ທ່ານນາງ Restaria Hutabarat ທີ່ສະຖາບັນໃຫ້ການຊ່ອຍເຫລືອດ້ານກົດໝາຍທີ່ກຸງຈາ
ກາຕາ ຫລື Jakarta Legal Aid Institute ໄດ້ໃຊ້ເວລາໝົດປີທີ່ຜ່ານມານີ້ ນໍາພາໃນ
ການສືບສວນສອບສວນກ່ຽວກັບການກ່າວຫາທີ່ວ່າ ມີການທາລຸນນະກໍາພວກນັກໂທດຢ່າງ
ແຜ່ຫລາຍ ຢູ່ໃນຄຸກໃນ 4 ຫົວເມືອງໃຫຍ່ຂອງອິນໂດເນເຊຍ. ສິ່ງທີ່ທ່ານນາງໄດ້ພົບເຫັນ
ນັ້ນ ກໍແມ່ນວ່າການທຸບຕີ ການນາບຂູ່ ແລະຕະຫລອດທັງການຂົ່ມຂືນຊໍາເລົາເປັນສິ່ງທີ່ເກີດ
ຂຶ້ນຢູ່ທົ່ວໄປ ຈົນຖືວ່າເປັນຂອງທໍາມະດາໄປແລ້ວ ຊຶ່ງທ່ານນາງ Hutabarat ກ່າວຊີ້ແຈງວ່່າ:
“ພວກເຮົາໄດ້ລົງຄວາມເຫັນວ່າ ການທໍລະມານນັ້ນ ມີຂຶ້ນຢ່າງເປັນລະບົບ ແລະ
ຖືກລວມເຂົ້າເປັນສ່ວນນຶ່ງຂອງລະບົບຍຸຕິທໍາດ້ານຄະດີອາຍາ ເພາະວ່າທຸກໆຄົນ
ທີ່ພວກເຮົາໄດ້ສໍາຫລວດນັ້ນເວົ້າວ່າ ພວກເຂົາເຈົ້າເຄີຍຖືກທໍລະມານ ຢ່າງໜ້ອຍ
ກໍໃນຮູບໃດຮູບນຶ່ງ ໂດຍຜ່ານລະບົບຍຸຕິທໍາທາງອາຍານັ້ນ.”
ການພົບເຫັນທີ່ວ່ານີ້ແມ່ນອິງຕາມການສໍາພາດກັບພວກຕ້ອງສົງໄສແລະພວກນັກໂທດໃນ
ຄຸກ ຫລາຍກວ່າ 1 ພັນຄົນ ຕະຫລອດທັງຄໍາຕອບຈາກພວກເຈົ້າໜ້າທີ່ຕໍາຫລວດ ພວກ
ໄອຍະການ ຜູ້ພິພາກສາ ເຈົ້າໜ້າທີ່ຄວບຄຸມດູແລຄຸກ ແລະພວກນັກເຄື່ອນໄຫວດ້ານສິດທິ
ມະນຸດ ຈໍານວນທັງໝົດ 400 ຄົນ.
ທ່ານນາງ Hutabarat ກ່າວວ່າ ໂດຍສ່ວນໃຫຍ່ແລ້ວ ແມ່ນຕໍາຫລວດທີ່ເປັນພວກທີ່ທໍາ
ການທາລຸນນະກໍາ ເພື່ອໃຫ້ພວກຜູ້ຕ້ອງຫາແລະພວກນັກໂທດ ຮັບສາລະພາບຜິດ ແຕ່
ທ່ານນາງກ່າວວ່າ ພວກໄອຍະການແລະຜູ້ພິພາກສາ ກໍປາກົດວ່າ ຊຸກຍູ້ສົ່ງເສີມ ຫລືບໍ່ກໍ
ໂຍະຍານ ປ່ອຍໃຫ້ມີການໃຊ້ກໍາລັງໃນການສອບປາກຄໍານັ້ນ.
ທ່ານນາງ Hutabarat ກ່າວວ່າ ຕໍາຫລວດມີອໍານາດຄວບຄຸມພວກຜູ້ຕ້ອງສົງໄສຫລາຍ
ໂພດ ແລະມີຄວາມຮັບຜິດຊອບໜ້ອຍທີ່ສຸດ. ໃນບາງກໍລະນີນັ້ນ ຕໍາຫລວດສາມາດຄຸມ
ຂັງພວກຜູ້ຕ້ອງຫາໄວ້ໄດ້ ເຖິງ 60 ມື້ ກ່ອນຈະຕັ້ງຂໍ້ກ່າວຫາຕໍ່ເຂົາເຈົ້າ. ແລະທ່ານນາງ
ກ່າວຕື່ມວ່າ ຢູ່ໃນອິນໂອເນເຊັຍ ການທາລຸນນະກໍາໂດຍເຈົ້າໜ້າທີ່ຕໍາຫລວດນັ້ນ ບໍ່ຖືວ່າ
ເປັນໂທດ ຫລືຄວາມຜິດ ແລະວ່າເລື້ອງນີ້ຈະຕ້ອງມີການປ່ຽນແປງ ຊຶ່ງທ່ານນາງ Huta-
barat ກ່າວຕໍ່ໄປວ່າ:
“ລັດຖະບານຄວນຈະຕີຄວາມໝາຍຂອງການທໍລະມານ ວ່າເປັນອາຊະຍາກໍາ ໃນ
ອິນໂດເນເຊຍ ອິງຕາມກົດໝາຍຂອງປະເທດ. ມັນຈະຕ້ອງມີກົດໝາຍ ທີ່ບົ່ງໄວ້
ຢູ່ແລ້ວໂດຍລັດຖະບານ ເພື່ອທີ່ຈະດໍາເນີນຄະດີໃນຂໍ້ຫາອາຍາຕໍ່ ພວກທີ່ກະທໍາ
ການທໍລະມານນັ້ນ. ນັ້ນຄືບາດກ້າວທໍາອິດແລະດ່ວນທີ່ສຸດ ທີ່ຄວນຈະເຮັດ.”
ອິນໂດເນເຊຍ ຊຶ່ງມີພົນລະເມືອງ 237 ລ້ານຄົນ ໄດ້ໂຜ່ໂຕອອກມາຈາກການປົກຄອງແບບ
ຜະເດັດການເປັນເວລາຫລາຍທົດສະວັດໃນປີ 1998. ແຕ່ເຖິງແມ່ນວ່າ ເວລານີ້ໄດ້ກາຍມາ
ເປັນປະເທດປະຊາທິປະໄຕແລ້ວກໍຕາມ ແຕ່ອິນໂດເນເຊຍກໍຍັງຖືກຕໍາໜິຕິຕຽນວ່າມີລະບົບ ກົດໝາຍທີ່ອ່ອນແອຢູ່.
ມີລາຍງານຫລາຍສະບັບເຊ່ນກັນທີ່ເວົ້າວ່າ ພວກທະຫານກໍທໍາການທາລຸນນະກໍາພວກຜູ້ຕ້ອງ
ສົງໄສວ່າ ເປັນພວກຫົວແບ່ງແຍກດິນແດນ ແລະກອງທັບອິນໂດເນເຊຍເອງກໍກ່າວວ່າ ຕົນ
ໄດ້ນໍາພວກຜູ້ຕ້ອງສົງໄສຫລາຍຄົນ ຂຶ້ນສານທະຫານ.
ໂຄສົກຕໍາຫລວດແຫ່ງຊາດກ່າວວ່າ ທາງກົມຕໍາຫລວດຈະສຶກສາເບິ່ງລາຍງານສະບັບນີ້
ແລະວ່າ ຕໍາຫລວດຄົນໃດກໍຕາມທີ່ລະເມີດສິດທິພົນລະເຮືອນ ກໍຄວນຈະຖືກລົງໂທດ.
