ຊາກຫັກພັງຂອງອັນທີ່ເຊື່ອວ່າ ເປັນເຮືອບິນໂດຍສານ ອິນໂດເນເຊຍ
ທີ່ມີຜູ້ໂດຍສານ ແລະ ຈຸບິນ ທັງໝົດ 54 ຄົນ ຢູ່ໃນເຮືອບິນ ໄດ້ຖືກ
ພົບເຫັນ ຢູ່ໃນແຂວງປາປົວ ຢູ່ທາງພາກຕາເວັນອອກ ທີ່ເປັນບ່ອນ
ທຸລະກັນດານ. ເຮືອບິນລຳດັ່ງກ່າວໄດ້ຕົກລົງ ໃນວັນທິດວານນີ້
ຂະນະທີ່ກຳລັງບິນຜ່ານສະພາບອາກາດທີ່ບໍ່ດີ.
ບັນດາເຈົ້າໜ້າທີ່ ກ່າວວ່າ ເຮືອບິນຄົ້ນຫາລຳໜຶ່ງ ໄດ້ແນມເຫັນຊາກ
ຂອງເຮືອບິນໂດຍສານນັ້ນ ໃນວັນຈັນມື້ນີ້ ແລະ ທິມພະນັກງານກູ້ໄພ
ໄດ້ທຳງານ ເພື່ອຈະໄປເຖິງສະຖານທີ່ເກີດເຫດນັ້ນ.
ຍັງບໍ່ຈະແຈ້ງເທື່ອວ່າ ມີຜູ້ໃດລອດຊີວິດຫຼືບໍ່.
ສາຍການບິນ Trigana Air ຖ້ຽວບິນ 267 ໄດ້ສູນເສຍການຕິດຕໍ່ ກັບໜ່ວຍຄວບຄຸມການສັນຈອນທາງອາກາດ ປະມານ 30 ນາທີ ຫຼັງຈາກທີ່ໄດ້ບິນຂຶ້ນ ໃນວັນອາທິດວານນີ້ ຈາກ ສະໜາມບິນ Sentan ໃນນະຄອນຫຼວງ Jayapura ຂອງແຂວງດັ່ງກ່າວ. ເຮືອບິນລຳນັ້ນ
ຕາມປົກກະຕິແລ້ວ ແມ່ນເປັນຖ້ຽວບິນ 50 ນາທີ ທີ່ບິນໄປຍັງເມືອງ Oksibil. ຈຸດຂອງເຮືອບິນຕົກລົງນັ້ນ ແມ່ນປະມານ 12 ກິໂລແມັດ ຈາກເມືອງ Oksibil.
ຜູ້ໂດຍສານທີ່ເປັນຜູ້ໃຫຍ່ 44 ຄົນ ເດັກນ້ອຍ 5 ຄົນ ແລະ ພະນັກງານການບິນ 5 ຄົນ ແມ່ນຢູ່ໃນເຮືອບິນໃບພັດເທີໂບ ອີງຕາມບັນດາເຈົ້າໜ້າທີ່ການບິນ.
ສາຍການບິນ Trigana ດຳເນີນການ ບິນພາຍໃນປະເທດອິນໂດເນເຊຍ. ມັນໄດ້ປະສົບກັບ ເຫດການທີ່ຮ້າຍແຮງຜ່ານມາເຖິງ 14 ຄັ້ງ ນັບຕັ້ງແຕ່ໄດ້ເລີ້ມຕົ້ນດຳເນີນການມາ ໃນປີ 1991 ເປັນຕົ້ນມາ ແລະ ຖືກບັນທຶກລົງໃນບັນຊີດຳ ຂອງບັນດາຜູ້ບໍລິການການບິນ ທີ່ຖືກຫ້າມບໍ່ໃຫ້ບິນຢູ່ນ່ານຟ້າຂອງສະຫະພາບຢູໂຣບ.
ເຮືອບິນ ລຸ້ນ ATR 42-300 ໃບພັດເທີໂບຄູ່ ທີ່ໄດ້ຫາຍສາບສູນໄປນັ້ນ ໄດ້ມີບັນຫາຄວາມປອດໄພຫຼາຍຢ່າງ ນັບຕັ້ງແຕ່ມັນເລີ້ມອອກບິນປະຕິບັດການ ມາໄດ້ຫຼາຍກວ່າ 20 ປີແລ້ວ ອີງຕາມ ເຄືອຂ່າຍຄວາມປອດໄພດ້ານການບິນ.
