄພໄດ້ພົບເຫັນ 53 ຊາກສົບຂອງ
ຈຳນວນ 54 ຄົນທີ່ຢູ່ໃນເຮືອບິນ Trigana ຖ້ຽວບິນ 267 ເວລາ
ເຮືອບິນຕົກ ກ່ອນໜ້າກຳ ນົດການລົງສູ່ເດີ່ນ Oksibil.
ນອກຈາກບັນດາຜູ້ໂດຍສານ ແລະພະນັກງານເຮືອບິນແລ້ວ ເຮືອບິນຍັງໄດ້ບັນທຸກເງິນ
ສົດ ເກືອບ 470,000 ໂດລາ ທີ່ເປັນເງິນຂອງລັດຖະບານ ເພື່ອນຳໄປແຈກຢາຍໃຫ້ແກ່
ບັນດາຄອບຄົວທີ່ທຸກຈົນ.
ປະທານາທິບໍດີ Joko “Jokowi” Widodo ກ່າວຕໍ່ບັນດານັກຂ່າວວ່າ ຫລັງຈາກເຮືອບິນ
ຕົກວ່າ ທ່ານໄດ້ແນະນຳໃຫ້ ລັດຖະມົນຕີຂົນສົ່ງ ປັບປຸງຄວາມປອດໄພການບິນໃຫ້ດີຂື້ນ
ເພື່ອປ້ອງກັນເຮືອບິນຕົກໃນອານາຄົດ.
ຜະແນກການບິນ ອິນໂດເນເຊຍ ໄດ້ປະສົບກັບອຸປະຕິເຫດຮ້າຍແຮງຫລາຍເທື່ອ ຫວ່າງ
ມໍໆມານີ້ ຮວມທັງເຮືອບິນຕົກໃນເດືອນທັນວາແລ້ວນີ້ ຂອງສາຍການບິນ AirAsia ທີ່ເຮັດ
ໃຫ້ 162 ຄົນເສຍຊີວິດ. ປະເທດເກາະດອນ ໃນປາຊິຟິກແຫ່ງນີ້ ເປັນນຶ່ງຂອງປະເທດໃນ
ເອເຊຍ ທີ່ຕະຫລາດການບິນກຳລັງເຕີບໂຕຢ່າງວ່ອງໄວ ແຕ່ກຳລັງດີ້ນລົນຊອກຫານັກບິນ
ທີ່ມີຄຸນນະພາບ ຊ່າງແປງ ແລະບັນດາຜູ້ຄວບຄຸມການບິນ ເພື່ອຄໍ້າປະກັນຄວາມປອດໄພ.
ສາຍການບິນ Trigana ໄດ້ຮັບຄວາມເສຍຫາຍຢ່າງຮ້າຍແຮງເຖິງ 14 ຄັ້ງ ນັບຕັ້ງແຕ່ໄດ້
ເລີ້ມປະຕິບັດງານມາໃນປີ 1991 ແລະຢູ່ໃນບັນຊີຂອງ ສາຍການບິນຂົນສົ່ງອິນໂດເນເຊຍ
ແມ່ນຖືກຫ້າມບິນໃນ ນ່ານຟ້າ ສະຫະພາບຢູໂຣບ.
